పాక్‌పై ఫైనల్‌లో గెలిస్తే.. భారత్ ట్రోఫీ తీసుకుంటుందా? లేదా?

డిఫెండింగ్ ఛాంపియన్ హోదాలో ఆసియాకప్ 2025 బరిలోకి దిగిన భారత్.. మరోసారి ఫైనల్ చేరింది. ఈసారి కూడా టైటిల్ సాధిస్తే.. వరుసగా రెండుసార్లు భారత్ టైటిల్ సాధించనుంది. ఇప్పటికే ఈ టోర్నీలో పాక్‌పై భారత్ రెండు సార్లు విజయం సాధించింది. మూడోసారి కూడా గెలిచి టైటిల్ సాధించాలని భారత్ పట్టుదలతో ఉంది. అయితే ఒకవేళ టీమిండియా గెలిస్తే.. ట్రోఫీని తీసుకుంటుందా? లేదా? అన్న విషయంపై ఉత్కంఠ కొనసాగుతోంది.

ఆసియాకప్ క్రికెట్ కౌన్సిల్‌ చీఫ్‌గా పాకిస్థాన్‌ క్రికెట్ బోర్డు ఛైర్మన్ మోహ్సిన్ నఖ్వీ ఉన్నారు. అంతేకాకుండా ఆయన పాకిస్థాన్ ప్రభుత్వం హోంమంత్రిగా కూడా బాధ్యతలు నిర్వర్తిస్తున్నారు. ఫైనల్‌లో గెలిచిన జట్టుకు తానే ట్రోఫీ అందిస్తానని.. నఖ్వీ ఇదివరకే ప్రకటించారు. కానీ ప్రస్తుతం భారత ఆటగాళ్లు.. పాకిస్థాన్ ఆటగాళ్లతో షేక్ హ్యాండ్ కూడా ఇవ్వడం లేదు. పహల్గాం ఉగ్రదాడి నేపథ్యంలో ఈ నిర్ణయం తీసుకున్నారు. ఇలాంటి పరిస్థితుల్లో పాకిస్థాన్‌కు చెందిన మోహ్సిన్ నఖ్వీ ట్రోఫీ అందిస్తే.. తీసుకుంటారా? లేరా అన్న చర్చ జరుగుతోంది.

కాగా మోహ్సిన్ నఖ్వీ.. ముందు నుంచి బీసీసీఐ, భారత్‌పై పరోక్షంగా విమర్శలు చేస్తూ వస్తున్నారు. ఇటీవల రెచ్చ గొట్టే చేష్టలు చేసిన పాక్ పేసర్ హారిస్ రవూఫ్‌కు ఐసీసీ.. ఫైన్ విధించింది. ఆ ఫైన్‌ను కూడా తానే కడతానని నఖ్వీ చెప్పారు. దీనిపై కూడా భారత ఫ్యాన్స్ గుర్రుగా ఉన్నారు. ఈ నేపథ్యంలో భారత్ గెలిస్తే ట్రోఫీ స్వీకరణను బహిష్కరిస్తుందా? అన్న సందేహాలు కలుగుతున్నాయి.

ఇక ఆసియాకప్‌లో భారత్, పాకిస్థాన్ ఇప్పటివరకు ఒక్కసారి కూడా తలపడలేదు. కానీ 17వ ఎడిషన్‌లో మాత్రం అది జరుగుతోంది. దీంతో ఈ మ్యాచ్‌పై ఉత్కంఠం నెలకొంది. ఇప్పటికే ఈ మ్యాచ్‌కు సంబంధించిన టికెట్లన్నీ సోల్డ్ ఔట్ అయ్యాయి. ఈ టోర్నీలో పాక్ జట్టుపై వరుసగా మూడోసారి గెలిచి.. భారత్ టైటిల్ సాధించాలని ఫ్యాన్స్ కోరుకుంటున్నారు. వారి చేష్టలకు ఆటతో సమాధానం చెప్పాలని పేర్కొంటున్నారు. రాత్రి 8 గంటలకు ఈ మ్యాచ్ దుబాయ్ ఇంటర్నేషనల్ క్రికెట్ స్టేడియంలో జరగనుంది.