కొత్త బిల్లు తీసుకొచ్చిన సెనెట్,,,అమెరికాలో ట్రక్కు డ్రైవర్లకు ఇంగ్లీష్ కష్టాలు

అమెరికా రోడ్లు అంటేనే పెద్ద పెద్ద ట్రక్కులు, వేగంగా దూసుకుపోయే వాహనాలు. అక్కడి రోడ్లు మొత్తం గుంతలు లేకుండా ఉండటంతో రయ్‌మంటూ దూసుకెళ్తుంటాయి. దీంతో ట్రక్కు డ్రైవర్లకు సరికొత్త కష్టాలు వచ్చాయి. ఇంగ్లీష్ రాకుండా బాధపడుతూ ఉండే ట్రక్కు డ్రైవర్లకు అమెరికాలో ఇప్పుడు కొత్త చిక్కులు వచ్చి పడ్డాయి. అయితే.. ఇటీవల ఫ్లోరిడా టర్న్‌పైక్ మీద జరిగిన ఒక ఘోర రోడ్డు ప్రమాదం.. ఇప్పుడు దేశం దృష్టిని మొత్తం అటు వైపు తిప్పింది. ఆ యాక్సిడెంట్‌కు అసలు కారణం ఏంటని అధికారులు ఆరా తీయగా.. అసలు ఆ ప్రమాదం చేసిన ట్రక్కు డ్రైవర్‌కు సరిగా ఇంగ్లీష్ రాదు అనే విషయం బయటికి వచ్చింది. రోడ్డు మీద ఉండే ట్రాఫిక్ గుర్తులు అర్థం చేసుకోలేక.. వాటిని కమ్యూనికేట్ చేయలేక పోవడం వల్లే ఈ ఘోరం జరిగిందని తేలింది.

ఈ ఘటనను అమెరికా సెనెట్ తీవ్రంగా తీసుకుంది. ట్రక్కు డ్రైవర్లకు ఇంగ్లీష్ భాషలో పట్టు ఉండాల్సిందేనని కొత్త బిల్లు తెచ్చింది. అంటే ఇక నుంచి ఇంగ్లీష్‌తో ఆడుకోవడానికి లేదు అంటూ గట్టి వార్నింగ్ ఇచ్చేసింది. ఈ బిల్లు పాస్ అయితే.. దేశవ్యాప్తంగా కమర్షియల్ ట్రక్కు డ్రైవర్లు అందరూ మళ్లీ ఇంగ్లీష్ టెస్టులు రాయాల్సి వస్తుంది. ఈ టెస్ట్‌లో ఫెయిల్ అయితే.. అప్పటికప్పుడే అవుట్ ఆఫ్ సర్వీస్ అనే బోర్డు తగిలించేసి.. వారిని బండి నడపకుండా ఆపేస్తారు. అంటే వారిని ఉద్యోగం నుంచి తొలగిస్తారు.

అయితే ఇది డ్రైవర్లపై వివక్షలా కొంతమందికి అనిపించవచ్చు.. కానీ ఇండస్ట్రీ లీడర్స్, సెనెటర్లు మాత్రం దీన్ని ఒక భద్రతా పరమైన విషయంగా చూస్తున్నారు. హైవేపై వెళ్తున్నపుడు.. పక్కన భారీ ట్రక్కు నడుపుతున్న డ్రైవర్‌కు ట్రాఫిక్ సైన్‌బోర్డులు ఏవి అర్థం కాకపోయినా.. యాక్సిడెంట్ జరిగితే పోలీసులు, అంబులెన్స్, ఫైర్ సిబ్బందితో మాట్లాడేందుకు భాష రాకపోతే అలాంటి పరిస్థితుల్లో ప్రాణాలకే ప్రమాదం కదా అంటూ ఈ బిల్లును సమర్థిస్తున్నవారు చెబుతున్నారు. బేసిక్ కమ్యూనికేషన్ స్కిల్స్, రోడ్డు నియమాలను అర్థం చేసుకోవడానికి ఇంగ్లీష్‌ను ఒక నాన్ నెగోషియబుల్ సేఫ్టీ అవసరంగా మార్చేశారు.

అమెరికన్ ట్రక్ ఇండస్ట్రీలో చాలా మంది ఇతర దేశాల నుంచి వచ్చిన వలస డ్రైవర్లు ఉన్నారు. వారిలో చాలా మందికి ఇంగ్లీష్ కమ్యూనికేషన్ స్కిల్స్ కావాల్సినంత ఉండవు. ఇన్నాళ్లూ ఎలాగోలా మేనేజ్ చేశారు కానీ.. ఇప్పుడు కొత్తగా బిల్లు తీసుకురావడంతో వాళ్లకు పెద్ద తలనొప్పిగా మారింది. ఒకపక్క డ్రైవర్ల కొరతతో ఇండస్ట్రీ సతమతమవుతుంటే.. సరికొత్త రూల్స్ వల్ల అర్హత కలిగిన డ్రైవర్లు మరింత తగ్గిపోయే ప్రమాదం ఉందని పలువురు అభిప్రాయపడుతున్నారు. ఇప్పటికే ట్రక్కు నడుపుతున్న వాళ్లు మళ్లీ చదువుకోవాలా.. లేదా కోచింగ్ తీసుకోవాలా అనే డైలమాలో పడ్డారు.

ఈ బిల్లు ప్రస్తుతం కమిటీ రివ్యూలో ఉంది. కానీ.. దీనికి వస్తున్న మద్దతును చూస్తుంటే త్వరలోనే చట్టంగా మారే అవకాశం ఉందని తెలుస్తోంది. రోడ్ సేఫ్టీ కోసమే ఈ బిల్లు తీసుకువస్తున్నట్లు చెబుతున్నా.. ఇది చాలా మంది డ్రైవర్ల జీవితాలను, ట్రక్ బిజినెస్‌ను కూడా ప్రభావితం చేయబోతోందనే ఆందోళనలు వ్యక్తం అవుతున్నాయి. అమెరికన్ హైవేలపై ఇకపై ఇంగ్లీష్ మాటే చెల్లుతుందని.. డ్రైవర్లు ఈ కొత్త ఛాలెంజ్‌కి రెడీ అవ్వాల్సిందే అంటూ సంబంధిత వర్గాలు చెబుతున్నాయి.