ట్రంప్ టారీఫ్‌లతో పుతిన్‌కు మోదీ ఫోన్ కాల్.. నాటో చీఫ్ సంచలన వ్యాఖ్యలు

రష్యా నుంచి ఆయిల్ కొనుగోలు చేస్తున్నారనే కారణంతో భారత్‌పై అమెరికా అధ్యక్షుడు డొనాల్డ్ ట్రంప్ విధించిన శిక్షణాత్మక సుంకాలు మాస్కోపై తీవ్ర ప్రభావం చూపాయని నాటో సెక్రటెరీ జనరల్ మార్క్ రుట్టే సంచలన వ్యాఖ్యలు చేశారు. అంతేకాదు, భారతీయ వస్తువులపై ట్రంప్ టారీఫ్‌లతో రష్యా అధ్యక్షుడు వ్లాదిమిర్ పుతిన్‌కు ఫోన్ చేసిన భారత ప్రధాన మంత్రి నరేంద్ర మోదీ.. ఉక్రెయిన్‌ విషయంలో వ్యూహం ఏంటో చెప్పాలని ప్రశ్నించారని పేర్కొన్నారు. న్యూయార్క్‌లో జరుగుతోన్న ఐక్యరాజ్యసమితి సాధారణ సభ సమావేశం సందర్భంగా మీడియాతో నాటో చీఫ్ మాట్లాడుతూ ఈ వ్యాఖ్యలు చేయడం గమనార్హం.

‘‘ఇది (సుంకాలు) రష్యాపై ప్రభావం చూపింది ఎందుకంటే పుతిన్‌కు ఫోన్ చేసిన నరేంద్ర మోదీ.. ‘నేను మద్దతు ఇస్తాను.. కానీ, ఉక్రెయిన్ విషయంలో మీ వ్యూహం ఏంటో వివరించండి ఎందుకంటే అమెరికా మాపై 50 శాతం సుంకాలు విధించింది అని ప్రశ్నించారు’’ అని మార్క్ రుట్టే వ్యాఖ్యానించారు. కాగా, నాటో సెక్రెటరీ జనరల్ వ్యాఖ్యలపై అటు భారత్‌గానీ, రష్యాగానీ ఇంతవరకూ స్పందించలేదు.

ఆగస్టులో 25 శాతం ప్రతీకార సుంకాలు విధించిన డొనాల్డ్ ట్రంప్.. ఆంక్షలు విధించినా రష్యా నుంచి ఆయిల్ కొనుగోలుచేస్తోందనే సాకుతో మరో 25 శాతం కలిపి భారత్‌పై మొత్తం 50 శాతం టారీప్‌లు విధించారు. ఈ ఏడాది జనవరిలో రెండోసారి అధ్యక్షుడిగా బాధ్యతలు చేపట్టిన తర్వాత వాణిజ్య భాగస్వామ్య దేశాలలపై ట్రంప్ పరస్పర సుంకాలు విధించిన విషయం తెలిసిందే. ఉక్రెయిన్‌తో యుద్ధం చేస్తోన్న రష్యా నుంచి చమురు కొనుగోలు చేస్తూ వారికి భారత్ ఆర్ధిక మద్దతు అందజేస్తోందని ట్రంప్ ఆరోపిస్తున్నారు.

అయితే, ఈ నెల 17న ప్రధాని మోదీ పుట్టిన రోజు నాడు పుతిన్ ఫోన్‌లో మాట్లాడారు. ఈ సందర్భంగా ఉక్రెయిన్ సంఘర్షణకు ముగింపు పలికే శాంతి ఒప్పందానికి తమ పూర్తి మద్దతు ఉంటుందని మోదీ పునరుద్ఘాటించినట్టు ప్రధాన మంత్రి కార్యాలయ వర్గాలు తెలిపాయి. దీనికి ముందు చైనాలోని తియాంజిన్‌లో జరిగిన షాంఘై సహకార సంస్థ శిఖరాగ్ర సదస్సుకు హాజరైనప్పుడు మోదీ, పుతిన్‌లు ఒకే కారులో ప్రయాణించారు. ఎస్‌సీఓ సమావేశం పూర్తయిన తర్వాత ద్వైపాక్షిక చర్చలు జరిగే హోటల్‌కు కలిసి వేళ్లారు.

మరోవైపు, రష్యా నుంచి ఆయిల్ కొనుగోలు చేస్తోన్న చైనా వంటి దేశాలపై 50 నుంచి 100 శాతం వరకూ సుంకాలు విధించాలని నాటో సభ్యదేశాలను ట్రంప్ కోరిన విషయం తెలిసిందే. నాటో దేశాలన్నీ అంగీకరించి, మాస్కో నుంచి చమురు కొనుగోలును నిలిపివేస్తే రష్యాపై భారీగా ఆంక్షలు విధించడానికి తాను సిద్ధంగా ఉన్నానని ట్రంప్ అన్నారు.