వంట మనిషిపై.. దారుణానికి తెగబడ్డ పదో తరగతి విద్యార్థులు
Crime | Suryaa Desk | Published : Sun, Sep 14, 2025, 09:02 PM
స్కూల్లో మద్యం ఎందుకు తాగుతున్నారని ప్రశ్నించినందుకు వంట మనిషిపై విద్యార్థులు దాడిచేసి తీవ్రంగా కొట్టారు. ఈ సంఘటన మండలంలోని గొల్లనపల్లి ఎస్సీ బాలుర హాస్టల్లో శనివారం చోటు చేసుకుంది. స్థానికులు తెలిపిన వివరాల ప్రకారం.. గొల్లనపల్లి గ్రామ సమీపంలో ఉన్న జెడ్పీ హైస్కూల్ ఆవరణలోని ఎస్సీ బాలుర హాస్టల్లో 6 నుంచి 10వ తరగతి విద్యార్థులు ఉంటున్నారు. కొంత మంది విద్యార్థులు శనివారం సాయంత్రం హాస్టల్ భవనంపై కూర్చొని మద్యం తాగుతున్నారు. ఆ సమయంలో హాస్టల్లో పని చేస్తున్న గొల్లనపల్లికి చెందిన కాశిమ్మ అనే వంట మనిషి విద్యార్థులను చూసింది. స్కూల్ ఆవరణలో ఇలాంటి పనులేంటని ప్రశ్నించింది. ఈ విషయాన్ని హాస్టల్ వార్డెన్కు చెబుతానని హెచ్చరించి వంట చేసేందుకు కిందకు వెళ్లింది.విద్యార్థులు కొద్ది సేపటి తర్వాత వంట గదిలో కూరగాయలు కోస్తున్న కాశిమ్మపై దుప్పటి కప్పి తీవ్రంగా దాడి చేశారు. గొంతు నులిమి హత్య చేసే ప్రయత్నం చేశారు. ఈ క్రమంలో ఆమె అపస్మారక స్థితికి చేరుకోవడంతో విద్యార్థులు వెళ్లిపోయారు. కొద్దిసేపటికి తేరుకున్న కాశిమ్మ విషయాన్ని ఫోన్లో కుటుంబ సభ్యులకు తెలిపింది. వారు వైద్య చికిత్స నిమిత్తం ఆమెను గన్నవరం ప్రభుత్వ ఆస్పత్రికి తరలించారు. ఈ ఘటనపై పోలీసులు విచారణ జరుపుతున్నారు. సుమారు ఏడుగురు విద్యార్థులు తనపై దాడిచేసినట్లుగా కాశిమ్మ ఫిర్యాదు చేసిందని పోలీసులు తెలిపారు.
|
|