విజయ్ పార్టీతో పొత్తుపై అన్నామలై కీలక వ్యాఖ్యలు

తమిళ సూపర్‌స్టార్ విజయ్ రాజకీయ పార్టీ ‘తమిళగ వెట్రి కళగం’తో పొత్తు పెట్టుకునే అవకాశం ఉందంటూ వస్తున్న ఊహాగానాలకు బీజేపీ సీనియర్ నేత కె. అన్నామలై సోమవారం తెరదించారు. విజయ్‌తో పొత్తు పెట్టుకునే ప్రసక్తే లేదని ఆయన స్పష్టం చేశారు. తమిళనాడులో బీజేపీని విజయ్ ఎప్పుడూ ఒక ప్రత్యర్థిగానే చూస్తారని, అందుకే భవిష్యత్తులోనూ ఈ రెండు పార్టీలు కలిసే అవకాశం లేదని ఆయన తేల్చిచెప్పారు.‘ఇండియా టుడే కాన్‌క్లేవ్ సౌత్ 2025’ కార్యక్రమంలో పాల్గొన్న అన్నామలై ఈ కీలక వ్యాఖ్యలు చేశారు. "విజయ్‌తో పొత్తు సాధ్యమవుతుందని నేను అనుకోవడం లేదు. బీజేపీని ఒక సైద్ధాంతిక శత్రువుగా చూపించాలని ఆయన భావిస్తున్నారు. ఎందుకంటే తమిళనాడులో ఇప్పటికీ ఒక ఉత్తరాది పార్టీని వ్యతిరేకించాలనే భావన ఉంది" అని అన్నామలై వివరించారు. ఈ పరిస్థితుల్లో పొత్తుకు ఆస్కారం లేదని ఆయన పేర్కొన్నారు.కొన్ని వారాల క్రితం తమిళనాడు బీజేపీ ఉపాధ్యక్షురాలు ఖుష్బూ సుందర్.. అధికార డీఎంకేను ఓడించేందుకు బీజేపీ, అన్నాడీఎంకే కూటమితో చేతులు కలపాలని విజయ్‌కు బహిరంగంగా విజ్ఞప్తి చేసిన విషయం తెలిసిందే. అయితే, అన్నామలై వ్యాఖ్యలు దీనికి పూర్తి భిన్నంగా ఉండటం గమనార్హం. గతంలో మధురైలో జరిగిన సభలో విజయ్, అన్నాడీఎంకేను కూడా విమర్శించారని అన్నామలై గుర్తుచేశారు. "పరిస్థితులు ఇలా ఉన్నప్పుడు, కేవలం డీఎంకేను ఓడించడానికి మేమంతా ఏకతాటిపైకి రాగలమని నేను అనుకోవడం లేదు" అని ఆయన అన్నారు.యువ ఓటర్లలో విజయ్‌కు మంచి ఆదరణ ఉందని అంగీకరిస్తూనే, 2026 అసెంబ్లీ ఎన్నికల్లో ఎన్డీయే కూటమి తరఫున ముఖ్యమంత్రి అభ్యర్థిగా అన్నాడీఎంకే నేత పళనిస్వామికే తమ మద్దతు ఉంటుందని అన్నామలై పునరుద్ఘాటించారు. "తమిళనాడులో రాబోయేది తరాల మధ్య ఘర్షణ, సిద్ధాంతాల మధ్య పోరాటం. ప్రస్తుతం మా ప్రధాన లక్ష్యం అధికార డీఎంకేకు వ్యతిరేకంగా మా కూటమిని పటిష్టం చేసుకోవడమే" అని ఆయన స్పష్టం చేశారు.