మొత్తం సమాచారమంతా క్యూఆర్ కోడ్‌లోనే, ,,,స్మార్ట్‌గా మారిపోనున్న నేషనల్ హైవేలు

దేశవ్యాప్తంగా జాతీయ రహదారులపై ప్రయాణించే వారికి మెరుగైన సౌకర్యం, భద్రత కల్పించేందుకు కేంద్ర ప్రభుత్వ రంగ సంస్థ అయిన నేషనల్ హైవేస్ అథారిటీ ఆఫ్ ఇండియా ( ఎన్‌హెచ్ఏఐ ) కీలక నిర్ణయం తీసుకుంది. ఇక నుంచి నేషనల్ హైవేల పొడవునా క్యూఆర్ కోడ్‌లతో కూడిన ప్రాజెక్ట్ సమాచార సైన్‌బోర్డులను ఏర్పాటు చేయనున్నట్లు శుక్రవారం ఒక ప్రకటనలో తెలిపింది. ఈ సరికొత్త క్యూఆర్ కోడ్ సైన్‌బోర్డులు ప్రయాణికులకు రహదారి భద్రతను పెంచడంతో పాటు.. ఏదైనా అత్యవసర సమయం ఎదురైనపుడు తక్షణం సహాయం కల్పించేందుకు వీలు కల్పిస్తాయని సంబంధిత వర్గాలు పేర్కొన్నాయి.

ఎన్‌హెచ్ఏఐ విడుదల చేసిన ప్రకటన ప్రకారం.. ఈ క్యూఆర్ కోడ్ ద్వారా ప్రయాణికులు ముఖ్యమైన సమాచారాన్ని సులభంగా పొందవచ్చు. ఈ క్యూఆర్ కోడ్‌లో నేషనల్ హైవే నంబర్, హైవే మైలురాయి, ప్రాజెక్ట్ పొడవుకు సంబంధించిన వివరాలు ఉంటాయి. హైవే పెట్రోలింగ్, టోల్ మేనేజర్, రెసిడెంట్ ఇంజనీర్ నంబర్లు సహా అత్యవసర పరిస్థితులు ఎదురైనపుడు ఫిర్యాదు చేయాల్సిన 1033 హెల్ప్‌లైన్ నంబర్ అందుబాటులో ఉంటాయి.

సమీపంలోని ఎన్‌హెచ్ఏఐ క్షేత్రస్థాయి కార్యాలయం.. ఆస్పత్రులు, పెట్రోల్ పంపులు, పబ్లిక్ టాయిలెట్లు, పోలీస్ స్టేషన్లు, రెస్టారెంట్లు, పంక్చర్ షాప్‌లు, వెహికల్ సర్వీస్ స్టేషన్ల్, ఎలక్ట్రిక్ ఛార్జింగ్ స్టేషన్ల వివరాలు క్యూఆర్ కోడ్‌లో నిక్షిప్తం చేస్తారు. సమీపంలో ఉన్న టోల్ ప్లాజా ఎంత దూరంలో ఉంది.. ట్రక్కులను నిలిపే స్థలానికి సంబంధించిన వివరాలను ఆ క్యూఆర్ కోడ్‌లో తెలపనున్నారు.

ప్రయాణికులు సులభంగా గుర్తించేందుకు వీలుగా ఈ క్యూఆర్ కోడ్ సైన్‌బోర్డులను ముఖ్యమైన ప్రాంతాల్లో ఏర్పాటు చేయనున్నారు. నేషనల్ హైవే ఎంట్రీ, ఎగ్జిట్ పాయింట్ల వద్ద.. టోల్ ప్లాజాల దగ్గర.. రోడ్డు పక్కన ఉండే రెస్ట్ ప్రాంతాల్లో.. ట్రక్కులు నిలిపే స్థలాల వద్ద.. ఇతర కీలక హైవే మైలురాళ్ల వద్ద వీటిని ఏర్పాటు చేయనున్నారు.

అయితే ఈ క్యూఆర్ కోడ్‌లను ఏర్పాటు చేయాలనే వినూత్న కార్యక్రమం ద్వారా.. రోడ్డు భద్రతను మరింత మెరుగుపరచడమే కాకుండా.. ప్రయాణికులకు అవసరమైన సమాచారాన్ని, ఎమర్జెన్సీ నంబర్లను వెంటనే గుర్తించే అవకాశం ఉంటుందని ఎన్‌హెచ్ఏఐ తెలిపింది. దీని ద్వారా వాహనదారులకు మరింత మెరుగైన అనుభవం కలగడమే కాకుండా.. దేశవ్యాప్తంగా నేషనల్ హైవేలపై అవగాహన పెరుగుతుందని ఎన్‌హెచ్ఏఐ తన ప్రకటనలో వెల్లడించింది.