భర్తను వదిలేసి యువకుడితో బిడ్డను కన్న మహిళ.. వీధికుక్కల మధ్య చెత్తకుప్పలో పసికందు

దేశంలో గత కొంతకాలంగా వివాహేతర సంబంధాలు పెరిగిపోతుండటం అనేక రకాల నేరాలకు కారణం అవుతున్నాయి. పెళ్లికి ముందు.. పెళ్లి తర్వాత ఇతరులతో సంబంధాలు పెట్టుకుని పురుషులు, మహిళలు కాపురాలు కూల్చేసుకుంటున్న ఘటనలు ఇటీవల బాగా పెరిగిపోవడం తీవ్ర ఆందోళనకు గురి చేస్తోంది. ఇక అవాంఛిత గర్భాలు రావడంతో.. పిల్లలు పుట్టిన తర్వాత వాష్‌రూంలు, చెత్త కుప్పలు, చెట్ల పొదల్లో పడేసి.. చేతులు దులుపుకుంటున్న ఘటనలు కూడా పెరిగిపోతున్నాయి. ఇలాంటి ఘటనే తాజాగా ఒకటి జరిగింది. భర్తను వదిలిపెట్టి.. యువకుడి ప్రేమలో పడిన ఓ వివాహిత.. బిడ్డకు జన్మనిచ్చింది. అది ఎవరికీ తెలియకూడదని.. పుట్టిన పసికందును చెత్తకుప్పలో పడేసింది. ఆ పసికందును చూసిన స్థానికులు.. ఆస్పత్రికి తరలించి పోలీసులకు ఫిర్యాదు చేయగా.. అసలు విషయం వెలుగులోకి వచ్చింది. మహారాష్ట్రలో జరిగిన ఈ సంఘటన తీవ్ర హృదయవిదారకంగా మారింది.

మహారాష్ట్రలోని ఛత్రపతి శంభాజీనగర్‌ జిల్లాలోని పుండలిక్ నగర్ పోలీస్ స్టేషన్ పరిధిలో గత నెల 29వ తేదీన ఈ దారుణం చోటు చేసుకుంది. స్థానికంగా ఉన్న ఓ చెత్త కుండీలో రాత్రిపూట పసికందు ఏడుపు శబ్దం వినిపించింది. ఆ సమయంలో అటు వైపు వెళ్తున్న ఓ యువకుడు.. ఆ ఏడుపు విని ఏంటా అని అక్కడికి వెళ్లి చూశాడు. ఒక సంచిలో పసికందు ఉండగా.. ఆ సంచిని వీధి కుక్కలు పీక్కుతినేందుకు పట్టి లాగుతున్నట్లు గుర్తించాడు. వెంటనే మిగిలిన వారికి విషయాన్ని చెప్పి.. పోలీసులకు సమాచారం అందించాడు. దీంతో వెంటనే ఘటనాస్థలికి చేరుకున్న పోలీసులు.. ఆ పసికందును హుటాహుటిన దగ్గర్లో ఉన్న ప్రభుత్వ ఆస్పత్రికి తరలించి చికిత్స అందించారు.

ఈ ఘటనపై కేసు నమోదు చేసుకుని దర్యాప్తు చేపట్టిన పోలీసులకు విస్తుపోయే విషయాలు వెలుగులోకి వచ్చాయి. ఒక మహిళ రాత్రి పూట.. ఆ పసికందును ఓ సంచిలో తీసుకొచ్చి ఆ చెత్తకుండీ వద్ద పడేసినట్లు గుర్తించారు. దీంతో ఆ మహిళను అదుపులోకి తీసుకుని ప్రశ్నించగా.. అసలు విషయం బయటికి వచ్చింది. తనకు పెళ్లి అయిందని.. కానీ భర్తతో దూరంగా ఉంటున్నట్లు తెలిపింది. అదే సమయంలో ఒక యువకుడితో వివాహేతర సంబంధం ఏర్పరుచుకోవడంతోనే.. తాను ప్రసవించినట్లు చెప్పింది. అయితే తాను గర్భవతి అనే విషయం బయటికి వస్తే.. ఇరుగు పొరుగు వాళ్లు ఏమనుకుంటారోనని భయపడిన ఆ మహిళ.. ఇంట్లోనే ప్రసవించింది.

ప్రసవం తర్వాత తానే స్వయంగా ఆ బిడ్డను తీసుకెళ్లి అక్కడ పడేసినట్లు పోలీసుల విచారణలో వెల్లడైంది. ఇక ఆ మహిళను అదుపులోకి తీసుకున్న పోలీసులు.. ఆమె ఇంట్లోనే ప్రసవించడంతో ఆరోగ్యం క్షీణించినట్లు గుర్తించారు. వెంటనే ఆ మహిళను ఘాటీ ఆస్పత్రికి తరలించి.. చికిత్స అందిస్తున్నట్లు వెల్లడించారు.