ఏకంగా 10 కిలోల బంగారంతో,,,ప్రపంచంలోనే అత్యంత ఖరీదైన డ్రెస్

ప్రపంచవ్యాప్తంగా దుబాయ్ పేరు చెబితేనే లగ్జరీ అనే పదం గుర్తుకు వస్తూ ఉంటుంది. అక్కడి అద్భుతమైన కళాత్మకత, విలాసవంతమైన ఆకర్షణకు ప్రపంచ దేశాలు మంత్రముగ్ధులు అవుతూ ఉంటాయి. తాజాగా దుబాయ్ ఆవిష్కరించిన ఓ కళాఖండం.. సరికొత్త మైలురాయిని చూపించింది. ఈసారి అది ప్రపంచంలోనే అత్యంత బరువైన బంగారు దుస్తుల రూపంలో ఉండటం గమనార్హం. సౌదీ అరేబియాకు చెందిన ప్రముఖ బంగారం, ఆభరణాల బ్రాండ్ అయిన అల్ రొమైజాన్ గోల్డ్ తయారు చేసిన ఈ అద్భుతమైన బంగారు దుస్తులకు దుబాయ్ డ్రెస్ అని నామకరణం చేశారు.

ఈ ప్రత్యేకమైన బంగారు దుస్తుల బరువు సుమారు 22 పౌండ్లు అంటే 10.5 కిలోల బరువు కలిగి ఉంటుంది. ఇది ప్రపంచంలోనే అత్యంత బరువైన బంగారు దుస్తులుగా గిన్నిస్ బుక్ ఆఫ్ వరల్డ్ రికార్డ్స్‌లో అధికారికంగా చోటు దక్కించుకుంది. ఇది పూర్తిగా 24 క్యారెట్ల స్వచ్ఛమైన బంగారంతో తయారు చేశారు. ఈ బంగారు డ్రెస్ తయారీకి అయిన ఖర్చు 10.88 లక్షల డాలర్లు అంటే భారత కరెన్సీలో సుమారు రూ.9.5 కోట్లు అన్నమాట. ఈ విషయం తెలిసిన తర్వాత ప్రతీ ఒక్కరు ఆ ధర విని నోరెళ్లబెడుతున్నారు.

ఈ బంగారు దుస్తులు వజ్రాలు, కెంపులు, పచ్చలు వంటి అద్భుతమైన విలువైన రాళ్లతో అలంకరించబడి ఉన్నాయి. అంతేకాకుండా మధ్యప్రాచ్య కళాత్మకత ద్వారా ప్రేరణ పొందిన క్లిష్టమైన డిజైన్‌తో రూపొందించారు. అల్ రొమైజాన్ గోల్డ్ వెల్లడించిన వివరాల ప్రకారం ఈ బంగారు దుస్తుల్లో పలు ముఖ్య భాగాలు ఉన్నాయి. ఈ దుబాయ్ డ్రెస్ మరీ ముఖ్యంగా నాలుగు భాగాలను కలిగి ఉందని తెలిపింది. గోల్డ్ టియారా అంటే కిరీటం 398 గ్రాముల బంగారంతో తయారు చేశారు.

ఇక స్టేట్‌మెంట్ నెక్లెస్ అంటే ప్రధాన హారం 8.810 కిలోలతో రూపొందించారు. 134.1 గ్రాముల గోల్డ్‌తో చెవిపోగులు తయారు చేశారు. హియార్ అంటే నడుము ఆభరణం 738.5 గ్రాముల బంగారంతో తీర్చిదిద్దారు. ఈ అద్భుతమైన బంగారు డ్రెస్ కళాఖండాన్ని షార్జాలో జరిగిన 56వ మిడిల్ ఈస్ట్ వాచ్ అండ్ జ్యువెలరీ షోలో ప్రపంచానికి పరిచయం చేశారు.

ఇక ఈ బంగారు దుస్తులను తయారు చేసిన అల్ రొమైజాన్ గోల్డ్ కంపెనీ.. ఫైన్ జ్యువెలరీ, హాట్ కాచర్ ప్రపంచాలను విలీనం చేసి.. ఫ్యాషన్ అనేది ధరించగలిగే కళారూపం అని చూపించడమే తమ లక్ష్యమని తెలిపింది. ఈ విలాసవంతమైన గౌనును వాణిజ్యపరమైన అమ్మకం కోసం రూపొందించలేదని తేల్చి చెప్పింది. ప్రపంచవ్యా్ప్తంగా ఎంపిక చేసిన అత్యంత విలాసవంతమైన ప్రదర్శనలు.. యూరప్, ఆసియాలోని విలాసవంతమైన షోకేస్‌లలో మాత్రమే ప్రదర్శిస్తామని వెల్లడించింది.