అర్ధరాత్రి ప్రియురాలి కోసం గోడ దూకి అనంత లోకాలకు

ఒడిశాలోని ఢెంకనాల్ జిల్లాలో జరిగిన ఒక విషాద ఘటన స్థానికంగా సంచలనం సృష్టించింది. తన ప్రియురాలిని రహస్యంగా కలుసుకోవడానికి వెళ్లిన ఓ యువకుడు విద్యుదాఘాతానికి గురై అక్కడికక్కడే మరణించాడు. మృతుడు 18 ఏళ్ల బిశ్వజిత్ బెహెరాగా పోలీసులు గుర్తిచారు. అయితే ఇతడు ఆదివారం రోజు అర్ధరాత్రి తన ప్రియురాలి ఇంటికి వెళ్లాడు. అక్కడే ఇంట్లోకి ప్రవేశించడానికి అతను గోడ ఎక్కుతుండగా.. ప్రమాదవశాత్తు ఎలక్ట్రిక్ వైర్‌ను తాకాడు. దీంతో విద్యుదుఘాతానికి గురై అతడు అక్కడికక్కడే కుప్పకూలిపోయాడు.

అయితే విషయం గుర్తించిన ప్రియురాలి కుటుంబ సభ్యులు వెంటనే పోలీసులకు సమాచారం అందించారు. అయితే బిశ్వజిత్ బెహెరా కుటుంబ సభ్యులు మాత్రం ఇది ప్రమాదం కాదని, దీని వెనుక కుట్ర ఉందని ఆరోపిస్తున్నారు. తమ కుమారుడి మృతిలో ఆ బాలిక బంధువుల ప్రమేయం ఉందని అనుమానిస్తూ, స్థానిక సదర్ పోలీస్ స్టేషన్‌లో ఫిర్యాదు చేశారు. తమ కుమారుడిని హత్య చేశారని ఆరోపిస్తూ బాధితుడి కుటుంబం పోలీసులకు ఫిర్యాదు చేయడంతో ఈ కేసు కీలక మలుపు తిరిగింది. ఈ ఫిర్యాదుపై వెంటనే కేసు నమోదు చేశామని, దర్యాప్తు కొనసాగుతోందని పోలీస్ సూపరింటెండెంట్ అభినవ్ సోంకర్ వెల్లడించారు.

 విద్యుదాఘాతంతోనే బిశ్వజిత్ బెహెరా మరణించినట్లుగా తమ ప్రాథమిక దర్యాప్తులో తేలినటలు పోలీస్ సూపరింటెండెంట్ అభినవ్ సోంకర్ తెలిపారు. అయితే, పూర్తి విచారణ జరిగిన తర్వాతే మరణానికి అసలు కారణం తెలుస్తుందని అన్నారు. ఈ సంఘటన సెప్టెంబర్ 28 రాత్రి జరగ్గా ఆలస్యంగా వెలుగులోకి వచ్చింది. మృతుడి కుటుంబ సభ్యులు మాత్రం బిశ్వజిత్‌ది హత్యే అని ఆరోపిస్తూ ఫిర్యాదు చేయడంతో పోలీసులు అన్ని కోణాల్లోనూ దర్యాప్తు చేస్తున్నారు.

ప్రేమ వ్యవహారాలు, రహస్యంగా కలుసుకోవడం వంటి అంశాలను దృష్టిలో ఉంచుకుని, యువకుడి మరణం వెనుక ఏమైనా ఉద్దేశపూర్వక చర్యలు ఉన్నాయా లేదా నిజంగానే అది ప్రమాదవశాత్తు జరిగిందా అనే కోణంలో పోలీసులు విచారణ చేస్తున్నారు. కరెంట్ షాక్‌కు గురైన ప్రాంతంలో వైర్లు ఏ స్థితిలో ఉన్నాయి, వాటికి ఎవరైనా ఉద్దేశపూర్వకంగా కరెంట్ పెట్టారా అనే విషయాలను కూడా పోలీసులు పరిశీలిస్తున్నారు. బిశ్వజిత్ బెహెరా మృతదేహం పోస్ట్‌మార్టం నివేదిక పోలీసుల దర్యాప్తులో కీలకం కానుంది.