స్టాక్ మార్కెట్‌లో దూసుకుపోతున్న స్మాల్ క్యాప్ కంపెనీ

స్టాక్ మార్కెట్‌లో ఓ స్మాల్ క్యాప్ కంపెనీ షేరు అనూహ్యంగా దూసుకెళ్లింది. ఏడాది వ్యవధిలోనే లక్ష రూపాయల పెట్టుబడిని ఏకంగా కోటిన్నర రూపాయలకు పైగా మార్చేసింది. అయితే ఈ అసాధారణ పెరుగుదల వెనుక క్రికెట్ దిగ్గజం సచిన్ టెండూల్కర్ ఉన్నారంటూ సోషల్ మీడియాలో పెద్ద ఎత్తున ప్రచారం జరిగింది. ఈ నేపథ్యంలో ఆ కంపెనీయే స్వయంగా రంగంలోకి దిగి, అసలు వాస్తవాలను వెల్లడిస్తూ కీలక ప్రకటన చేసింది.ఆర్‌ఆర్‌పీ సెమీకండక్టర్ లిమిటెడ్ అనే కంపెనీ, తమ సంస్థలో సచిన్ టెండూల్కర్ పెట్టుబడులు పెట్టారని వస్తున్న వార్తల్లో ఎలాంటి నిజం లేదని స్పష్టం చేసింది. ఈ మేరకు నియంత్రణ సంస్థలకు సమర్పించిన ఫైలింగ్‌లో పలు విషయాలను తేల్చి చెప్పింది. "సచిన్ టెండూల్కర్ మా కంపెనీలో వాటాదారు కాదు, ఆయన మా షేర్లను ఎప్పుడూ కొనలేదు. ఆయనకు మా కంపెనీ బోర్డు సభ్యులతో ప్రత్యక్షంగా గానీ, పరోక్షంగా గానీ ఎలాంటి సంబంధాలు లేవు. ఆయన మా బ్రాండ్ అంబాసిడర్ కూడా కాదు" అని ఆర్‌ఆర్‌పీ సెమీకండక్టర్ తన ప్రకటనలో పేర్కొంది.కొంతమంది వ్యక్తులు సోషల్ మీడియాలో ఉద్దేశపూర్వకంగా తప్పుడు సమాచారాన్ని వ్యాప్తి చేస్తున్నారని కంపెనీ ఆరోపించింది. ఈ పుకార్ల కారణంగానే గత 10 నెలల్లో తమ కంపెనీ షేరు ధర రూ.10 నుంచి దాదాపు రూ.9,000 స్థాయికి పెరిగిందని అంగీకరించింది. మహారాష్ట్ర ప్రభుత్వం నుంచి తమకు 100 ఎకరాల భూమి కేటాయించారన్న ప్రచారాన్ని కూడా ఖండించింది.గణాంకాలను పరిశీలిస్తే, ఈ షేరు పనితీరు ఆశ్చర్యం కలిగిస్తుంది. గత ఏడాదిలో ఈ షేరు ధర రూ. 66 నుంచి ప్రస్తుతం రూ. 8,584 స్థాయికి చేరి, ఏకంగా 13,000 శాతం రాబడిని అందించింది. ఈ ఏడాదిలోనే 4,527 శాతం పెరిగింది. గత ఆరు నెలలుగా ప్రతిరోజూ 2 శాతం అప్పర్ సర్క్యూట్‌ను తాకుతూనే ఉంది. అయితే, కంపెనీ ఆర్థిక పనితీరుకు, షేరు ధరలో కనిపిస్తున్న ఈ తీవ్రమైన పెరుగుదలకు ఏమాత్రం పొంతన లేదని యాజమాన్యం స్పష్టం చేయడం గమనార్హం. గత ఆర్థిక సంవత్సరంలో కంపెనీ ఆదాయం రూ. 38 లక్షల నుంచి రూ. 31.59 కోట్లకు పెరిగినప్పటికీ, ప్రస్తుత షేరు విలువకు అది సరితూగదని కంపెనీయే స్వయంగా వెల్లడించింది.