నిరుద్యోగులకు గుడ్‌న్యూస్.. 8,477 నాన్-టీచింగ్ పోస్టులకు సర్కారు నోటిఫికేషన్

పశ్చిమ బెంగాల్‌ పాఠశాలల్లో 8,477 నాన్-టీచింగ్ సిబ్బంది నియామకాలకు పశ్చిమ బెంగాల్ స్కూల్ సర్వీస్ కమిషన్ నోటిఫికేషన్ జారీ చేసింది. ఈ నియామకాలు గ్రూప్ సి, గ్రూప్ డి పోస్టుల భర్తీ కోసం ఉద్దేశించినవి. దాదాపు ఏడేళ్ల సుదీర్ఘ విరామం తర్వాత భారీ స్థాయిలో ఉద్యోగాల భర్తీకి ప్రకటన రావడంతో నిరుద్యోగ యువతలో ఆశలు చిగురించాయి. ఇటీవల సుప్రీం కోర్టు తీర్పు నేపథ్యంలో గతంలో నియామకమైన వేలాది మంది ఉద్యోగాలను కోల్పోవడంతో.. ఈ కొత్త ప్రకటన చాలా ప్రాధాన్యతను సంతరించుకుంది.

పశ్చిమ బెంగాల్‌లో ఉపాధ్యాయ, నాన్-టీచింగ్ ఉద్యోగాల భర్తీ గత కొన్ని సంవత్సరాలుగా తీవ్ర వివాదాలకు కేంద్రంగా మారింది. 2016లో జరిగిన రాష్ట్ర స్థాయి ఎంపిక పరీక్ష ద్వారా నియమితులైన 25,753 మంది ఉపాధ్యాయ, నాన్-టీచింగ్ సిబ్బంది నియామకాలను సుప్రీం కోర్టు ఈ ఏడాది ఏప్రిల్ 3న రద్దు చేసింది. కోల్‌కతా హైకోర్టు ఇచ్చిన తీర్పును సుప్రీం కోర్టు సమర్థించడంతో వేలాది మంది ఉద్యోగాలు కోల్పోయారు. ఈ రిక్రూట్‌మెంట్‌లో అక్రమాలు, అవినీతి జరిగాయని ఆరోపణలు రావడంతో న్యాయస్థానాలు కఠిన చర్యలు తీసుకున్నాయి. ఈ వివాదాల నేపథ్యంలో చాలా కాలంగా కొత్త నియామకాలు జరగలేదు.

ఈ నేపథ్యంలోనే ఎలాంటి వివాదాలకు తావు లేకుండా, పారదర్శకంగా నియామక ప్రక్రియను చేపట్టాలనే ఉద్దేశంతో పశ్చిమ బెంగాల్‌ ప్రభుత్వం తాజా నోటిఫికేషన్‌ను విడుదల చేసింది. ఈ రిక్రూట్‌మెంట్‌లో, గ్రూప్ సి పోస్టుల కింద 2,989 క్లర్క్‌లు ఇతర సిబ్బందిని భర్తీ చేయనున్నారు. అలాగే 5,488 గ్రూప్ డి ఉద్యోగాలను కూడా భర్తీ చేయనున్నారు. గ్రూప్ డి ఉద్యోగాలలో నైట్ గార్డు, ప్యూన్, ల్యాబ్ అటెండెంట్ వంటి పోస్టులు ఉన్నాయి.

అయితే ఈ నియామకాలకు దరఖాస్తు చేసుకోవాలనుకునే అభ్యర్థులు ఆన్‌లైన్‌లో మాత్రమే దరఖాస్తు చేసుకోవాలి. సెప్టెంబర్ 16వ తేదీ నుంచి సాయంత్రం 5 గంటల నుంచి దరఖాస్తు ప్రక్రియ ప్రారంభం కానుంది. అక్టోబర్ 31వ తేదీ సాయంత్రం 5 గంటల వరకు దరఖాస్తులు స్వీకరించనున్నారు. దరఖాస్తు ఫీజు చెల్లించడానికి కూడా అదే తేదీ చివరి రోజు. అయితే రాత్రి 11.59 నిమిషాల వరకు దీనికు సమయం ఇచ్చారు.

ఈ ఉద్యోగాలకు దరఖాస్తు చేయడానికి అభ్యర్థులు నిర్దిష్ట విద్యార్హతలు కలిగి ఉండాలి. గ్రూప్‌ సి పోస్టులకు కనీస విద్యార్హత 10వ తరగతి లేదా దానికి సమానమైన పరీక్షలో ఉత్తీర్ణత సాధించి ఉండాలి. గ్రూప్ డి పోస్టులకు కనీస విద్యార్హత 8వ తరగతి పాస్ అయి ఉండాలి. ఈ ఉద్యోగాలకు ఎంపిక ప్రక్రియ రాత పరీక్ష మరియు ఇంటర్వ్యూ ఆధారంగా ఉంటుంది. దరఖాస్తు ప్రక్రియ, పరీక్షా విధానం, సిలబస్‌కు సంబంధించిన పూర్తి వివరాలు అధికారిక నోటిఫికేషన్‌లో త్వరలో విడుదల కానున్నాయి.