బంగాళాఖాతంలో తీవ్ర అల్పపీడనం.. ఏపీలోని ఈ జిల్లాల్లో భారీ వర్షాలు

ఆంధ్రప్రదేశ్ రాష్ట్రానికి తుఫాన్ రూపంలో భారీ వర్షాల ముప్పు పొంచి ఉందని అమరావతి వాతావరణ కేంద్రం తీవ్ర హెచ్చరికలు జారీ చేసింది. పశ్చిమ మధ్య బంగాళాఖాతంలో ఏర్పడిన అల్పపీడనం మరింత బలపడనుందని తెలిపింది. ప్రస్తుతం తీవ్ర అల్పపీడనంగా ఉన్న ఉపరితల ఆవర్తనం.. రానున్న 12 గంటల్లో వాయుగుండంగా బలపడుతుందని పేర్కొంది. ఇది వాయువ్య దిశగా పయనించి.. అక్టోబర్ 3వ తేదీ నాటికి తీవ్ర వాయుగుండంగా మారుతుందని వెల్లడించింది. ఉత్తర కోస్తా, దక్షిణ ఒడిశా మధ్య ఈ తీవ్ర వాయుగుండం తీరం దాటే అవకాశాలు ఉన్నాయని వాతావరణ శాఖ అధికారులు స్పష్టం చేశారు.

ఈ తీవ్ర వాయుగుండం ప్రభావంతో బుధవారం రోజున ఉత్తర కోస్తాంధ్ర.. దాన్ని ఆనుకుని ఉన్న జిల్లాల్లో విస్తారంగా వర్షాలు కురుస్తాయని వాతావరణ శాఖ వెల్లడించింది. దీని ప్రభావంతో విజయనగరం, విశాఖపట్నం, అనకాపల్లి, కాకినాడ, యానాం, కోనసీమ, ఉభయ గోదావరి జిల్లాలకు నేడు భారీ నుంచి అతి భారీ వర్షాలు కురిసే అవకాశాలు ఉన్నాయని తెలిపింది. వాతావరణ శాఖ హెచ్చరికలతో ఈ 7 జిల్లాలకు ఆరెంజ్ అలర్ట్ జారీ చేశారు. అల్లూరి సీతారామరాజు జిల్లా, పార్వతీపురం మన్యం, శ్రీకాకుళం, ఏలూరు, కృష్ణా, గుంటూరు, బాపట్ల జిల్లాల్లో భారీ వర్షాలు కురిసే అవకాశాలు ఉన్నట్లు తెలిపింది.

ఈ క్రమంలోనే రానున్న 3 రోజుల పాటు ఆంధ్రప్రదేశ్ రాష్ట్ర వ్యాప్తంగా విస్తారంగా వర్షాలు కురిసే అవకాశాలున్నాయని అమరావతి వాతావరణ కేంద్రం హెచ్చరికలు జారీ చేసింది. భారీ వర్షాలు, బలమైన గాలుల దృష్ట్యా తీర ప్రాంతంలో హై అలర్ట్ ప్రకటించారు. రానున్న నాలుగు రోజుల పాటు మత్స్యకారులు సముద్రంలో వేటకు వెళ్లకూడదని వాతావరణ శాఖ తీవ్రంగా హెచ్చరించింది.

ఇక ఏపీలోని అన్ని పోర్టులకు 3వ నెంబర్ ప్రమాద హెచ్చరికలు జారీ చేశారు. భారీ వర్షాలు, వరదల కారణంగా రైలు, రోడ్డు రవాణా మార్గాలు దెబ్బతినే ప్రమాదం ఉందని వాతావరణ శాఖ హెచ్చరించింది. ముఖ్యంగా ప్రస్తుతం నవరాత్రి ఉత్సవాలు జరుగుతుండటంతో వర్షాల దృష్ట్యా ప్రజలు ఎక్కువ మంది ఒకే చోట గుమిగూడకుండా తగిన జాగ్రత్తలు తీసుకోవాలని అధికారులు సూచించారు.