ఎద్దుల బండిపై కారు డెలివరీ – రైతు స్టైల్ బెంగళూరులో హాట్ టాక్!

సినిమాల్లో మాత్రమే చూస్తాం — ఎద్దుల బండిలో వచ్చి ఖరీదైన కారు కొనడం! కానీ ఈ సారి అది నిజంగానే జరిగింది. కర్ణాటకలోని బెంగళూరుకు చెందిన రైతు SSR సంజు, లగ్జరీ టయోటా వెల్‌ఫైర్ (Toyota Vellfire) కారును కొనుగోలు చేసేందుకు ఎద్దుల బండిలో షోరూమ్‌కి చేరుకొని అందరినీ ఆశ్చర్యపరిచాడు.ఈ వినూత్న పద్ధతి వెనుక ఒక అర్థవంతమైన సందేశం దాగి ఉంది. సంజు ఈ విధంగా కారు కొనుగోలు చేయడం ద్వారా “రైతులు కూడా లగ్జరీ జీవితం ఆస్వాదించగలరని” ప్రపంచానికి గుర్తు చేయాలని భావించాడు.సంజు కేవలం రైతే కాదు, కార్ల పట్ల అపారమైన ఆసక్తి కలిగిన వ్యక్తి. ఇప్పటికే ఆయన గ్యారేజ్‌లో పోర్షే పనామెరా, ఫోర్డ్ ముస్తాంగ్, మసెరటి లెవాంటే, టయోటా ఫార్చ్యూనర్, ఇన్నోవా హైక్రాస్ వంటి లగ్జరీ కార్లు ఉన్నాయి. ఈసారి తన కొత్త కారు కొనుగోలును ప్రత్యేకంగా మార్చాలని నిర్ణయించి, షోరూమ్‌కి ఎద్దుల బండిలో వెళ్లడం ఆయన ఎంపిక అయ్యింది.వైరల్ అవుతున్న వీడియోలో ఎద్దుల బండిని అనుసరిస్తూ ఆయన ఇతర లగ్జరీ కార్లు కూడా వరుసగా వెనుక కనిపిస్తున్నాయి. ఆ దృశ్యాలు సోషల్ మీడియాలో చక్కర్లు కొడుతూ నెటిజన్ల దృష్టిని ఆకర్షిస్తున్నాయి.‘రైతు లగ్జరీ కారు కొంటున్నాడు’ అనే క్యాప్షన్‌తో యూట్యూబ్‌లో పోస్ట్ చేసిన వీడియోలో, సంజు తన కుమారులతో కలిసి కారు తీసుకుంటున్న సన్నివేశాలు చూడవచ్చు. షోరూమ్‌లోకి సెక్యూరిటీ గార్డులతో కలిసి ప్రవేశించి, తన కుమారులకు కారు వివరాలు చెబుతున్న దృశ్యాలు కూడా ఉన్నాయి.ఈ వీడియో సోషల్ మీడియాలో వేగంగా వైరల్ అవుతోంది. రైతు SSR సంజు యొక్క ఈ ప్రత్యేక ఆలోచనకు నెటిజన్లు ప్రశంసల వర్షం కురిపిస్తున్నారు.