మరణంలోనూ రికార్డు సొంతం చేసుకున్న జుబిన్ గార్గ్
international | Suryaa Desk | Published : Tue, Sep 23, 2025, 09:28 PM
అసోంకు చెందిన ప్రముఖ గాయకుడు, సంగీత దర్శకుడు జుబిన్ గార్గ్ (52) అంతిమయాత్ర ఓ అరుదైన రికార్డును సొంతం చేసుకుంది. లక్షలాది మంది అభిమానులు కన్నీటి నివాళులు అర్పించిన ఈ యాత్ర.. లిమ్కా బుక్ ఆఫ్ రికార్డ్స్లో చోటు దక్కించుకుంది. ప్రపంచవ్యాప్తంగా మైఖేల్ జాక్సన్, క్వీన్ ఎలిజబెత్-2 వంటి ప్రముఖుల తర్వాత అత్యధిక సంఖ్యలో ప్రజలు పాల్గొన్న అంత్యక్రియగా ఇది నిలిచింది.మంగళవారం గౌహతిలోని అర్జున్ భోగేశ్వర్ బారువా స్పోర్ట్స్ కాంప్లెక్స్లో జరిగిన జుబిన్ గార్గ్ అంత్యక్రియలకు అభిమానులు వెల్లువలా తరలివచ్చారు. ఎండ, వానను సైతం లెక్కచేయకుండా తమ అభిమాన గాయకుడి చిత్రపటాలు, కటౌట్లు చేతబూని, ఆయన ఆలపించిన గీతాలను పాడుతూ కన్నీటి వీడ్కోలు పలికారు. దీంతో ఆ ప్రాంగణం మొత్తం జనసంద్రంగా మారింది. ఒక కళాకారుడి పట్ల ప్రజల్లో ఉన్న అభిమానానికి ఇది నిదర్శనమని పలువురు అభిప్రాయపడుతున్నారు.
|
|