ఉబర్ హెలికాప్టర్లు వచ్చేస్తున్నాయ్.. ఇక గాల్లో రయ్ మంటూ ఎగిరిపోవచ్చు

ఇప్పటివరకు నగరాలు, పెద్ద పెద్ద పట్టణాలు అయితే ఒక ప్రాంతం నుంచి మరో ప్రాంతానికి వెళ్లాలంటే బైక్, ఆటో, కార్ల కోసం రకరకాల ట్యాక్సీ యాప్‌లు అందుబాటులో ఉన్నాయి. ఓలా, ఉబర్ , ర్యాపిడో సహా పలు సంస్థలు ఈ అవకాశాలను నగరవాసులకు కల్పిస్తున్నాయి. అరచేతిలో ఉన్న సెల్‌ఫోన్‌లో మనకు కావాల్సిన వాహనాన్ని బుక్ చేసుకుంటే.. క్షణాల్లో మన ముందు వచ్చి వాలిపోతుంది. ఇక సొంతంగా ఓ వాహనాన్ని మాట్లాడుకుని అద్దెకు తీసుకుంటే.. ఖర్చులు తడిసిమోపెడు అవుతూ ఉంటాయి. కానీ ఇలాంటి యాప్స్ మాత్రం అందుబాటు ధరల్లోనే నగరాల్లో నగరవాసులకు మంచి ప్రయాణ అనుభూతిని అందిస్తున్నాయి. అయితే త్వరలోనే హెలికాప్టర్ ట్యాక్సీలను వినియోగదారులకు అందుబాటులోకి తీసుకువచ్చేందుకు ఉబర్ సంస్థ సన్నాహాలు చేస్తోంది. ఇప్పటికే ఇటలీలో ఉబర్ హెలికాప్టర్ సేవలను ప్రారంభించింది.

ట్యాక్సీ కంపెనీల్లో దిగ్గజ కంపెనీగా కొనసాగుతున్న ఉబర్‌.. 2026లో హెలికాప్టర్ ట్యాక్సీ సేవలను అందుబాటులోకి తీసుకువచ్చేందుకు సన్నాహాలు చేస్తోంది. ఉబర్ యాప్‌లో హెలికాప్టర్ బుక్ చేసుకునేందుకు అవకాశం కల్పించనుంది. త్వరలోనే ఉబర్ సంస్థ ఆకాశంలోనూ తన సేవలను విస్తరించనుంది. ఇందుకోసం ఎలక్ట్రిక్ ఎయిర్ ట్యాక్సీల తయారీ సంస్థ అయిన జాబీ ఏవియేషన్ సంస్థతో ఒక ఒప్పందాన్ని కుదుర్చుకుంది. జాబీ ఏవియేషన్ సహకారంతో వచ్చే ఏడాది నుంచే ఉబర్ యాప్ ద్వారా కస్టమర్లకు హెలికాప్టర్ రైడ్‌లను అందుబాటులోకి తీసుకురానుంది.

మరోవైపు.. జాబీ ఏవియేషన్ సంస్థ.. ఇటీవలె బ్లేడ్ ఎయిర్ మొబిలిటీ సంస్థను కొనుగోలు చేసింది. ఈ సంస్థ ఇప్పటికే అమెరికాలోని న్యూయార్క్ సహా పలు నగరాల్లో హెలికాప్టర్, సీప్లేన్ సర్వీసులను అందిస్తోంది. తాజాగా జాబీ ఏవియేషన్, ఉబర్ మధ్య కుదిరిన సరికొత్త ఒప్పందం ప్రకారం.. ప్రయాణికులు ఉబర్ యాప్‌లోనే నేరుగా హెలికాప్టర్ ట్యాక్సీలను బుక్ చేసుకోవచ్చని సంబంధిత వర్గాలు చెబుతున్నాయి.

అయితే మొట్టమొదట.. పలు నగరాల్లో ఉండే ఎయిర్‌పోర్టుల దగ్గరి నుంచి నగరంలోని ఇతర ప్రాంతాలకు ఈ హెలికాప్టర్ ట్యాక్సీ సేవలను ప్రారంభించే అవకాశాలు ఉన్నట్లు ఉబర్ వర్గాల ద్వారా తెలుస్తోంది. ఇక ఈ హెలికాప్టర్ ట్యాక్సీలకు సంబంధించిన ధరలు ఇంకా ఖరారు చేయలేదు. ఇప్పటికే న్యూయార్క్‌లో బ్లేడ్ సంస్థ మ్యాన్‌హాటన్ నుంచి జాన్ ఎఫ్ కెన్నడీ ఇంటర్నేషనల్ ఎయిర్‌పోర్టుకు హెలికాప్టర్ ట్యాక్సీ సర్వీసులను అందిస్తోంది. ఇందుకోసం ఒక్కో ప్రయాణికుడి నుంచి 195 డాలర్లు అంటే రూ.17200 వసూలు చేస్తోంది.

ఇక తాజాగా జాబీ ఏవియేషన్-ఉబర్ మధ్య కుదిరిన ఒప్పందం.. ప్రపంచవ్యాప్తంగా విమాన ప్రయాణ రంగంలో ఒక కొత్త శకానికి నాంది పలకనుందని జాబీ ఏవియేషన్ సీఈఓ జోబెన్ బెవిర్ట్ ఆశాభావం వ్యక్తం చేశారు. గతంలో ఈ హెలికాప్టర్ ట్యాక్సీ సర్వీస్ కేవలం ఇటలీలో మాత్రమే అందుబాటులోకి తీసుకొచ్చింది. ఈ నేపథ్యంలోనే ఇప్పుడు అత్యధిక జనాభా కలిగిన నగరాల్లో ఈ హెలికాప్టర్ ట్యాక్సీ సేవలను అందుబాటులోకి తీసుకురావాలని ఉబర్ సంస్థ ప్రయత్నాలు చేస్తోంది.