ఎక్స్‌లో నగ్న వీడియోలతో ట్రాప్,,,రూ.3.8 కోట్లు కొల్లగొట్టిన గ్యాంగ్

ఈజీ మనీకి అలవాటు పడిన చాలా మంది అడ్డదారులు తొక్కుతున్నారు. సులభంగా డబ్బులు సంపాదించేందుకు ఎంతకైనా దిగజారుతున్నారు. తాజాగా.. తెలంగాణకు చెందిన దంపతులు భారీ స్కాంకు తెరలేపారు. ఏపీకి చెందిన ఒక వ్యక్తి నుంచి ఏకంగా రూ.3.8 కోట్లు కొల్లగొట్టారు. ట్విట్టర్ (X)లో నగ్న వీడియోలు పంపించి.. ఆ తర్వాత వీడియో కాల్స్ ద్వారా ట్రాప్ చేసి మోసం చేశారు. ఈ మేరకు నాగర్ కర్నూలు జిల్లాకు చెందిన ముగ్గురిని ఏపీ పోలీసులు అరెస్ట్ చేశారు.

కర్నూలు పోలీసులు తెలిపిన వివరాల ప్రకారం.. నాగర్ కర్నూల్ జిల్లా కల్వకుర్తి పట్టణానికి చెందిన చిక్కిరి మల్లేష్, అతని భార్య పెరుమాళ్ల మేరీ, వారి స్నేహితురాలు మొల్లం మల్లిక అలియాస్ లిల్లీ ఈజీగా డబ్బు సంపాదించేందుకు స్కెచ్ వేశారు. వీరు 'సంయుక్త రెడ్డి' అనే పేరుతో ట్విట్టర్ ఖాతా తెరిచి.. కర్నూలుకు చెందిన ఒక వ్యక్తికి నగ్న వీడియోలు పంపించారు. ఆ తర్వాత ఒక మహిళతో నగ్న వీడియో కాల్స్ మాట్లాడించారు. ఈ విధంగా ఆ వ్యక్తిని ట్రాప్ చేసి పూర్తిగా తమ వలలో వేసుకున్న తర్వాత.. తక్కువ ధరకే పొలాలు, స్థలాలు అమ్ముతామని నమ్మించారు. ఆ వ్యక్తిని మోసం చేయడంలో నిందితులు ఏమాత్రం సందేహించలేదు. రెండేళ్ల కాలంలో దశలవారీగా అతని నుంచి రూ.3.8 కోట్లు వసూలు చేశారు. చివరకు తాను మోసపోయానని గ్రహించిన బాధితుడు పోలీసులను ఆశ్రయించాడు.

పోలీసుల దర్యాప్తులో ఈ మోసం వెలుగులోకి వచ్చింది. ఈ మేరకు నాగర్ కర్నూలు జిల్లాలో ముగ్గురు నిందితులను పోలీసులు అరెస్టు చేశారు. నిందితులు తాము డిగ్రీ చదువుకున్నామని.. సులభంగా డబ్బు సంపాదించాలనే ఉద్దేశంతో ఈ అడ్డదారులు తొక్కామని ఒప్పుకున్నారు. కొల్లగొట్టిన మొత్తం రూ.3.8 కోట్లలో.. రూ.41.26 లక్షలతో రెండు కార్లు, ఒక బైక్, బంగారు ఆభరణాలు కొనుగోలు చేసినట్లు తెలిపారు. మిగిలిన రూ.3.38 కోట్లను జల్సాలు, ఇతర వ్యక్తిగత అవసరాలకు ఖర్చు చేసినట్లు వెల్లడించారు. ఈ ఘటనతో సోషల్ మీడియాలో అపరిచితుల పట్ల జాగ్రత్తగా ఉండాలని పోలీసులు హెచ్చరిస్తున్నారు. ఏవైనా అనుమానాస్పందంగా ఉంటే వెంటనే పోలీసులను ఆశ్రయించాలని సూచిస్తున్నారు.