పేకాట స్థావరంపై పోలీసుల దాడిలో.... పాపం చివరకు

మరణం ఎప్పుడు, ఎక్కడ, ఎలాంటి రూపంలో వస్తుందో ఎవ్వరూ ఊహించలేరు. ఒక్క క్షణం ముందు సాదాసీదా ఆటగా అనిపించిన పేకాట, రాజన్న సిరిసిల్ల జిల్లాలోని ఒక కుటుంబానికి తీవ్ర నష్టాన్ని మిగిల్చింది. ఎల్లారెడ్డిపేట మండలం వెంకటాపూర్ శివారులో జరిగిన పోలీసుల దాడి.. స్థానికంగా చాకలి రాజయ్య అనే 55 ఏళ్ల వ్యక్తి ప్రాణాలు తీసింది. ఆ రోజు సాయంత్రం.. పేకాట స్థావరంపై అకస్మాత్తుగా పోలీసులు దాడి చేయగా భయంతో అక్కడున్నవారు తమను తాము కాపాడుకునే ఉద్దేశంతో పరుగులు తీశారు. వారిలో గుండె వ్యాధితో బాధపడుతున్న రాజయ్య కూడా ఉన్నాడు. మానేరు వాగు ఒడ్డునకు చేరుకునేలోపే అతని శ్వాస ఆడక కుప్పకూలిపోయాడు. అక్కడే చలించిపోయిన శరీరం.. కళ్ల ముందే ప్రాణం విడిచిపెట్టిన దృశ్యం చూసిన వారంతా షాక్‌కి గురయ్యారు.

  కుటుంబానికి ఇది మరింత భరించలేని దెబ్బ. సాధారణంగా కూలీ పనులు చేసుకుంటూ బతికే రాజయ్య, కుటుంబానికి అండగా డేవాడు. ఒక్కసారిగా ఆయన లేని లోటు భార్యకు, పిల్లలకు తీవ్ర శోకాన్ని మిగిల్చింది. ఇంటి ముందు కూర్చుని గుండెలవిసేలా విలపిస్తున్న భార్య వేదన, మౌనంగా కన్నీటి ధారలు కారుస్తున్న బంధులవుల బాధ ప్రతి ఒక్కరి హృదయాన్ని తాకింది.

పోలీసుల దాడి కారణంగా ఆటను ఆపి పారిపోవడం సహజమే కానీ.. ఆ ఒక్క క్షణం నిర్ణయం రాజయ్య ప్రాణాలు బలిగొంది. బతికే ప్రయత్నంలో మరణం దారిలో ఎదురొచ్చింది. గ్రామం మొత్తం శోకసంద్రంలో మునిగిపోయింది. అంత్యక్రియల సమయంలో ప్రతి ఒక్కరి కళ్లలో ఒకే ప్రశ్న – “ఇలా జరిగి ఉండాల్సింది కాదు..? పోలీసుల దాడిలో అతడు పారపోకుండా.. అక్కడ పోలీసులకు దొరికినా బాగుండేది.. ప్రాణాలు అయినా దక్కేవి అని చర్చించుకుంటున్నారు.

ఇదిలా ఉండగా.. హైదరాబాద్‌లోని కోకాపేటలో భార్య చేతిలో భర్త దారుణంగా హత్యకు గురయ్యాడు. అసోంకు చెందిన భార్యభర్తలు కృష్ణ జ్యోతి బోరా, భరత్ బోరా కూలీలుగా జీవనం సాగిస్తున్నారు. గత కొంతకాలంగా భర్త తనను వేధిస్తున్నాడని ఆరోపిస్తూ, గురువారం రాత్రి జరిగిన ఘర్షణలో కృష్ణ జ్యోతి కోపంతో కూరగాయల కత్తితో భరత్‌పై దాడి చేసింది. తీవ్రంగా గాయపడిన భరత్ అపస్మారక స్థితిలోకి వెళ్లిపోవడంతో.. స్థానికులు వెంటనే ఆసుపత్రికి తరలించారు. అక్కడ చికిత్స పొందుతూ అతడు మరణించాడు. ఈ ఘటనపై నార్సింగీ పోలీసులు నిందితురాలు కృష్ణ జ్యోతిని అరెస్టు చేసి కేసు దర్యాప్తు చేస్తున్నారు.