చంద్రయాన్-5 మిషన్ కోసం జపాన్‌తో భాగస్వామ్యం: ప్రధాని మోదీ ప్రకటన

అంతరిక్ష రంగంలో అద్భుతమైన విజయాలు సాధిస్తున్న భారత్‌ ఇప్పుడు మరో కీలక భాగస్వామ్యాన్ని ఏర్పాటు చేసుకుంది. చంద్రుడిపై లోతైన పరిశోధనల కోసం చేపట్టనున్న చంద్రయాన్-5 (Chandrayaan-5) మిషన్‌ను భారత్‌–జపాన్ కలిసి నిర్వహించనున్నట్లు ప్రధాని నరేంద్ర మోదీ ప్రకటించారు.ఈ మిషన్ కోసం ఇరుదేశాల అంతరిక్ష సంస్థలు — ఇస్రో (ISRO) మరియు జాక్సా (JAXA) — ముట్టడిగా పని చేయనున్నాయి. భారత్ మరియు జపాన్ మధ్య పెరుగుతోన్న వ్యూహాత్మక మరియు శాస్త్రీయ సహకారానికి ఇది మరో నిదర్శనంగా నిలుస్తోంది.ఈ సందర్భంగా ప్రధానంగా ఆర్థిక సహకారం, ఆరోగ్యం, ఆర్టిఫిషియల్ ఇంటెలిజెన్స్ (AI), సైన్స్ అండ్ టెక్నాలజీ వంటి రంగాల్లో భాగస్వామ్యాన్ని మరింత అభివృద్ధి చేసేందుకు ఇరు దేశాల ప్రధానులు చర్చించారు. చంద్రయాన్-5 మిషన్ ద్వారా చంద్రుడి ఉపరితలం, వాతావరణం, భౌతిక లక్షణాలపై మరింత లోతైన శాస్త్రీయ అవగాహన పెరగనుందని భావిస్తున్నారు. జపాన్‌ సాంకేతికతతో ఈ మిషన్ మరింత ఆధునికంగా మలచనున్నట్లు విశ్లేషకులు అభిప్రాయపడుతున్నారు.ఇదిలా ఉండగా, ఈ మిషన్‌కు కేంద్ర ప్రభుత్వం ఇప్పటికే అనుమతి ఇచ్చింది. 2023లో విజయవంతంగా ప్రయోగించిన చంద్రయాన్-3లో భాగంగా 25 కిలోల 'ప్రజ్ఞాన్‌' రోవర్‌ను చంద్రుడిపై ల్యాండ్ చేసినట్టు ఇస్రో చైర్మన్‌ అప్పట్లో ప్రకటించారు. అయితే చంద్రయాన్-5లో మాత్రం భారీ బరువైన 250 కిలోల రోవర్‌ను చంద్రుడి ఉపరితలంపై దిగించే లక్ష్యంతో ప్రణాళికలు రూపొందించారు. ఈ ప్రాజెక్టులో జపాన్‌తో భాగస్వామ్యం ముఖ్యమైన భాగంగా మారనుంది.ఇక, చంద్రుడిపై నుంచి మట్టి, రాళ్ల నమూనాలను భూమికి తీసుకొచ్చే లక్ష్యంతో రూపొందించిన చంద్రయాన్-4 మిషన్ ను 2027లో ప్రయోగించే యోచనలో ఉన్నట్లు ఇస్రో ఇప్పటికే వెల్లడించింది.