తన ఇంటిని పాఠశాలగా మార్చిన రాఘవ లారెన్స్

ప్రముఖ నటుడు, కొరియోగ్రాఫర్ రాఘవ లారెన్స్ మరోసారి తన గొప్ప మనసు చాటుకున్నారు. తాను డ్యాన్స్ మాస్టర్‌గా కష్టపడి సంపాదించిన డబ్బుతో కొనుక్కున్న తొలి ఇంటినే పేద పిల్లల కోసం ఉచిత పాఠశాలగా మార్చుతున్నట్లు ప్రకటించి అందరి ప్రశంసలు అందుకుంటున్నారు. ఈ విషయాన్ని ఆయన సోషల్ మీడియా ద్వారా వెల్లడించారు.ప్రస్తుతం తాను నటిస్తున్న ‘కాంచన 4’ సినిమా కోసం తీసుకున్న అడ్వాన్స్ మొత్తంతో ఈ పాఠశాల పనులు ప్రారంభిస్తున్నట్లు లారెన్స్ తెలిపారు. ఈ ఇల్లు తనకు ఎంతో ప్రత్యేకమైనదని ఆయన పేర్కొన్నారు. "డ్యాన్స్ మాస్టర్‌గా పనిచేస్తున్న రోజుల్లో నేను దాచుకున్న డబ్బుతో కొన్న మొదటి ఇల్లు ఇది. మొదట దీనిని అనాథ పిల్లల కోసం ఆశ్రమంగా మార్చాను. ఇప్పుడు అదే ఇంటిని పేద పిల్లల చదువు కోసం పాఠశాలగా మారుస్తున్నాను" అని లారెన్స్ వివరించారు.ఈ సేవా కార్యక్రమంలో మరో గర్వించదగ్గ విషయం ఉందని ఆయన తెలిపారు. తాను పెంచి చదివించిన పిల్లలలో ఒకరు ఇప్పుడు టీచర్‌గా మారి, ఇదే పాఠశాలలో తొలి ఉపాధ్యాయురాలిగా చేరబోతున్నారని చెప్పడం తనకు మరింత ఆనందాన్ని ఇస్తోందన్నారు. "సేవే దైవం అనే నమ్మకంతో ముందుకు వెళ్తున్నాను. మీ అందరి ఆశీస్సులు నాకు ఎప్పుడూ ఉండాలి" అని ఆయన కోరారు.ఇటీవలే రాఘవ లారెన్స్ చెన్నై లోకల్ రైళ్లలో స్వీట్లు అమ్ముతూ జీవనం సాగిస్తున్న 80 ఏళ్ల రాఘవేంద్ర అనే వృద్ధుడికి లక్ష రూపాయల ఆర్థిక సాయం అందిస్తానని ప్రకటించారు. ఆయన వివరాలు తెలిస్తే తెలియజేయాలని, రైళ్లలో కనిపిస్తే స్వీట్లు కొని ఆయన్ను ఆదుకోవాలని ప్రజలను అభ్యర్థించారు. లారెన్స్ సేవా గుణంపై అభిమానులు, నెటిజన్లు ప్రశంసల వర్షం కురిపిస్తున్నారు.