ఆ రోజు సచిన్ చెప్పిన మాట.. బ్రాడ్ హాగ్ జీవితంలో మరచిపోలేదు

క్రికెట్‌లో ప్రతి బౌలర్ తన ఫేవరెట్ మూమెంట్స్‌ను గుర్తుంచుకుంటాడు. అలాగే ప్రతి బ్యాటర్ ఒకసారి చేసిన తప్పులను మళ్లీ రిపీట్ చేయకూడదని అనుకుంటాడు. ఇలాంటిదే ఒక అరుదైన సంఘటన 2007లో హైదరాబాద్‌లోని రాజీవ్ గాంధీ అంతర్జాతీయ స్టేడియంలో భారత్ - ఆస్ట్రేలియా మధ్య జరిగిన వన్డే మ్యాచ్‌లో చోటుచేసుకుంది.

 ఆ మ్యాచ్‌లో ఆస్ట్రేలియా ఇచ్చిన 291 పరుగుల లక్ష్యాన్ని ఛేదించేందుకు భారత జట్టు బరిలోకి దిగింది. 27వ ఓవర్‌లో సచిన్ టెండూల్కర్ 43 పరుగుల వద్ద ఆస్ట్రేలియా చైనామన్ బౌలర్ బ్రాడ్ హాగ్ అద్భుతంగా బౌలింగ్ చేసి వికెట్‌ పడగొట్టాడు. సచిన్ లాంటి దిగ్గజ బ్యాటర్‌ని ఔట్ చేయడం ప్రతి బౌలర్‌కు కలలాంటిది. హాగ్ కూడా ఆ సన్నివేశాన్ని గుర్తుగా ఒక ఫోటోగా తీసుకొని, ఆ తర్వాత సచిన్ సంతకం చేయమని అభ్యర్థించాడు.

అయితే సచిన్ కేవలం సంతకం చేయడమే కాదు, ఆ ఫోటో కింద ఓ ప్రత్యేకమైన వాక్యం రాశాడు – “ఇది మళ్లీ జరగదు, హాగీ”. ఆ మాటలు తరువాత నిజమయ్యాయి. బ్రాడ్ హాగ్ మళ్లీ ఎప్పుడూ సచిన్ వికెట్‌ను తీసుకోలేకపోయాడు. హాగ్ తన చివరి వన్డే కూడా 2008లో ఆస్ట్రేలియా వేదికగా టీమిండియాపైనే ఆడటం విశేషం.

బ్రాడ్ హాగ్ ఇప్పటికీ ఆ ఫోటోను అత్యంత విలువైనది భావిస్తాడు. ఓ ఇంటర్వ్యూలో మాట్లాడుతూ “సచిన్ వంటి గొప్ప ఆటగాడి ఎదుట బౌలింగ్ చేయడం గౌరవం. ఆయన ఇచ్చిన మాట నిజమైంది. ఆ తరువాత ఎప్పుడూ ఆయన వికెట్ నాకు దక్కలేదు” అని పేర్కొన్నాడు.

ఆ రోజు మ్యాచ్‌లో యూవరాజ్ సింగ్ 121 పరుగులు సాధించి పోరాడినా భారత్ ఓడిపోయింది. అయితే సచిన్ ఇచ్చిన మాట క్రికెట్ చరిత్రలో ఒక మధురమైన జ్ఞాపకంగా నిలిచిపోయింది. సచిన్ టెండూల్కర్ తన కెరీర్‌లో 100 అంతర్జాతీయ శతకాలు సాధించి అపూర్వ రికార్డు సృష్టించాడు. మరొకవైపు హాగ్ ఆస్ట్రేలియా తరఫున ఏడు టెస్టులు, 123 వన్డేలు, 15 టీ20లు ఆడి 180 వికెట్లు తీసుకున్నాడు.