హెచ్-1బీ వీసా ప్రక్రియలో భారీ మార్పులు.. అమెరికా వాణిజ్య మంత్రి షాకింగ్ ప్రకటన

హెచ్-1బీ వీసా విషయంలో అమెరికా కఠిన చర్యలు తీసుకుంటోంది. ఇటీవలే ఈ వీసా ఫీజును 215 డాలర్ల నుంచి లక్ష డాలర్లకు పెంచుతూ.. ఆ దేశ అధ్యక్షుడు ట్రంప్ నిర్ణయం తీసుకున్న విషయం అందరికీ తెలిసిందే. అయితే తాజాగా అమెరికా వాణిజ్య శాఖ మంత్రి హోవార్డ్ లుట్నిక్ కీలక వ్యాఖ్యలు చేశారు. హెచ్-1బీ వీసా విధానంలో ఫిబ్రవరి 2026 నాటికి సమూలమైన మార్పులు రానున్నాయని అన్నారు. పాత విధానంలో లోపాలు ఉన్నాయని తెలిపారు.

ట్రంప్ ఇటీవలే హెచ్-1బీ వీసా ఫీజును లక్ష రూపాయలకు పెంచగా.. అంతా ఆశ్చర్యపోయారు. అమెరికాలో ఉన్న వాళ్లతో పాటు అక్కడకు వెళ్లాలని కలలు కన్నవారంతా తెగ ఆందోళన చెందారు. కానీ ఈ ఫీసు వార్షిక ఫీజు కాదని.. దరఖాస్తు చేసుకునే సమయంలోనే కట్టే వన్ టైమ్ ఫీజు మాత్రమే అని వైట్‌హౌస్ ప్రెస్ సెక్రటరీ కరోలిన్ లీవిట్ స్పష్టం చేశారు. ముఖ్యంగా ప్రస్తుత, రెన్యూవల్ వీసాదారులకు ఇది వర్తించదని.. కొత్తగా తీసుకునే వారికి మాత్రమే దీన్ని అమలు చేస్తామని అన్నారు. దీని గురించి వాణిజ్య మంత్రి లుట్నిక్ స్పందిస్తూ.. 2026 నుంచి ఈ ప్రక్రియ అంతా అమల్లోకి వస్తుందన్నారు. తన అంచనా ప్రకారం 2026లో గణనీయమైన మార్పులు ఉంటాయని చెప్పుకొచ్చారు.

లక్ష డాలర్ల ఫీజు కారణంగా రానున్న రోజుల్లో ఆ వీసాపై వచ్చే వారి సంఖ్యలో మార్పు ఉంటుందని అంచనా వేశారు. లాటరీ విధానంలో కూడా మార్పులు ఉండొచ్చనే విధంగా మాట్లాడారు. ఒక దేశ లాటరీ ద్వారా నైపుణ్యం కల్గిన కార్మికులను తెచ్చుకోవడం ఏంటని ఈ సందర్భంగానే ప్రశ్నించారు. పాత వీసా విధానంలో లోపాలు ఉన్నాయని.. ఫలితంగా అనుభవం లేని టెక్ కన్సల్టెన్సీలు దేశంలో కుటుంబాలతో సహా ప్రవేశించాయని అసంతృప్తి వ్యక్తం చేశారు. మరోవైపు నిపుణులైన కార్మికులు మాత్రమే దేశంలోకి వచ్చేలా అమెరికా ప్రభుత్వం ప్రతిపాదనలు సిద్ధం చేస్తోందని పెద్ద ఎత్తున వార్తలు వచ్చిన విషయం అందరికీ తెలిసిందే.

హెచ్-1బీ కోసం ప్రస్తుతమున్న లాటరీ విధానాన్ని మార్చాలని డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ భావిస్తోంది. అధిక నైపుణ్యం కల్గిన విదేశీయులను మాత్రమే అనుమతించడం, అమెరికన్లకు ప్రాధాన్యం కల్పించే ఉద్దేశంతో వీటిని రూపొందించినట్లు తెలుస్తోంది. ఉద్యోగి వేతన స్థాయిని అనుసరించి రిజిస్ట్రేషన్‌లో ప్రాధాన్యం కల్పించడం, వేతన వర్గీకరణ ఆధారంగా దరఖాస్తులను విభజించడం వంటి చర్యలు తీసుకోనున్నారు. అలాగే హెచ్-1బీ, ఎల్-1 వీసాలను సంస్కరించాలని.. విదేశీ ఉద్యోగుల నియామకం విషయంలో కఠిన నిబంధనలు ఉండాలని పలువురు యూఎస్ సెనేటర్లు డిమాండ్ చేస్తున్నారు. ఈ మేరకే సెనెటర్లు చక్ గ్రాస్లీ, డిక్ డర్బిన్ బిల్లును ప్రవేశపెట్టారు. కార్పొరేట్ దుర్వినియోగాన్ని అరికట్టి అమెరికా ఉద్యోగులను రక్షించడమే తమ లక్ష్యం అని ఈ సందర్భంగా వెల్లడించారు.