పిఠాపురం మాజీ ఎమ్మెల్యే వర్మకు ఇద్దరు గన్‌మెన్ల కేటాయింపు

గతేడాది జరిగిన ఆంధ్రప్రదేశ్ అసెంబ్లీ ఎన్నికల్లో తెలుగుదేశం-జనసేన-బీజేపీ కూటమి సీట్ల పంపకాల్లో భాగంగా.. పిఠాపురం నియోజకవర్గంలో సిట్టింగ్ ఎమ్మెల్యేగా ఉన్న ఎస్వీఎస్ఎన్ వర్మను కాదని.. జనసేనకు కేటాయించిన సంగతి తెలిసిందే. జనసేన పార్టీ తరఫున ఆ పార్టీ అధ్యక్షుడు పవన్ కళ్యాణ్ బరిలోకి దిగి.. ఎమ్మెల్యేగా విజయం సాధించారు. అయితే పవన్ కళ్యాణ్ గెలుపు కోసం పిఠాపురం నియోజకవర్గంలో వర్మ, ఆయన అనుచరులు, తెలుగుదేశం పార్టీ శ్రేణులు.. జనసేనతో కలిసి పనిచేశారు. ఈ నేపథ్యంలోనే తన సీటును పవన్ కళ్యాణ్ కోసం ఇచ్చిన వర్మకు.. ఏదైనా నామినేటెడ్ పోస్ట్ ఇస్తారనే ప్రచారం.. ఎన్నికల నుంచే సాగుతోంది. ఈ క్రమంలోనే తాజాగా కీలక పరిణామం చోటు చేసుకుంది.

ఎస్వీఎస్ఎన్ వర్మకు ఇద్దరు గన్‌మెన్లను (1+1) కేటాయిస్తూ.. చంద్రబాబు ప్రభుత్వం కీలక నిర్ణయం తీసుకుంది. తెలుగుదేశం పార్టీ సీనియర్‌ నేత, పిఠాపురం మాజీ ఎమ్మెల్యేగా ఉన్న వర్మకు ఇప్పుడు భద్రత కల్పించడంపై రకరకాల ఊహాగానాలు వెలువడుతున్నాయి. ఆయన తన సీటును త్యాగం చేసినందుకు.. కూటమి ప్రభుత్వం ఏదో ఒక పదవిని కట్టబెడుతుందనే చర్చ ఎప్పటినుంచో జరుగుతుండగా.. తాజాగా ఆయనకు గన్‌మెన్లను కేటాయించడం ఆసక్తికరంగా మారింది.

ఇక తనకు భద్రత కల్పించాలని వర్మ రాష్ట్ర ప్రభుత్వం దృష్టికి విషయాన్ని తీసుకెళ్లడంతో.. ప్రభుత్వం ఈ నిర్ణయం తీసుకున్నట్లు వార్తలు వస్తున్నాయి. మరోవైపు.. మాజీ ఎమ్మెల్యే వర్మ భద్రతకు సంబంధించి గన్‌మెన్‌లు అవసరమని.. కేటాయించాలని తాము ప్రభుత్వానికి ఎలాంటి రిపోర్ట్ ఇవ్వలేదని ఇంటెలిజెన్స్ అధికారులు చెబుతున్నారు. ఇక గురువారం రోజున ఇద్దరు గన్‌మెన్లు.. వర్మ వద్ద బాధ్యతలు తీసుకున్నట్లు తెలుస్తోంది.

ఇక ఇటీవలె ముఖ్యమంత్రి నారా చంద్రబాబు నాయుడును వర్మ కలిశారు. పిఠాపురం నియోజకవర్గంలోని పరిస్థితులు సహా ఇతర అంశాలపై సీఎంతో వర్మ చర్చించినట్లు సమాచారం. ఈ క్రమంలోనే చంద్రబాబుతో భేటీ తర్వాత.. ఇప్పుడు వర్మకు భద్రత కల్పించడం గమనార్హం. గత ఎన్నికల్లో పవన్ కళ్యాణ్ గెలుపు కోసం వర్మ తన వంతు కృషి చేయగా.. ఆయనకు ఏదైనా కీలక పదవి ఇస్తారనే చర్చ అప్పటినుంచో జోరుగా వినిపిస్తోంది. తాజా పరిణామాల నేపథ్యంలో వర్మకు ఏదైనా పోస్ట్ ఇస్తారా.. ఇస్తే అది ఏ రకమైంది అనేది చర్చకు దారి తీస్తోంది. అయితే గన్‌మెన్ల కేటాయింపుతో వర్మకు కేబినెట్ హోదా ర్యాంకు పదవి ఇస్తారనే ప్రచారం జరుగుతోంది.