ఇలా చెక్ చేస్తే.., ఇంట్లోనే పాల టెస్ట్ చేయొచ్చు

అగ్గిపుల్ల, కుక్క పిల్ల, సబ్బు బిళ్ల కాదేదీ కవితకు అనర్హం అని శ్రీశ్రీ అన్నట్గుగా.. నీళ్లు, పాలు కాదేదీ కల్తీకి అనర్హం అంటున్నారు కల్తీ రాయుళ్లు. అందుకే ధనార్జనే ధ్యేయంగా పసి పిల్లలు తాగే పాలను కూడా కల్తీ చేసేంత నీచానికి దిగజారారు. పాలల్లో పిండి, యూరియా, డిటర్జెంట్ పౌడర్ వంటివి కలుపుతూ పాలు చిక్కగా వచ్చేలా చేస్తున్నారు. ఇలాంటి పరిస్థితుల్లో ఏది కల్తీయో ఏది నాణ్యమైనదే గుర్తించడమనేది చాలా పెద్ద టాస్కే. అయితే ఇకపై ఇలాంటి పని సింపుల్‌గా చేసేయవచ్చని అంటున్నారు బాపట్ల జిల్లాలోని ఎన్టీఆర్ విజ్ఞాన సాంకేతిక కాలేజీ విద్యార్థులు. కల్తీ పాలను చిటికెలో పసిగట్టవచ్చని వివరిస్తున్నారు ఈ కాలేజీకి చెందిన కొంతమంది విద్యార్థులు. ఈ కాలేజీకి అనిత, హేమవల్లి, సమ్రీన్‌, రాజేశ్వరి, బషీరా అనే విద్యార్థులు ఈ విధానాలను వివరించారు.

పాలల్లో యూరియా కల్తీని గుర్తించటం ఇలా..

ఈ మధ్యకాలంలో కొంతమంది పాల వ్యాపారులు పాలు చిక్కగా కనపడాలని అందులో యూరియా కలుపుతున్నారు. అయితే పాలల్లో యూరియా కలిపారో లేదో తెలుసుకోవాలంటే అర టీస్పూన్ సోయాబీన్ లేదా కంది పిండిని తీసుకోవాలి. ఓ టీస్పూన్ పాలు పరీక్ష నాళికలో తీసుకుని.. ఈ కందిపిండి లేదా సోయాబీన్ అందులో వేసి బాగా కలపాలి. ఓ ఐదు నిమిషాల తర్వాత ఎర్ర లిట్మస్ పేపర్ ముక్కను 30 సెకన్ల పాటు అందులో ఉంచాలి. ఎర్ర లిట్మస్ పేపర్ నీలం రంగుకు మారితే ఆ పాలల్లో యూరియా కలిపారని అర్థం. కలర్ మారకపోతే యూరియా కలపలేదని భావించవచ్చు.

మరోవైపు పాలలో ఘన పదార్థాల శాతాన్ని పెంచేందుకు పాల వ్యాపారులు కొంతమంది పిండిని కలుపుతున్నారు. అయితే ఇలా పాలల్లో పిండి కలిసిందో లేదో తెలుసుకునేందుకు అయోడిన్‌ ద్రావణం ఉపయోగపడుతుంది. అయోడిన్ ద్రావణం ఐదారు చుక్కలను పాలల్లో కలపాలి. ఆ తర్వాత ఈ మిశ్రమంలో ఎర్ర లిట్మస్‌ పేపరు ముంచినప్పుడు అది నీలం-నలుపు రంగులోకి మారితే పిండి కలిపారని అర్థమని విద్యార్థులు వివరించారు. అలాగే పాలలో నీళ్లు కలిపారో లేదో గుర్తించేందుకు ఒక చుక్క పాలను మెరిసే ప్లేట్ మీద వేయాలంటున్నారు. ఇలా వేసినప్పుడు స్వచ్ఛమైన పాలు అయితే ప్లేటు మీద కిందకు జారినప్పుడు తెల్లటి ధార కనిపిస్తుందని.. అదే నీరు కలిపిన పాలు అయితే ఎలాంటి తెల్లటి గుర్తులు ఉండవంటున్నారు.

మరోవైపు పాలలో కొంతమంది డిటర్జెంట్ కూడా కలుపుతున్నారు. దీనివలన పాలలో నురుగ శాతం పెరుగుతుంది. అయితే ఇలాంటి పాలు తాగితే కిడ్నీల సమస్యలు వస్తాయి. ఇలా డిటర్జెంట్ కల్తీని గుర్తించటానికి పది మిల్లీలీటర్ల పాలను తీసుకుని అందుకు సమాన పరిమాణంలో నీటిని కలిపి బాగా గిలకొట్టాలి. నురుగు ఏర్పడితే అందులో డిటర్జెంట్‌ కలిపినట్లని విద్యార్థులు వివరించారు.