నెతన్యాహూ జాగ్రత్త, ఖతార్ మా మిత్రదేశం.. దాడి చేశావో?: ట్రంప్ వార్నింగ్

గత వారం గాజాలో కాల్పుల విరమణ కోసం అమెరికా చేసిన ప్రతిపాదనలపై చర్చించేందుకు దోహాలో సమావేశం అయిన హమాస్ నేతలపై సమ్మిట్ ఆఫ్ ఫైర్ పేరుతో ఇజ్రాయెల్ విరుచుకుపడ్డ విషయం అందరకీ తెలిసిందే. అయితే ఈ దాడుల్లో ఖతార్ భద్రతా అధికారి సహా ఆరుగురు ప్రాణాలు కోల్పోయారు. తాజాగా దీనిపై అగ్రరాజ్యం అమెరికా అధ్యక్షుడు డొనాల్డ్ ట్రంప్ స్పందించారు. తమ దేశానికి కీలక మిత్రదేశంగా ఉన్న ఖతార్ పట్ల చాలా జాగ్రత్తగా వ్యవహరించాలని ఇజ్రాయెల్ ప్రధాని బెంజమిన్ నెతన్యాహుకు హెచ్చరికలు జారీ చేశారు. ముఖ్యంగా ఈ దాడులు లక్ష్యాలను ఛేదించడంలో విఫలం అయ్యాయని.. కానీ ఆరుగురి ప్రాణాలను మాత్రం తీశాయంటూ వ్యాఖ్యానించారు.

మోరిస్టౌన్ విమానాశ్రయంలో ట్రంప్ విలేకరులతో మాట్లాడారు. ఈ సమయంలోనే ఆయనకు మీడియా ప్రతినిధులు ఓ ప్రశ్న అడిగారు. ముఖ్యంగా ఈ దాడుల గురించి ఇజ్రాయెల్ ప్రధాని బెంజమిన్ నెతన్యాహుకు ఏమైనా చెప్పాలనుకుంటున్నారా అని ప్రశ్నించారు. దీనికి ట్రంప్ సమాధానం చెబుతూ.. వారు చాలా జాగ్రత్తగా ఉండాలని అన్నారు. హమాస్ విషయంలో ఏదైనా చర్య తీసుకోవాల్సి ఉంటుందని, కానీ ఖతార్ అమెరికాకు గొప్ప మిత్ర దేశం అని పేర్కొన్నారు. ఈ విషయం చాలా మందికి తెలియదని చెప్పారు.

  ట్రంప్ ఈ వ్యాఖ్యలు చేయడానికి కొన్ని రోజుల ముందు ఆయన న్యూయార్క్‌లో ఖతార్ ప్రధాని షేక్ మహమ్మద్ బిన్ అబ్దుల్ రహమాన్ బిన్ జస్సిమ్ అల్ థానీతో విందులో పాల్గొన్నారు. అప్పుడే ఖతార్ ప్రధానిని గొప్ప వ్యక్తిగా అభివర్ణించిన ట్రంప్.. ఆయనకు దేశ ప్రతిష్టను మెరుగుపరచుకోవాలని సలహా ఇచ్చానట్లు చెప్పారు. ప్రజలు ఖతార్ గురించి చాలా చెడుగా మాట్లాడుతున్నారని.. కానీ అలా ఉండకూడదని పేర్కొన్నారు. న్యూయార్క్‌లో సెప్టెంబర్ 11 దాడుల జ్ఞాపకార్థం జరిగిన ఈ విందులో మధ్య ప్రాచ్య ప్రత్యేక ప్రతినిధి స్టీవ్ విట్కాఫ్ కూడా పాల్గొన్నారు. విందు తరువాత ఖతార్ డిప్యూటీ చీఫ్ ఆఫ్ మిషన్ హమాహ్ అల్-ముఫ్తా ఎక్స్ వేదికగా.. అధ్యక్షుడితో గొప్ప విందు అని అన్నారు. అదిప్పుడే ముగిసిందని చెప్పుకొచ్చారు.

ఖతార్ రాజధాని దోహాలో జరిగిన ఇజ్రాయెల్ వైమానిక దాడిలో హమాస్ నాయకులు సురక్షితంగా బయటపడగా.. ఆరుగురు వ్యక్తులు మరణించారు. ఈ దాడిని ఖతార్ "రాజకీయ ఉగ్రవాదం"గా అభివర్ణించింది. ఈ దాడిపై ట్రంప్ ఇప్పటికే ఆందోళన వ్యక్తం చేశారు. వైట్ హౌస్‌లో విలేకరులతో మాట్లాడుతూ.. ఈ దాడి గాజాలో సున్నితమైన కాల్పుల విరమణ ప్రయత్నాలను దెబ్బతీస్తుందని ఆయన హెచ్చరించారు. "ఈ మొత్తం పరిస్థితి పట్ల నాకు ఏ మాత్రం సంతోషంగా లేదు. ఇది మంచి పరిస్థితి కాదు" అని అన్నారు. బంధీలను తిరిగి తీసుకురావాలని మేము కోరుకుంటున్నామన్నారు. కానీ ఈ దాడి జరిగిన తీరు పట్ల మేము సంతోషంగా లేమని చెప్పుకొచ్చారు. అలాగే భవిష్యత్తులో ఇలాంటి సంఘటనలు పునరావృతం కాకుండా చూస్తామని ఖతార్‌కు ట్రంప్ హామీ ఇచ్చారు.