జీఎస్టీ శ్లాబుల తగ్గింపుపై ప్రధాని మోదీ స్పందన

గూడ్స్ అండ్ సర్వీసెస్ ట్యాక్స్ (జీఎస్టీ) శ్లాబుల తగ్గింపుపై ప్రధానమంత్రి నరేంద్ర మోదీ తొలిసారి స్పందించారు. జీఎస్టీ కౌన్సిల్‌లో తీసుకున్న నిర్ణయంతో దేశంలోని సామాన్యులకు భారీ ఊరట కలుగుతుందని తాజాగా ప్రధాని మోదీ వివరించారు. సమయాన్ని బట్టి సంస్కరణలు తీసుకురావాల్సిన అవసరం ఉందని ప్రధానమంత్రి తెలిపారు. జీఎస్టీ శ్లాబుల సంస్కరణలతో దేశ ప్రజలకు.. కేంద్ర ప్రభుత్వం దీపావళి కానుక అందించిందని ప్రధాని అభివర్ణించారు. ఈ సందర్భంగా గతంలో దేశంలో అధికారంలో ఉన్న కాంగ్రెస్ పార్టీపై ప్రధాని మోదీ తీవ్ర స్థాయిలో విరుచుకుపడ్డారు.

జీఎస్టీలో తీసుకువచ్చిన సంస్కరణలు.. దేశ చరిత్రలోనే ఇదొక మైలు రాయి అని ప్రధాని మోదీ అభివర్ణించారు. దీని వల్ల దేశంలో నిత్యావసరాలు తగ్గి.. సామాన్యులకు మేలు కలుగుతుందని పేర్కొన్నారు. కాంగ్రెస్ పార్టీ హయాంలోనే దేశంలో పన్నులు అధికంగా ఉన్నాయని తెలిపారు. గతంలో పన్నుల పేరుతో కాంగ్రెస్ నేతలు.. దేశ ప్రజల సొమ్మును దోచుకున్నారని తెలిపారు. జీఎస్టీ సంస్కరణలతో భారతదేశ ఆర్థిక వ్యవస్థ మరింత బలోపేతం అవుతుందని వెల్లడించారు. ఈ ధంతేరస్ (ధనత్రయోదశి) దేశ ప్రజల జీవితాల్లో సరికొత్త వెలుగులు నింపుతుందని ప్రధాని తెలిపారు.

ఇక కాంగ్రెస్ పార్టీ.. గతంలో ప్రజల నెలవారీ బడ్జెట్‌ను ఎలా పెంచిందో ఎవరూ మర్చిపోలేరని.. చివరికి పిల్లలకు ఇచ్చే చాక్లెట్లపై కూడా వారు 21 శాతం పన్ను విధించేవారని గుర్తు చేశారు. మరోవైపు.. జీఎస్టీ అనేది స్వతంత్ర భారతదేశంలో తీసుకువచ్చిన అతిపెద్ద ఆర్థిక సంస్కరణల్లో ఒకటి అని ప్రధాని మోదీ అభివర్ణించారు. నిజానికి తాజాగా తీసుకున్న జీఎస్టీ సంస్కరణలు దేశానికి రెట్టింపు మద్దతును, వృద్ధిని అందిస్తాయని పేర్కొన్నారు. ఈ నిర్ణయంతో ఒకవైపు దేశంలోని సామాన్య ప్రజల డబ్బు ఆదా అవడమే కాకుండా.. దేశ ఆర్థిక వ్యవస్థ కూడా బలోపేతం అవుతుందని ప్రధానమంత్రి అన్నారు.

బుధవారం జరిగిన 56 జీఎస్టీ కౌన్సిల్ సమావేశంలో సంచలన నిర్ణయాలు తీసుకున్న సంగతి తెలిసిందే. ఇప్పటివరకు 5, 12, 18, 28 శాతం జీఎస్టీ శ్లాబులు ఉండగా.. ఇప్పుడు కేవలం 5, 18 శాతం శ్లాబులను మాత్రమే ఉంచి.. మిగిలిన 12, 28 శాతం శ్లాబుల్లో ఉన్న వస్తువులపై జీఎస్టీని తగ్గించారు. ఈ క్రమంలోనే 12, 28 శాతం జీఎస్టీ శ్లాబులను రద్దు చేస్తున్నట్లు జీఎస్టీ కౌన్సిల్ సమావేశం తర్వాత కేంద్ర ఆర్థిక శాఖ మంత్రి నిర్మలా సీతారామన్ వెల్లడించారు.