పోరాడుతున్న వెస్టిండీస్ బ్యాటర్లు..రెండో రోజు ముగిసిన ఆట

భారత్, వెస్టిండీస్‌ మధ్య ఢిల్లీ వేదికగా జరుగుతున్న రెండో టెస్టులో రెండో రోజు ఆట ముగిసింది. తొలి ఇన్నింగ్స్‌లో భారత్.. 518/5 వద్ద ఇన్నింగ్స్‌ను డిక్లేర్డ్ ఇచ్చింది. అనంతరం బ్యాటింగ్ ప్రారంభించిన వెస్టిండీస్.. రెండో రోజు ఆట ముగిసే సమయానికి 4 వికెట్ల నష్టానికి 140 పరుగులు చేసింది. ప్రస్తుతం విండీస్ ఇంకా.. 378 పరుగులు వెనుకంజలో ఉంది. తొలి టెస్టులో దారుణంగా విఫలమైన వెస్టిండీస్ బ్యాటర్.. రెండో టెస్టులో మాత్రం పట్టుదలతో బ్యాటింగ్ చేస్తున్నారు.

ఓవర్‌నైట్ స్కోరు 318/2తో రెండో రోజు ఆట ప్రారంభించిన టీమిండియా.. మరో 200 పరుగులు జోడించి ఇన్నింగ్స్‌ను డిక్లేర్డ్‌ చేసింది. యశస్వి జైశ్వాల్ (177) డబుల్ సెంచరీని మిస్ చేసుకున్నాడు. కెప్టెన్ శుభ్‌మన్ గిల్ మాత్రం చక్కటి బ్యాటింగ్‌తో తన టెస్టు కెరీర్‌లో పదో సెంచరీ కొట్టాడు. ధ్రువ్ జురెల్ (44), నితీశ్ రెడ్డి (43) రన్స్ ఫర్వాలేదనిపించారు. శుభ్‌మన్ గిల్ 196 బంతుల్లో 129 రన్స్ చేసి అజేయంగా నిలిచాడు. వెస్టిండీస్ బౌలర్లలో వారికన్ 3 వికెట్లు తీయగా.. రోస్టన్ ఛేజ్ ఒక వికెట్ పడగొట్టాడు.

అనంతరం తొలి ఇన్నింగ్స్‌లో బ్యాటింగ్‌కు దిగిన వెస్టిండీస్.. ఆదిలోనే వికెట్ కోల్పోయింది. జట్టు స్కోరు 21 వద్ద జాన్ చాంప్‌బెల్‌ (10).. సాయి సుదర్శన్ పట్టిన అద్భుతమైన క్యాచ్‌కు వెనుదిరిగాడు. ఆ తర్వాత క్రీజులోకి వచ్చిన అలిక్ అథనాజే (41) తో కలిసి ఓపెనింగ్ బ్యాటర్ తగినరైన్ చంద్రపాల్ (34) కీలక భాగస్వామ్యం నెలకొల్పాడు. దీంతో ఓ దశలో విండీస్ 87/1తో మెరుగైన స్థితిలో కనిపించింది.

కానీ రవీంద్ర జడేజా మళ్లీ షాక్ ఇచ్చాడు. చంద్రపాల్‌ను ఔట్ చేసి బ్రేక్ త్రూ ఇచ్చాడు. ఆ తర్వాత కుల్‌దీప్ యాదవ్ కూడా వికెట్ల వేట ప్రారంభించాడు. కానీ షై హోప్ (31), తెవిన్ ఇమ్లాచ్ (14) మరో వికెట్ పడకుండా జాగ్రత్తగా ఆడారు. దీంతో వెస్టిండీస్ రెండో రోజు ఆటను 140/4తో ముగించింది. ఆ జట్టు ఇంకా 378 పరుగులు వెనుకంజలో ఉంది. ఇక టీమిండియా బౌలర్లలో రవీంద్ర జడేజా అత్యధికంగా మూడు వికెట్లు తీశాడు. కుల్‌దీప్ యాదవ్ ఒక వికెట్ పడగొట్టాడు.