హిందీ పాటలు, హోర్డింగులు, సినిమాలపై నిషేధం,,,,తమిళనాడు సర్కారు సంచలన నిర్ణయం

త్రిభాషా సూత్రం అమలు విషయంలో కేంద్ర ప్రభుత్వం, తమిళనాడు ప్రభుత్వం మధ్య నెలకొన్న విభేదాలు మరింత తీవ్రం అవుతున్నాయి. ఈ వివాదాల నేపథ్యంలోనే.. విద్యా విధానంలో మార్పులు చేసిన ముఖ్యమంత్రి ఎంకే స్టాలిన్ నేతృత్వంలోని డీఎంకే ప్రభుత్వం తాజాగా రాష్ట్రంలో హిందీ భాషకు వ్యతిరేకంగా ఒక కీలకమైన నిర్ణయం తీసుకునేందుకు సిద్ధమవుతున్నట్లు తెలుస్తోంది. ముఖ్యంగా రాష్ట్రంలో హిందీ భాషను నిషేధించే లక్ష్యంతో తమిళనాడు అసెంబ్లీలో ఒక బిల్లును ప్రవేశపెట్టనున్నట్లు సంబంధిత వర్గాలు వెల్లడిస్తున్నాయి. ఈ ప్రతిపాదిత చట్టం రూపకల్పన, న్యాయపరమైన అంశాలపై చర్చించడానికి గాను మంగళవారం రోజు రాత్రి న్యాయ నిపుణులు, ప్రభుత్వ ఉన్నతాధికారుల మధ్య అత్యవసర సమావేశం జరిగినట్లు సమాచారం.

జాతీయ మీడియాలో వచ్చిన కథనాల ప్రకారం.. ఈ బిల్లు రాష్ట్రం మొత్తం హిందీ హోర్డింగులు, సినిమాలు పాటలపై నిషేధం విధించబోతున్నట్లు తెలుస్తోంది. అయితే ఈ బిల్లును భారత రాజ్యాంగ నిబంధనలకు లోబడే రూపొందించినట్లు ప్రభుత్వ వర్గాలు తెలియజేస్తున్నాయి. మరోవైపు తమిళనాడుపై హిందీ భాషను బలవంతంగా రుద్దడానికి బీజేపీ తీవ్రంగా ప్రయత్నిస్తోందని డీఎంకేతో సహా అనేక రాజకీయ పార్టీలు గత కొంతకాలంగా ఆరోపణలు చేస్తున్నాయి. దీనిని అడ్డుకోవడంలో భాగంగానే డీఎంకే ప్రభుత్వం చట్టపరమైన చర్యలకు సిద్ధం అవుతోంది.

హిందీ భాషను బలవంతంగా రుద్దడానికి వ్యతిరేకంగా తమిళనాడు శాసనసభ ఇటీవల ఒక కీలకమైన తీర్మానాన్ని ఆమోదించింది. అధికార భాషలపై ఏర్పాటు చేసిన పార్లమెంటరీ కమిటీ నివేదికలోని సిఫారసులను అమలు చేయవద్దని ఆ తీర్మానంలో కేంద్ర ప్రభుత్వాన్ని కోరారు. ముఖ్యమంత్రి ఎంకే స్టాలిన్ ఈ తీర్మానాన్ని అసెంబ్లీలో ప్రవేశపెడుతూ.. సెప్టెంబర్ 9వ తేదీన రాష్ట్రపతికి పార్లమెంటరీ కమిటీ నివేదించిన సిఫారసులు తమిళం సహా ఇతర రాష్ట్రాల భాషలకు, వాటిని మాట్లాడే ప్రజల ప్రయోజనాలకు విరుద్ధంగా ఉన్నాయని స్పష్టం చేశారు. ఆ తీర్మానంలో మరో ముఖ్యమైన అంశాన్ని కూడా ఆయన ప్రస్తావించారు.

హిందీయేతర భాషలు మాట్లాడే రాష్ట్రాలకు భారత తొలి ప్రధాని పండిట్ జవహర్‌లాల్ నెహ్రూ ఇచ్చిన హామీకి పార్లమెంటరీ కమిటీ సిఫారసులు వ్యతిరేకంగా ఉన్నాయని పేర్కొన్నారు. అప్పట్లో నెహ్రూ ఇచ్చిన హామీ ప్రకారం.. హిందీయేతర రాష్ట్రాలు కోరుకునేంత వరకు ఆంగ్లం అధికారిక భాషగా కొనసాగుతుంది. ఈ తీర్మానాన్ని తమిళనాడు అసెంబ్లీ పూర్తి మద్దతుతో ఆమోదించింది. ఈక్రమంలోనే తాజాగా హిందీ హోర్డింగ్‌లు, వినోద మాధ్యమాలపై నిషేధం కోరుతూ బిల్లును తీసుకురావాలని ప్రభుత్వం నిర్ణయించడంతో.. అంతా ఆశ్చర్యపోతున్నారు.