ఇతరులతో సంబంధం పెట్టుకోవాలని,,,,బెడ్రూం వీడియోలతో భార్యను బెదిరించిన భర్త

కర్ణాటకలోని పుట్టెనహళ్లి ప్రాంతంలో వైవాహిక వేధింపులకు సంబంధించిన ఓ షాకింగ్ కేసు వెలుగులోకి వచ్చింది. భర్త, అతని కుటుంబ సభ్యులు తనను వేధించారని.. ఆ తర్వాత బ్లాక్‌మెయిల్ చేశారని.. అలాగే లైంగిక దోపిడీకి ప్రయత్నించారని ఆరోపిస్తూ ఒక మహిళ పోలీసులను ఆశ్రయించింది. సయ్యద్ ఇనాముల్ హక్ అనే వ్యక్తిని నిశ్చితార్థం జరిగిన 2 నెలల తర్వాత.. 2024 డిసెంబర్‌లో వివాహం చేసుకుంది. పెళ్లి సమయంలో 34 తులాల బంగారు ఆభరణాలు, ఒక యమహా బైక్‌ను కట్నం రూపంలో ఇచ్చారు. పెళ్లయిన కొద్ది రోజులకే.. తన భర్తకు ఇదివరకే పెళ్లి అయిందని ఆ మహిళ ఆరోపించింది.

పెళ్లి అయిన కొన్ని రోజులకే తన భర్త.. తాను రెండో భార్యను అని చెప్పాడని.. అంతేకాకుండా..అతడికి 19 మంది మహిళలతో సంబంధాలు ఉన్నాయని గొప్పగా చెప్పుకున్నాడని పోలీసులకు ఇచ్చిన ఫిర్యాదులో పేర్కొంది. ఇక తన భర్త తనను బ్లాక్‌మెయిల్ చేయడానికి దారుణమైన చర్యలకు పాల్పడ్డాడని ఆరోపించింది. తనకు తెలియకుండా రహస్యంగా తన భర్త.. బెడ్రూమ్‌లో కెమెరాను ఏర్పాటు చేసి.. వారిద్దరూ ఏకాంతంగా ఉన్న సమయంలో వీడియోలను రికార్డు చేసినట్లు తెలిపింది. అంతేకాకుండా.. ఆ వీడియోలను విదేశాల్లో ఉన్న తన ఫ్రెండ్స్‌కు పంపినట్లు పోలీసులకు తెలిపింది.

 ఇక విదేశాల్లోని తనకు తెలిసిన వారితో శారీరక సంబంధం పెట్టుకోవాలని తన భర్త తనపై ఒత్తిడి తీసుకువచ్చాడని పేర్కొంది. అందుకు తాను నిరాకరించడంతో.. తమ ఆ ప్రైవేట్ వీడియోలను సోషల్ మీడియాలో పెట్టి వైరల్ చేస్తానని బెదిరించినట్లు ఆవేదన వ్యక్తం చేసింది. తనను తన భర్త బహిరంగంగా.. హోటళ్లలో, చివరకు తన తల్లిదండ్రుల ఇంటి వద్ద కూడా పదేపదే శారీరక, మానసిక వేధింపులకు గురిచేశాడని ఆరోపించింది.

తమ పెళ్లి సమయంలో పెట్టిన తన బంగారు ఆభరణాలను అమ్మి ఒక ఫ్లాట్ కొనుగోలు చేయాలని భర్త ఒత్తిడి చేయగా.. తాను నిరాకరించినట్లు పేర్కొంది. అందుకు తనపై దాడికి పాల్పడ్డాడని తెలిపింది. ఇక ఫిబ్రవరిలో జరిగిన ఒక ఫ్యామిలీ ఫంక్షన్‌లో తన భర్త సోదరి తనను తీవ్రంగా అవమానించిందని.. ఆమె బావ తన పట్ల లైంగికంగా అనుచితంగా ప్రవర్తించాడని మహిళ ఆరోపించిందని తెలిపింది. దీంతో తన అత్తమామలను కూడా ఫిర్యాదులో పేర్కొంది. ఇక గతనెల 21వ తేదీన జరిగిన గొడవలో నిందితుడు తనపై దాడి చేసి.. తర్వాత ఇంట్లో నుంచి పారిపోయాడని వెల్లడించింది. బాధితురాలి ఫిర్యాదుతో భర్తతో పాటు ఇతర కుటుంబ సభ్యులపై కేసు నమోదు చేసిన పోలీసులు.. పరారీలో ఉన్న ప్రధాన నిందితుడి కోసం గాలింపు కొనసాగిస్తున్నట్లు తెలిపారు.