బౌలర్‌ అవతారమెత్తిన బాబర్ ఆజమ్.. యూనిస్ ఖాన్ క్లీన్ బౌల్డ్‌

ఆసియాకప్ 2025 కోసం ఎంపిక చేసిన పాకిస్థాన్ జట్టులో ఆ జట్టు మాజీ కెప్టెన్ బాబర్ ఆజమ్‌ చోటు దక్కించుకోలేకపోయిన విషయం తెలిసిందే. టీ20 ఫార్మాట్‌కు తగ్గట్లు వేగంగా ఆడలేకపోతున్నాడని, కొన్ని బలహీనతలను అతడు అధిగమించాల్సి ఉందని పేర్కొంటూ పాకిస్థాన్ సెలక్షన్ కమిటీ బాబర్‌ను పక్కనపెట్టింది. దీంతో ప్రస్తుతం అతడికి ఖాళీ సమయం దొరికింది. ఈ నేపథ్యంలో అతడు ఓ ఎగ్జిబిషన్ మ్యాచ్‌లో అభిమానుల‌ను అల‌రించాడు. వ‌రద బాధితులకు విరాళాలు సేక‌రించేందుకు పెషావర్ జల్మి, ఆల్-స్టార్ లెజెండ్స్ ఎలెవ‌న్ జట్ల మ‌ధ్య ఈ మ్యాచ్‌ జరిగింది.

ఈ మ్యాచ్‌లో పెషావర్ జల్మికి ప్రాతినిథ్యం వ‌హించాడు బాబ‌ర్‌. ఎప్పుడూ స్పెషలిస్ట్ బ్యాటర్‌గా ఆడే అతడు.. ఈసారి మాత్రం మరో అవతారంలో కనిపించాడు. స్పిన్నర్‌గా స‌రికొత్త అవతారమెత్తాడు. స్పిన్ బౌలింగ్ చేయ‌డ‌మే కాకుండా 2 వికెట్లు ప‌డ‌గొట్టి అంద‌రిని ఆశ్చ‌ర్య‌ప‌రిచాడు. ఇందులో పాకిస్థాన్‌ దిగ్గజ బ్యాటర్ అయిన యూనిస్ ఖాన్ కూడా ఉన్నాడు. యూనిస్ ఖాన్.. బాబర్ బౌలింగ్‌లో క్లీన్ బౌల్డ్ అవ్వడం గమనార్హం. రెండో వికెట్‌గా అజార్ అలీని పెవిలియన్ పంపించాడు.

ఈ మ్యాచ్‌లో బ్యాటింగ్‌లోనూ బాబర్ ఆజమ్ రాణించాడు. 23 బంతులు ఎదుర్కొన్న బాబర్.. 4 ఫోర్లు, 3 సిక్స్‌ల‌తో 41 రన్స్ స్కోరు చేశాడు. అత‌డి బౌలింగ్‌, బ్యాటింగ్‌కు సంబంధించిన వీడియోలు ప్ర‌స్తుతం సోష‌ల్ మీడియాలో చక్కర్లు కొడుతున్నాయి. కాగా ఈ మ్యాచ్‌లో తొలుత బ్యాటింగ్ చేసిన పెషావర్ జల్మి జట్టు 144 రన్స్ చేసింది. అనంతరం 145 పరుగుల లక్ష్యంతో బరిలోకి దిగిన ఆల్-స్టార్ లెజెండ్స్‌ విజయానికి 7 రన్స్ దూరంలో ఆగిపోయింది. అయితే ఆల్-స్టార్ లెజెండ్స్‌ కెప్టెన్‌ ఇంజామామ్ ఉల్ హక్(46) టాప్ స్కోర‌ర్‌గా నిలిచాడు. దీంతో 6 పరుగుల తేడాతో పెషావర్ జల్మి టీమ్ గెలుపొందింది. కాగా ఆసియాకప్ 2025 సెప్టెంబర్ 9 నుంచి ప్రారంభం కానుంది. బాబర్ ఆజమ్, మహమ్మద్ రిజ్వాన్ లేకుండా పాకిస్థాన్ బరిలోకి దిగుతోంది. సెప్టెంబర్ 14న భారత్, పాక్ మ్యాచ్ జరగనుంది.