అమ్మాయిలా గెటప్ మార్చి, ఫ్రెండ్ ఇంట్లో చోరీ

లోన్ యాప్ ద్వారా అప్పులు తీసుకొని.. అవసరాలకు వాడుకున్నాడు. ఆ తర్వాత తిరిగి చెల్లించడానికి చేతిలో డబ్బులు లేవు. ఈ మాట చెబితే లోన్ యాప్స్ వాళ్లు ఊరుకోరు కదా. దీంతో ఎలాగైనా సరే డబ్బులు సంపాదించాలని అనుకున్నాడు. కష్టపడి సంపాదిస్తే వచ్చే డబ్బుతో అప్పులు తీర్చాలంటే చాలా టైం పడుతుంది. కాబట్టి చోరీలైతే బెటర్ అనే అభిప్రాయానికి వచ్చాడు. బయట దొంగతనాలు చేయడం కష్టం కాబట్టి.. తెలిసివాళ్ల ఇంట్లో అయితే బెటర్ అనుకున్నాడు. ఇదే సమయంలో ఓ మిత్రుడు.. మామా, ఇంట్లో వాళ్లమంతా ఊరెళ్తున్నాం రా అని ఓ మాట చెప్పాడు. ఇంకేం లడ్డూ లాంటి అవకాశం కావడంతో పక్కా ప్లాన్‌తో ఫ్రెండ్ ఇంట్లో చొరబడి దొంగతనం చేశాడు. అంతా బాగానే చేశాడు, కానీ అతి జాగ్రత్త కారణంగా పోలీసులకు దొరికిపోయాడు. ఈ ఘటన వివరాల్లోకి వెళ్తే..

హైదరాబాద్‌లోని బంజారాహిల్స్‌ రోడ్ నంబర్ 10లో నివాసం ఉండే శివరాజ్ కుమారుడు, లింగపల్లిలో టెక్నీషియన్‌గా పని చేసే హర్షిత్ స్నేహితులు. శివరాజ్‌కు జీవీకే చౌరస్తాలో పానీపూరీ బండి ఉంది. అయితే ఇటీవల బంధువుల్లో ఒకరికి ఆరోగ్యం బాగోలేదని తెలియడంతో శివరాజ్, కుటుంబసభ్యులు కలిసి నిజామాబాద్ వెళ్లారు. ఈ విషయం హర్షిత్‌కు తెలిసింది. అప్పటికే అప్పులు తీర్చే దారి కోసం ఆలోచిస్తున్న హర్షిత్.. తన స్నేహితుడి ఇంట్లో చోరీకి ప్లాన్ వేశాడు.

పోలీసులు గుర్తించకుండా ఉండేందుకు పంజాబీ డ్రెస్‌తో లేడీ గెటప్‌లోకి మారి.. శివరాజ్ ఇంటి తాళం పగులగొట్టాడు. ఆ తర్వాత ఇంట్లో ఉన్న విలువైన బంగారు ఆభరణాలు, నగదు తీసుకొని వెళ్లిపోయాడు. సెప్టెంబర్ 18న తిరిగి ఇంటికొచ్చిన శివరాజ్.. ఇంటి తాళం పగలగొట్టి ఉండటం, ఇంట్లో వస్తువులంతా చిందర వందరగా పడి ఉండటంతో ఆందోళన చెందాడు. ఇంట్లో దాచిన 8 బంగారు ఆభరణాలు, లక్ష రూపాయలకుపైగా నగదు కనిపించలేదు. దీంతో దొంగతనం జరిగిందని నిర్ధారించుకొని పోలీసులకు ఫిర్యాదు చేశాడు.

రంగంలోకి దిగిన పోలీసులు విచారణలో భాగంగా శివరాజ్ ఇంటికి దగ్గరున్న కెమెరాలను పరిశీలించగా.. ఒక మహిళ అతడి ఇంటివైపు వెళ్లినట్టు కనిపించింది. ముఖం మాత్రం సరిగా కనిపించలేదు. దీంతో ఆ ఏరియాలో మరిన్ని సీసీటీవీ ఫుటేజీలను పరిశీలించాలని భావించారు. దగ్గర్లో ఉన్న ఓ వ్యాపార సంస్థకు వెళ్లి.. సీసీటీవీ ఫుటేజీ చూడబోయారు.

అయితే అప్పటికే ఓ వ్యక్తి పోలీసు డిపార్ట్‌మెంట్ నుంచి వచ్చానని చెప్పి సీసీటీవీ ఫుటేజీ చెక్ చేశాడని పోలీసులకు ఆ వ్యాపారి చెప్పాడు. ఎవరు వచ్చారు, ఏం టైంకి వచ్చారు అని అడిగి.. సీసీటీవీ ఫుటేజీ చూడగా.. అక్కడికి వచ్చింది శివరాజ్ కుమారుడి స్నేహితుడు హర్షిత్ అని తెలిసింది. దీంతో అతణ్ని పట్టుకొని ప్రశ్నించగా.. దొంగతనం చేసింది తానేనని అంగీకరించాడు.

ఇంతకూ హర్షిత్ ఆ వ్యాపారి దగ్గరకు ఎందుకు వెళ్లాడని అనుకుంటున్నారా? సీసీటీవీ కెమెరాల టెక్నీషియన్ అయిన అతడు.. తాను చోరీకి వెళ్లే సమయంలో ఆ వ్యాపార సముదాయంలో ఉన్న సీసీటీవీ కెమెరాలో రికార్డైన దృశ్యాలను డిలీట్ చేయాలని భావించాడు. అందుకే పోలీసుల పేరు చెప్పి అక్కడికి వెళ్లాడు. కానీ ముందు జాగ్రత్తతో చేసి ఆ పనే అతణ్ని పోలీసులకు పట్టించింది. అప్పు తీర్చడం కోసం స్నేహితుడి ఇంటికి కన్నమేసిన హర్షిత్ ఇప్పుడు కటకటాల పాలయ్యాడు. అతడి దగ్గర్నుంచి 6.75 తులాల బంగారం, 85 వేల రూపాయల నగదును పోలీసులు రికవరీ చేసుకొని, రిమాండ్‌కు తరలించారు.