ఐటీఐ చదివిన వారికి .. ఆర్టీసీలో అప్రెంటీస్‌షిప్ చేసే ఛాన్స్

ఆంధ్రప్రదేశ్‌‌లో ఐటీఐ చదివిన విద్యార్థులకు APSRTC గుడ్ న్యూస్ వినిపించింది. ఆర్టీసీలో అప్రెంటీస్‌షిప్ చేసేందుకు అవకాశం కల్పిస్తోంది. అయితే ఇది కేవలం ఉమ్మడి అనంతపురం జిల్లాకు మాత్రమే. అంటే అనంతపురం, శ్రీసత్యసాయి జిల్లాలోని ట్రేడ్లలో ఖాళీలుగా ఉన్న పోస్టులకు అప్రెంటీస్‌షిప్ కింద పనిచేయడానికి అవకాశం కల్పిస్తున్నారు. అర్హత, ఆసక్తి కలిగిన వారు అక్టోబర్ 25వ తేదీ నుంచి నవంబర్ 8వ తేదీ వరకూ దరఖాస్తు చేసుకునేందుకు వీలుంది. ఐటీఐ చదివిన వారు అర్హులు. ఏవైనా సందేహాలు ఉంటే 08518257025 నంబర్‌ను సంప్రదించాలని అధికారులు సూచిస్తున్నారు. అలాగే www.apprenticeshipindia.gov.in వెబ్‌సైట్ సందర్శించాలని సూచిస్తున్నారు.

మరోవైపు ఉమ్మడి అనంతపురం జిల్లాలో ట్రేడ్ల వారీగా 84 ఖాళీలు ఉన్నట్లు ఆర్టీసీ అధికారులు వెల్లడించారు. అనంతపురం జిల్లాకు సంబంధించి డీజిల్ మెకానిక్ 37, మోటార్ మెకానిక్ 5, ఎలక్ట్రీషియన్ 4, వెల్డర్, పెయింటర్, ఫిట్టర్, డ్రాఫ్ట్‌మెన్ సివిల్ ఒక్కొక్కటి ఖాళీగా ఉన్నట్లు అధికారులు తెలిపారు.అలాగే శ్రీసత్యసాయి జిల్లాకు సంబంధించి డీజిల్ మెకానక్ 25, మోటార్ మెకానిక్ 3, ఎలక్ట్రీషియన్ 3, వెల్డర్, పెయింటర్, డ్రాఫ్ట్‌మన్ సివిల్ ఒక్కొక్క ఖాళీ ఉన్నట్లు ఓ ప్రకటనలో ఆర్టీసీ అధికారులు వెల్లడించారు.

మరోవైపు ఏపీఎస్ఆర్టీసీ ఉద్యోగులకు ప్రభుత్వం దీపావళి కానుక ఇచ్చింది. ఎన్నో రోజులుగా ఎదురుచూస్తున్న ప్రమోషన్లు కల్పించింది. ఆరేళ్లుగా ఆర్టీసీ ఉద్యోగులు ప్రమోషన్ల కోసం ఎదురుచూస్తున్నారు. ఈ నేపథ్యంలో వీరందరికీ ఏపీ ప్రభుత్వం దీపావళి కానుక ఇచ్చింది. నాలుగు కేడర్ల ఉద్యోగులకు ప్రమోషన్లకు అవకాశం కల్పిస్తూ ఆదివారం ఉత్తర్వులు జారీ చేసింది. ముఖ్యమంత్రి నారా చంద్రబాబు నాయుడు శనివారం ఉద్యోగ సంఘాల నేతలతో భేటీ అయ్యారు.

ఈ సందర్భంగా దీపావళికి ఆర్టీసీ ఉద్యోగుల ప్రమోషన్ల ఫైల్ క్లియర్ చేస్తామన్నారు. అన్నట్లుగానే ఆదివారం ఉత్తర్వులు జారీ చేశారు. దీంతో ఆర్టీసీ డ్రైవర్లు, కండక్టర్లు, మెకానిక్‌లు, ఆర్జీజన్స్‌ కేడర్‌ఉద్యోగులకు ప్రమోషన్లు లభించనున్నాయి. పెనాల్టీలు, పనిష్మెంట్లు, క్రమశిక్షణ చర్యలు, ఛార్జెస్‌ వంటి వాటితో సంబంధం లేకుండా ప్రమోషన్లు కల్పిస్తోంది.

మరోవైపు ఆర్టీసీ ఉద్యోగులుగా ఉన్నప్పుడు గతంలో వారికి ఈ విధమైన మినహాయింపు ఉండేది. అయితే 2020లో ప్రభుత్వంలో విలీనమైన తర్వాత.. ఇతర శాఖల ఉద్యోగుల నిబంధనలే ఆర్టీసీ ఉద్యోగులకు కూడా వర్తించాయి. దీంతో వాటి నుంచి మినహాయింపు ఇవ్వాలని ఆర్టీసీలోని ఉద్యోగ సంఘాలు చాలాకాలంగా ప్రభుత్వాన్ని కోరుతున్నాయి.