పారాసెటమాల్ పై ట్రంప్ వ్యాఖ్యలు అర్ధరహితం
national | Suryaa Desk | Published : Tue, Sep 23, 2025, 09:12 PM
గర్భధారణ సమయంలో పారాసెటమాల్ వాడితే పిల్లల్లో ఆటిజం వచ్చే ప్రమాదం ఉందని అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలు తీవ్ర కలకలం రేపాయి. అయితే ఈ వ్యాఖ్యలను ప్రముఖ ఆరోగ్య నిపుణులు తీవ్రంగా ఖండించారు. పారాసెటమాల్ వాడకానికి, ఆటిజానికి మధ్య సంబంధం ఉందని చెప్పడానికి ఎలాంటి బలమైన శాస్త్రీయ ఆధారాలు లేవని వారు స్పష్టం చేశారు. గర్భిణులు ఈ విషయంలో అనవసరంగా ఆందోళన చెందాల్సిన అవసరం లేదని భరోసా ఇచ్చారు.సోమవారం వైట్హౌస్లో జరిగిన ఒక కార్యక్రమంలో డొనాల్డ్ ట్రంప్ మాట్లాడుతూ.. గర్భిణులు పారాసెటమాల్ (ఎసిటమైనోఫెన్)కు దూరంగా ఉండాలని, నొప్పిని భరించాలే తప్ప మందులు వాడకూడదని వ్యాఖ్యానించారు. టైలనాల్ వంటి మందులు మంచివి కావని, తీవ్రమైన జ్వరం వస్తే తప్ప వాటిని తీసుకోకూడదని ఆయన సూచించారు. ఈ వ్యాఖ్యలు ప్రపంచవ్యాప్తంగా గర్భిణులలో ఆందోళనలకు దారితీశాయి.ట్రంప్ వ్యాఖ్యలపై భారత వైద్య నిపుణులు స్పందించారు. ఢిల్లీలోని గురు తేగ్ బహదూర్ హాస్పిటల్ పీడియాట్రిక్స్ విభాగాధిపతి డాక్టర్ మనీష్ నారంగ్ మాట్లాడుతూ.. "గర్భధారణ సమయంలో పారాసెటమాల్ వాడితే ఆటిజం వస్తుందన్న ట్రంప్ వాదనకు బలమైన శాస్త్రీయ ఆధారాలు లేవు. ఇప్పటివరకు జరిగిన అధ్యయనాలు పరిమితమైనవి, వాటి ఫలితాలు కూడా పరస్పర విరుద్ధంగా ఉన్నాయి. ఇలాంటి నిరాధార ఆరోపణల వల్ల తల్లిదండ్రుల్లో అనవసర భయాలు నెలకొంటాయి" అని ఆయన వివరించారు.
|
|