అక్టోబర్ 1 నుంచి ఆధార్ అప్డేట్ ఛార్జీలు మారనున్నాయి – పూర్తి వివరాలు

ఆధార్ కార్డు సేవలకు సంబంధించి యూజర్లకు పెద్ద ఎత్తున మార్పులు రాబోతున్నాయి. ఆధార్ కార్డు జారీ సంస్థ అయిన యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) తాజాగా ప్రకటించిన ప్రకారం, అక్టోబర్ 1, 2025 నుండి ఆధార్ అప్డేట్ సేవలపై కొత్త ఛార్జీలు అమలులోకి రానున్నాయి. కొత్త ఆధార్ నమోదు సేవలు మాత్రం ఇప్పటికీ ఉచితంగానే కొనసాగుతాయి. అయితే ఇప్పటికే ఆధార్ కార్డు కలిగినవారు చిరునామా మార్పు లేదా బయోమెట్రిక్ అప్డేట్ వంటి సేవల కోసం ఇకపై పెరిగిన రేట్లను చెల్లించాల్సి ఉంటుంది. ప్రస్తుతం వయసు 17 ఏళ్లు దాటినవారు బయోమెట్రిక్స్ (వేలిముద్రలు) అప్డేట్ చేయాలంటే రూ.100 వసూలు చేస్తున్నారు, దీనిని రూ.125కు పెంచారు. అలాగే చిరునామా మార్పు కోసం రూ.50 వసూలు చేస్తుండగా, ఇప్పుడు ఇది రూ.75కు పెరిగింది. ఈ మేరకు UIDAI డిప్యూటీ డైరెక్టర్ హిమాన్షు దేశవ్యాప్తంగా ఉన్న అన్ని ప్రాంతీయ కార్యాలయాలకు అధికారిక సమాచారం పంపారు.కొత్త ఛార్జీలు 17 ఏళ్లు దాటినవారికి మాత్రమే వర్తిస్తాయి. 5 నుంచి 7 ఏళ్ల మధ్య వయసు ఉన్న పిల్లలకు, అలాగే 15 నుంచి 17 ఏళ్ల మధ్య యువతకు బయోమెట్రిక్ అప్డేట్‌లు ఉచితంగా లభించనున్నాయి. భవిష్యత్‌లో ఈ ఛార్జీలు దశలవారీగా మరింత పెరిగే అవకాశం ఉంది. రెండో విడతగా 2028 అక్టోబర్ 1 నుంచి రూ.100 మరియు రూ.125గా ఉండగా, మూడో విడతగా సెప్టెంబర్ 30, 2031 నాటికి ఈ ఛార్జీలు రూ.90 నుంచి రూ.150 వరకు పెరిగే అవకాశం ఉన్నట్లు UIDAI వెల్లడించింది.ఇక “మైఆధార్” వెబ్‌సైట్ ద్వారా డాక్యుమెంట్లు అప్డేట్ చేసుకోవడానికి వినియోగదారులకు జూన్ 14, 2026 వరకు ఉచిత అవకాశం ఇవ్వబడుతుంది. ఆ తరువాత మాత్రం ఆన్‌లైన్ ద్వారా అయినా, ఆఫ్‌లైన్ ఆధార్ కేంద్రాల ద్వారా అయినా, ఛార్జీలు వర్తిస్తాయి. ప్రస్తుతానికి ఆధార్ నమోదు కేంద్రాల్లో పాత ఛార్జీలే ప్రదర్శించబడుతున్నప్పటికీ, అక్టోబర్ 1 తర్వాత కొత్త రేట్లు అధికారికంగా అమలవుతాయి. ఆధార్ కార్డులో పేరు మార్పు, చిరునామా మార్పు, ఫోన్ నంబర్ మార్పు, బయోమెట్రిక్ డేటా అప్డేట్ (వేలిముద్రలు, ఐరిస్, ఫోటో) వంటి అన్ని సేవలకు ఈ కొత్త ఛార్జీలు వర్తించనున్నాయి.అంతేకాకుండా, చిన్న పిల్లల ఆధార్ అప్డేట్‌ను ప్రోత్సహించేందుకు UIDAI ప్రత్యేక కార్యక్రమాన్ని ప్రారంభించింది. ఇందులో భాగంగా, స్కూళ్లలోనే బయోమెట్రిక్ అప్డేట్ క్యాంపులు నిర్వహిస్తున్నారు. ఈ మార్పులు వినియోగదారుల డేటా భద్రతను మరింత బలోపేతం చేయడమే కాకుండా, ఆధార్ వ్యవస్థను మరింత సమర్థవంతంగా నిర్వహించేందుకు చేపడుతున్న చర్యలుగా చెప్పవచ్చు. వినియోగదారులు ఈ మార్పులకు ముందుగానే సిద్ధమవ్వడం ద్వారా అనవసరమైన ఛార్జీలు తప్పించుకోవచ్చు.