భారత్‌తో మ్యాచ్ అంటే ఒత్తిడి ఉంటుంది,,,,పాక్ కెప్టెన్ కీలక వ్యాఖ్యలు

భారత్‌తో ఆసియాకప్ 2025 ఫైనల్‌కు ముందు పాకిస్థాన్ కెప్టెన్ సల్మాన్ అలీ అఘా కీలక వ్యాఖ్యలు చేశాడు. భారత్‌తో మ్యాచ్ అంటే కచ్చితంగా ఒత్తిడి ఉంటుందని చెప్పుకొచ్చాడు. అయితే గతంలో తాము పొరపాట్లు చేయడం వల్లే మ్యాచ్ ఓడిపోయామని.. ఈసారి అవి జరక్కుండా చూసుకుంటామని పేర్కొన్నాడు. షేక్ హ్యాండ్ వివాదం సహా ఇతర విషయాలపై కూడా అతడు స్పందించాడు.

షేక్ హ్యాండ్ వివాదంపై..

“2007 నుంచి నేను క్రికెట్ ఆడుతున్నారు. మ్యాచ్ ఆడే రెండు జట్లు షేక్ హ్యాండ్ చేసుకోకపోవడం ఎప్పుడూ చూడలేదు. గతంలో ఒక్కోసారి భారత్, పాక్ మధ్య ఇప్పటి కంటే దారుణమైన పరిస్థితులు ఉన్నాయి. కానీ అప్పుడు కూడా ఇరు జట్ల ఆటగాళ్లు షేక్ హ్యాండ్ ఇచ్చుకున్నారు. కానీ ప్రస్తుతం జరుగుతున్న పరిస్థితులు క్రికెట్‌కు మంచివి కావు”

ఫొటో షూట్‌లో పాల్గొనకపోవడం వారి ఇష్టం..

ఫైనల్‌ మ్యాచ్‌కు ముందు టీమిండియా ఫొటో షూట్‌కు దూరంగా ఉంది. దీనిపై కూడా సల్మాన్ అలీ అఘా మాట్లాడాడు. “వారు (భారత్‌) ఏం చేసినా చేయనివ్వండని, తాము మాత్రం ఆసియా క్రికెట్ కౌన్సిల్‌ ప్రొటోకాల్‌ను పాటిస్తాం. ఫొటో షూట్‌లో పాల్గొనడం, పాల్గొనకపోవడం వారి ఇష్టం” అని వ్యాఖ్యానించాడు.

భారత్‌తో మ్యాచ్‌ అంటే ఒత్తిడి ఖాయం..

“నిజానికి ఆసియాకప్‌లో భారత్‌తో జరిగిన రెండు మ్యాచ్‌లలో మేం తప్పులు ఎక్కువగా చేశాం. అందుకే ఓడిపోయాం. భారత్- పాకిస్థాన్‌ మ్యాచ్ అంటేనే తీవ్ర ఒత్తిడి ఉంటుంది. ఒత్తిడి లేదని చెబితే అది అబద్ధమే అవుతుంది. మేం ఎక్కువ తప్పిదాలు చేయడంతోనే భారత్‌పై విజయం సాధించలేకపోయాం. ఫైనల్లో తప్పులు చేయకుండా.. భారత్‌పై గెలిచేందుకు ప్రయత్నిస్తాం. గతంలో చేసిన తప్పులను సరిదిద్దుకుని మెరుగైన ప్రదర్శన చేస్తాం” అని సల్మాన్ అలీ అఘా ప్రెస్‌మీట్‌లో అన్నాడు.

ఆటగాళ్లకు స్వేచ్ఛ ఇస్తా..

“దూకుడుగా ఉండే విషయంలో ఆటగాళ్లకు పరిమితులు విధించబోం. వారికి పూర్తి స్వేచ్ఛ ఇస్తాం. ప్రతి ఆటగాడికి కూడా తమదైన శైలి ఉంటుంది. ఒక ఆటగాడు మైదానంలో దూకుడుగా ఉండాలనుకుంటే.. వారిని ఆపకూడదు. ఫాస్ట్ బౌలర్‌ ఆవేశాన్ని ఆపేస్తే.. వారికి ఇంకేం మిగులుతుంది” అని హారిస్ రవూఫ్ ఎపిసోడ్‌ను ఉద్దేశించి మాట్లాడాడు.