హనుమాన్ చాలీసా జేబులో పెట్టుకునే బ్యాటింగ్‌కు వెళ్తా: నితీశ్ రాణా

ఢిల్లీ ప్రీమియర్ లీగ్‌లో నితీశ్ రాణా సారథ్యంలోనే వెస్ట్ ఢిల్లీ లయన్స్ జట్టు ఫైనల్‌కు దూసుకెళ్లింది. ఎలిమినేటర్‌లో సౌత్ ఢిల్లీని ఓడించిన ఆ జట్టు.. తాజాగా రెండో క్వాలిఫయర్‌లో ఈస్ట్‌ ఢిల్లీని చిత్తు చేసి టైటిల్‌కు చేరువైంది. మరొక్క మ్యాచ్‌లో గెలిస్తే ఆ జట్టు డీపీఎల్ 2025 టైటిల్ సాధిస్తుంది. అయితే ఈ టోర్నీలో వెస్ట్‌ ఢిళ్లీ ఫైనల్ చేరేందుకు ముఖ్య కారణం ఆ జట్టు కెప్టెన్ నితీశ్ రాణా. ఈ టోర్నీలో విశేషంగా రాణిస్తున్న అతడు.. ఎలిమినేటర్‌లో సెంచరీ, రెండో క్వాలిఫయర్‌లో మ్యాచ్‌ విన్నింగ్ పర్ఫార్మెన్స్ ఇచ్చాడు.

ఇక రెండో క్వాలిఫయర్‌ మ్యాచ్ తర్వాత మాట్లాడిన నితీశ్ రాణా.. తన విజయానికి సీక్రెట్ ఏంటో చెప్పాడు. తాను బ్యాటింగ్ చేసేటప్పుడు జేబులో హనుమాన్ చాలీసా పెట్టుకుంటానని, దాని నుంచే తనకు శక్తి వస్తుందని నితీశ్‌ వెల్లడించాడు. “నాకు శక్తి అంతా హనుమాన్ చాలీసా వల్లే వచ్చింది. బజరంగ్ బలి అనుగ్రహమే నాకు మొదటి శతకం సాధించడానికి, ఇప్పుడు జట్టును ఫైనల్‌కు తీసుకురావడానికి కూడా కారణం. నేను బ్యాటింగ్‌ చేసేటప్పుడు జేబులో హనుమాన్ చాలీసా పెట్టుకుంటా. దీంతో నేను ఆటలో ఉండగా ఓ ప్రత్యేక శక్తి నాలో కలిసివచ్చినట్లు అనిపిస్తుంది,” అని తన మనసులోని మాటను చెప్పుకొచ్చాడు.

రెండో క్వాలిఫయర్ మ్యాచ్‌లో తొలుత బ్యాటింగ్ చేసిన ఈస్ట్‌ ఢిల్లీ రైడర్స్.. 20 ఓవర్లలో 8 వికెట్లు కోల్పోయి 140 పరుగులు చేసింది. అనంతరం నితీశ్ రాణా (26 బంతుల్లో 45 పరుగులు నాటౌట్‌)తో మరో 9 బంతులు ఉండగానే వెస్ట్ ఢిల్లీ లయన్స్ జట్టు గెలుపొందింది. దీంతో ఫైనల్‌కు దూసుకెళ్లింది. అంతకుముందు సౌత్‌ ఢిల్లీతో జరిగిన ఎలిమినేటర్‌లోనూ రాణా.. 55 బంతుల్లో 134 రన్స్ చేసి నాటౌట్‌గా నిలిచి జట్టును గెలిపించాడు. ఇక ఢిల్లీ ప్రీమియర్ లీగ్ 2025 తుది అంకానికి చేరుకుంది. ఫైనల్ మ్యాచ్‌ మాత్రమే మిగిలి ఉంది. ఈ మ్యాచ్‌లో వెస్ట్ ఢిల్లీ, సెంట్రల్ ఢిల్లీ కింగ్స్ జట్టు తలపడనున్నాయి.