భారత్‌, అఫ్గన్‌తో ఏకకాలంలో రెండు యుద్ధాలకు రెడీ.. పాక్‌ మంత్రి ఉత్తర ప్రగల్భాలు

దాయాది పాకిస్థాన్ మరోసారి కవ్వింపులకు దిగింది. అఫ్గనిస్థాన్‌, పాకిస్థాన్ సరిహద్దుల్లో ప్రస్తుతం కొనసాగుతోన్న ఘర్షణలను భారత్‌తో ముడిపెట్టింది. సరిహద్దుల్లో భారత్‌ కపటంగా వ్యవహరించే అవకాశాలున్నాయని పాక్ రక్షణ మంత్రి ఖ్వాజా ఆసిఫ్‌ కారుకూతలు కూశారు. అఫ్గన్‌తో సరిహద్దుల్లో ఉద్రిక్తతల వేళ ఓ టీవీ ఛానెల్‌కు ఇచ్చిన ఇంటర్వ్యూలో పాక్ రక్షణ మంత్రికి.. ఇండియాతోనూ ఉద్రిక్తతలు పెరిగితే ఎలా? అనే ప్రశ్న ఎదురయ్యింది. దీనికి ‘‘అవును.. దీన్ని కొట్టిపారేయలేం. ఏకకాలంలో రెండు యుద్ధాలను ఎదుర్కొడానికి మేము సిద్ధంగా ఉన్నాం... దీనికి మా దగ్గర వ్యూహాలు ఉన్నాయి. ప్రస్తుతం వాటి గురించి నేను చర్చించను’’ అని పాకిస్థాన్ రక్షణ మంత్రి అసిఫ్ సమాధానం ఇచ్చారు.

ఈ క్రమంలోనే భారత్‌‌పై పాక్ మంత్రి నోరుపారేసుకున్నారు. సరిహద్దుల్లో భారత్ డర్టీ గేమ్స్ ప్లే చేస్తుందని పిచ్చివాగుడు వాగారు. అలాగే పాకిస్థాన్‌లోని అఫ్గన్ శరణార్థులపై కూడా అనుచిత వ్యాఖ్యలు చేశారు. ‘‘వారివల్ల మా దేశానికి ఎలాంటి ప్రయోజనం లేకపోగా ఉగ్రవాద చర్యలకు తెగబడుతున్నారు. పాకిస్థాన్‌లో అక్రమంగా నివసిస్తున్న అఫ్గన్లను గుర్తిస్తున్నాం. తక్షణమే వారు మా దేశాన్ని వీడాలి’’ అని హెచ్చరించారు. భారత్‌పై పాకిస్థాన్ రక్షణ మంత్రి రెచ్చగొట్టే వ్యాఖ్యలు చేయడం ఇదే మొదటిసారి కాదు. తాలిబన్లను ముందుండి భారత్ నడిపిస్తోందని ఆరోపణలు చేశారు.

సరిహద్దుల్లో అఫ్గన్, పాక్ పరస్పరం దాడులు చేసుకోవడంతో ఇరు దేశాలకు ప్రాణనష్టం సంభవించింది. తాలిబన్ మంత్రి తొలిసారి భారత్‌లో పర్యటిస్తున్న సమయంలో కాబూల్ సహా అఫ్గన్‌లోని పలుచోట్ల పాకిస్థాన్ వైమానిక దాడులు చేసింది. దీనికి ప్రతీకారంగా అఫ్గన్ సరిహద్దుల్లోని పాకిస్థాన్ సైనిక స్థావరాలపై తాలిబన్లు విరుచుకుపడ్డారు. అయితే, అఫ్గన్‌ విదేశాంగ మంత్రి ఢిల్లీలో ఉన్నారని, భారత ఆదేశాల ప్రకారమే తమపై దాడులు జరిగాయని దాయాది ఆరోపించింది. తమపై తాలిబన్లతో భారత్‌ పరోక్షంగా యుద్ధం చేయిస్తోందని ఖ్వాజా ఆసిఫ్‌ విమర్శించారు.

ఈ విమర్శలను భారత్ తిప్పికొట్టింది. ‘‘ఉగ్రవాద సంస్థలకు ఆశ్రయం కల్పించి, వారి కార్యకలాపాలను పాకిస్థాన్ ప్రోత్సహిస్తోంది. తన అంతర్గత వైఫల్యాలను ఇతరులపై నెట్టేయడం వారికి అలవాటు. తన సొంత భూభాగాలపై అఫ్గన్ సార్వభౌమత్వాన్ని చెలాయించడం పాక్‌కు కంటిగింపు కలిగిస్తోంది’ అని విదేశాంగ శాఖ కౌంటర్ ఇచ్చింది.