అంబేడ్కర్‌ ప్రేరణతో.. పల్లెటూరి పయనం: హోమ్‌బౌండ్‌ డైరెక్టర్‌ నీరజ్‌ ఉద్వేగకథ

‘హోమ్‌బౌండ్‌’ సినిమా ఆస్కార్‌ 2026 బాటలో అడుగుపెట్టింది. భారత్ తరఫున 'ది బెస్ట్ ఇంటర్నేషనల్ ఫీచర్' విభాగంలో ఈ చిత్రమే అధికారిక ఎంట్రీగా ఎంపికైంది. సెప్టెంబర్ 26న థియేటర్లలో విడుదల కానున్న ఈ సినిమా ప్రమోషన్‌లో భాగంగా దర్శకుడు నీరజ్ ఘైవాన్, నటుడు ఇషాన్ కట్టర్ మీడియాతో ఆసక్తికర విషయాలు పంచుకున్నారు.దర్శకుడు నీరజ్ మాట్లాడుతూ, "తెరపై కనిపించే ప్రధాన పాత్రధారులు (ఇషాన్ కట్టర్, విశాల్ జెత్వా, జాన్వీ కపూర్) గ్రామీణ జీవితం నుంచి వచ్చినట్లు అనిపించకపోవచ్చు. అందుకే, నటులను ఎంపిక చేసే సమయంలో వారి నటనా ప్రతిభతో పాటు, పాత్రను లోతుగా అర్థం చేసుకునే సామర్థ్యం, నిజాయితీపై కూడా ఎక్కువగా దృష్టి పెడతాను. 'హోమ్‌బౌండ్‌' లాంటి కథల్లో భావోద్వేగానికి తగ్గ హావభావాలు చాలా ముఖ్యం. అందుకే నటులకు డాక్టర్ బీఆర్ అంబేడ్కర్ రాసిన పుస్తకాన్ని చదవాలని సూచించాను. అలాగే, గ్రామీణ జీవితాన్ని నేరుగా అనుభవించేందుకు వారికి పలు గ్రామాల పర్యటనలు చేయించాం" అని తెలిపారు.ఇషాన్ కట్టర్ తన అనుభవాన్ని పంచుకుంటూ, "ఉత్తరప్రదేశ్‌లోని ఓ గ్రామాన్ని సందర్శించాం. అక్కడ ప్రజల ఆతిథ్యం, వారితో గడిపిన క్షణాలు ఎప్పటికీ మర్చిపోలేను. వారింట్లో భోజనం చేయడం, వారితో కబుర్లు చెప్పడం, యాక్టింగ్ ప్రాక్టీస్ చేయడం ఒక గొప్ప అనుభూతి. నీరజ్ లాంటి నిబద్ధత ఉన్న దర్శకుడిని నా కెరీర్‌లో కలవడం అదృష్టంగా భావిస్తున్నా. ఈ సినిమాలో నేను నటించకపోయినా తప్పకుండా చూడమని ప్రేక్షకులకు చెబుతా" అని పేర్కొన్నారు.కుల వివక్షను ఎదుర్కొంటూ, పోలీసు కావాలనే లక్ష్యంతో పోరాడే ఇద్దరు స్నేహితుల కథ ఆధారంగా రూపొందిన ఈ చిత్రం ఇటీవల జరిగిన టొరంటో అంతర్జాతీయ చలన చిత్రోత్సవంలో 'ఇంటర్నేషనల్ పీపుల్స్ చాయిస్ అవార్డు' విభాగంలో రెండో రన్నరప్‌గా నిలవడం గర్వకారణం.