'క్రికెట్ మ్యాచ్‌లో భారత్‌ను ఓడించాలంటే పీసీబీ చీఫ్, ఆర్మీ చీఫ్ అలా రావాలి': ఇమ్రాన్ ఖాన్

పాకిస్థాన్ మాజీ క్రికెటర్, రాజకీయ నాయకుడు ఇమ్రాన్ ఖాన్.. పాకిస్థాన్ క్రికెట్ బోర్డు ఛైర్మన్ మోహ్సిన్ నఖ్వీపై తీవ్ర విమర్శలు చేశారు. భారత్‌తో క్రికెట్ మ్యాచ్ గెలవాలంటే నఖ్వీ, ఆర్మీ చీఫ్ జనరల్ అసిమ్ మునీర్ ఓపెనర్లుగా రావాలని ఎద్దేవా చేశారు. ఆసియా కప్‌లో భారత్‌ చేతిలో పాకిస్థాన్ ఓడిపోయిన నేపథ్యంలో ఆయన ఈ వ్యాఖ్యలు చేశారు. అలాగే అప్పటి ప్రధాన న్యాయమూర్తి ఇసా, ఎన్నికల కమిషనర్ రాజా సహాయంతో జనరల్ మునీర్ తన పార్టీ అధికారాన్ని దొంగిలించారని ఆరోపించారు.

ఇమ్రాన్ ఖాన్ సోదరి అలీమా ఖాన్ ఈ విషయాన్ని మీడియాకు తెలిపారు. భారత్‌తో జరిగిన రెండు మ్యాచ్‌లలో పాకిస్థాన్ ఓడిపోయిందని ఆమె ఇమ్రాన్‌కు చెప్పగా.. ఆయన ఈ విధంగా స్పందించారని ఆమె వివరించారు. పాకిస్థాన్ గెలవాలంటే పాక్ ఆర్మీ జనరల్ ఆసిఫ్ మునీర్, నఖ్వి ఓపెనర్లుగా రావాలని.. ఖాజీ ఫైజ్ ఇసా, సికిందర్ సుల్తాన్ రాజా అంపైర్లుగా ఉండాలని, ఇస్లామాబాద్ హైకోర్టు చీఫ్ జస్టిస్ సర్ఫరాజ్ డోగర్ థర్డ్ అంపైర్‌గా ఉండాలని ఇమ్రాన్ అన్నట్లు అలీమా వెల్లడించారు.

1992లో ఇమ్రాన్ ఖాన్ కెప్టెన్‌గా పాకిస్థాన్ ఓడీఐ ప్రపంచ కప్ గెలిచింది. అయితే నఖ్వీ అసమర్థత, బంధుప్రీతి కారణంగానే పాకిస్థాన్ క్రికెట్ దిగజారిందని ఇమ్రాన్ ఆరోపించారు. 'పాకిస్థాన్ గెలవాలంటే జనరల్ మునీర్, నఖ్వీ ఓపెనర్లుగా రావాలి" అని ఇమ్రాన్ చేసిన వ్యాఖ్యలు ఇప్పుడు హాట్ టాపిక్‌గా మారాయి. ఇమ్రాన్ ఖాన్ ఆగస్టు 2023 నుంచి అనేక కేసుల్లో ఇరుక్కొని జైల్లో శిక్ష అనుభవిస్తున్నారు. 2024 ఫిబ్రవరిలో జరిగిన ఎన్నికల్లో జనరల్ మునీర్ తన పార్టీని కావాలనే ఓడించారని, దీనికి అప్పటి CJP ఇసా, ఎన్నికల కమిషనర్ రాజా సహకరించారని ఇమ్రాన్ ఖాన్ చాలా కాలంగా ఆరోపిస్తున్నారు.

ఇమ్రాన్ ఖాన్ చేసిన ఈ వ్యాఖ్యలపై PCB ఎలా స్పందిస్తుందో చూడాలి. అయితే ఈ వ్యాఖ్యలు పాకిస్థాన్ రాజకీయాల్లో, క్రికెట్ వర్గాల్లో చర్చనీయాంశంగా మారాయి. ఇమ్రాన్ ఖాన్ జైలు నుంచే రాజకీయ విమర్శలు చేయడం గమనార్హం కాగా.. ఆయన వ్యాఖ్యలు దేశంలో ప్రకంపనలు సృష్టిస్తున్నాయి. రానున్న రోజుల్లో ఈ వివాదం మరింత ముదిరే అవకాశం ఉంది.