"జడేజా కౌంటర్! గిల్, గంభీర్‌లకు క్లాస్ తీసిన ఆల్‌రౌండర్"

India vs West Indies: వెస్టిండీస్‌తో జరిగిన టెస్ట్ సిరీస్‌లో భారత్ 2-0 తేడాతో విజయం సాధించింది. ఈ సిరీస్‌లో అద్భుత ప్రదర్శన చేసిన రవీంద్ర జడేజా సిరీస్ హీరోగా నిలిచాడు. ఇది జడేజా కెరీర్‌లో మూడోసారి ప్లేయర్ ఆఫ్ ది సిరీస్ అవార్డు గెలుచుకున్న సందర్భం.అయితే ఈ అవార్డు అందుకున్న తర్వాత జడేజా కొన్ని ఆసక్తికర వ్యాఖ్యలు చేశాడు. ముఖ్యంగా టీం ఇండియా కాంబినేషన్, తన పాత్రపై పరోక్షంగా అసంతృప్తిని వ్యక్తం చేశాడు. శుభ్‌మన్ గిల్ ఎంపికపై కూడా జడేజా సూచనాత్మక వ్యాఖ్యలు చేశాడు.జడేజా మాట్లాడుతూ, “నాకు బౌలింగ్ చేసే అవకాశాలు కొంచెం ఎక్కువగా రావాలి. కానీ మేం ఒక జట్టుగా బాగా రాణిస్తున్నాం. గత ఐదు–ఆరు నెలలుగా మా బ్యాటింగ్, బౌలింగ్ రెండూ మెరుగుపడ్డాయి. జట్టు ప్రదర్శన చూసి సంతోషంగా ఉంది. ఇది మంచి సంకేతం” అని అన్నాడు.అలాగే గౌతమ్ గంభీర్ తనకు 6వ స్థానంలో బ్యాటింగ్ చేసే బాధ్యత ఇచ్చాడని, అందుకే తాను ఇప్పుడు ప్రధానంగా బ్యాట్స్‌మన్‌గా ఆలోచిస్తున్నానని జడేజా వివరించాడు. “ఇప్పుడే నేను 6వ స్థానంలో బ్యాటింగ్ చేస్తున్నాను. అందుకే నా ఆలోచనా విధానం కొంచెం మారింది. గతంలో 7వ లేదా 8వ స్థానాల్లో ఆడే వాడిని. ఇప్పుడు క్రీజులో ఎక్కువ సమయం గడపడానికి ప్రయత్నిస్తున్నాను. నిజాయితీగా చెప్పాలంటే, నేను రికార్డుల గురించి కాకుండా జట్టుకు ఎంత బాగా ఉపయోగపడగలనో ఆలోచిస్తాను” అని ఆయన స్పష్టం చేశాడు.జడేజా తన కెరీర్‌లో మూడవసారి ప్లేయర్ ఆఫ్ ది సిరీస్ అవార్డు గెలుచుకోవడం విశేషం. 2017లో ఆస్ట్రేలియాపై, 2023లో మళ్లీ ఆస్ట్రేలియాపై, ఇప్పుడు 2025లో వెస్టిండీస్‌పై ఈ ఘనత సాధించాడు. ఈ సిరీస్‌లో జడేజా 104 పరుగులు చేసి, ఎనిమిది వికెట్లు తీయడం ద్వారా రెండు వైపులా రాణించాడు. మొదటి టెస్ట్‌లో ప్లేయర్ ఆఫ్ ది మ్యాచ్‌గా కూడా ఎంపికయ్యాడు.మొత్తం 11 సార్లు ప్లేయర్ ఆఫ్ ది మ్యాచ్ అవార్డులు గెలుచుకున్న జడేజా, ప్రస్తుతం టెస్ట్ ఫార్మాట్‌లో భారత్‌కు ముఖ్యమైన మ్యాచ్ విన్నర్, ప్రపంచవ్యాప్తంగా నంబర్ వన్ ఆల్‌రౌండర్గా మరోసారి తన స్థానాన్ని పటిష్ఠం చేసుకున్నాడు.