3 నిమిషాల్లోనే విరిగిన ఎముకలు అతుక్కుంటాయి.. ఒకటే ఇంజక్షన్, బోన్ గ్లూతో

ఏదైనా ప్రమాదంలో ఎముకలు విరిగితే.. తిరిగి అవి అతుక్కుని మామూలు స్థితికి రావాలంటే చాలా సమయం పడుతుంది. కొన్ని సార్లు 6 నెలలు, ఏడాది కూడా పడుతుంది. ఇక ఎముకలు విరిగినపుడు.. వాటిని అతికించేందుకు డాక్టర్లు గంటల తరబడి కష్టపడి ఆపరేషన్లు చేస్తూ ఉంటారు. కొన్నిసార్లు పరిస్థితి విషమించినపుడు.. మరిన్ని సమస్యలు తలెత్తుతాయి. అయితే ఎముకలు విరిగినపుడు తలెత్తే ఇలాంటి సమస్యలకు చైనా శాస్త్రవేత్తలు చెక్ పెట్టారు. ఎన్నో పరిశోధనల తర్వాత విరిగిన ఎముకలను అతికించేందుకు సరికొత్త బోన్ గ్లూ ను తయారు చేసి.. దాన్ని ఆవిష్కరించారు. కేవలం ఒక ఇంజక్షన్ ద్వారా.. ఈ బోన్ గ్లూను మనిషి శరీరంలోకి పంపించి.. విరిగిన ఎముకలను కేవలం 3 నిమిషాల్లోనే అతికించవచ్చని పరిశోధకులు వెల్లడించారు. అయితే ఈ బోన్ గ్లూ తయారు చేసేందుకు.. ఆల్చిప్పలను స్ఫూర్తిగా తీసుకున్నట్లు తెలిపారు.

తూర్పు చైనా లోని షెజాంగ్ ప్రావిన్స్‌లో బోన్‌ 02 అనే బోన్‌ గ్లూను చైనా శాస్త్రవేత్తలు తాజాగా ప్రపంచానికి పరిచయం చేశారు. ఈ బోన్‌ గ్లూతో విరిగిన ఎముకలను మూడు నిమిషాల్లోనే అతికించవచ్చని షెజాంగ్‌ స్థానిక మీడియా వెల్లడించింది. ఇక ఈ బోన్ గ్లూ ఎలా పనిచేస్తుంది అనేదాన్ని అసోసియేట్ చీఫ్ ఆర్థోపెడిక్ సర్జన్, పరిశోధనా బృందం నాయకుడు లిన్‌ షాన్‌ఫింగ్ వివరించారు. తాజాగా డెవలప్ చేసిన ఈ బోన్ గ్లూ.. 3 నిమిషాల్లోనే ఎముకను సరి చేస్తుందని తెలిపారు. రక్తం వేగంగా ప్రవాహించే ప్రాంతాల్లోనూ ఈ బోన్ గ్లూ మెరుగ్గా పనిచేస్తుందని తెలిపారు.

సాధారణంగా విరిగిన ఎముకలు అతికించాలంటే.. శరీరంపై పెద్దగా కోసి.. అక్కడ స్టీల్‌ ప్లేట్లను అమర్చుతారు. కానీ తాము కొత్తగా తయారు చేసిన ఈ ఇంజెక్షన్‌తో అలాంటి అవసరం ఉండదని తేల్చి చెప్పారు. ఇక ఈ బోన్‌ 02 గ్లూను ల్యాబ్‌లో కూడా టెస్ట్ చేయగా.. సమర్థవంతంగా పని చేసినట్లు వెల్లడైంది. దీంతో సంప్రదాయ వైద్యంలో మెటల్ ఇంప్లాంట్లు వేసే స్థానంలో దీన్ని ఉపయోగించవచ్చని పేర్కొంటున్నాయి. ఇక ఈ బోన్ గ్లూతో బాడీ రియాక్షన్లు, ఇన్‌ఫెక్షన్లు కూడా తగ్గుతాయని చెబుతున్నారు. ఎముక అతుక్కున్న తర్వాత.. ఆ బోన్ గ్లూ శరీరంలో కలిసిపోతుందని తెలిపారు. దీని వల్ల రెండోసారి ఆపరేషన్ చేయాల్సిన అవసరం లేదని వెల్లడించారు. నీటి అడుగున బ్రిడ్జిలకు గట్టిగా అతుక్కునే ఆల్చిప్పలను ప్రేరణగా తీసుకుని.. ఈ బోన్‌ గ్లూను డెవలప్ చేసినట్లు చెప్పారు.