‘ఇంటిపేరు’ కారణంగా సర్ఫరాజ్ ఖాన్‌కు మొండిచెయ్యి.. కాంగ్రెస్ నేత సంచలన ఆరోపణలు

దక్షిణాఫ్రికా పర్యటనకు బీసీసీఐ ప్రకటించిన భారత్ ఎ జట్టులో సర్ఫరాజ్ ఖాన్‌కు చోట్టుదక్కని సంగతి తెలిసిందే. ఈ విషయంలోనే భారత సెలక్టర్లపై విమర్శలు వెల్లువెత్తుతున్నాయి. కేవలం రెండు నెలల్లోనే దాదాపు 17 కిలోల వరకూ తగ్గి ఫిట్‌నెస్‌ సాధించిన సర్ఫరాజ్.. దేశవాళీలోనూ ఫర్వాలేదనిపించే ప్రదర్శన చేశాడు. కానీ, అతడికి భారత్‌ A జట్టులో చోటుదక్కపోవడంపై కాంగ్రెస్ నాయకురాలు షామా మొహమ్మద్ సంచలన వ్యాఖ్యలు చేశారు. టీమిండియా హెడ్ కోచ్ గౌతమ్ గంభీర్‌పై కాంగ్రెస్ జాతీయ అధికార ప్రతినిధి అయిన షామా తీవ్రస్థాయిలో విరుచుకుపడ్డారు. మతపరమైన పక్షపాతంతో గంభీర్ వ్యవహరిస్తున్నారని ఆమె ఆరోపించారు.

‘‘ఇంటిపేరు కారణంగా సర్ఫరాజ్ ఖాన్ ఎంపిక కాలేదా?! జస్ట్ ఆస్కింగ్.. ఈ విషయంలో గౌతమ్ గంభీర్ వైఖరి ఏంటో మాకు తెలుసు’ అని ఎక్స్ (ట్విట్టర్) వేదికగా షామా మొహమ్మద్ పోస్ట్ చేశారు. గతంలో హిట్‌మాన్య రోహిత్ శర్మపై షామా వివాదాస్పద వ్యాఖ్యలు చేసి, తీవ్ర ఆగ్రహాన్ని ఎదుర్కొన్న సంగతి తెలిసిందే. అధిక బరువుతో ఉన్న రోహిత్ శర్మ ఇప్పటి వరకూ ఉన్న టీమిండియా కెప్టెన్ల కంటే టాలెంటెడ్ కాదంటూ బాడీ షేమింగ్‌కు పాల్పడ్డారు. ఆ తర్వాత ఫాస్ట్ బౌలర్ షమీని ఉద్దేశించి కూడా ఆమె చేసిన వ్యాఖ్యలు వైరల్ అయ్యాయి.

కాగా, తాజాగా షామా మొహమ్మద్ చేసిన వ్యాఖ్యలపై మండిపడిన బీజేపీ.. మతపరంగా భారత జట్టును కాంగ్రెస్ విభజించే ప్రయత్నం చేస్తోందని ఆరోపించింది. ‘‘ఈ నీచమైన ట్వీట్‌ కాంగ్రెస్‌ పార్టీ విభజన ఆలోచనలను, సంకుంచిత మనస్తత్వాన్ని బహిర్గతం చేసింది. మతపరంగా టీమిండియాను విభజించేందుకు కాంగ్రెస్ ప్రయత్నిస్తోంది. ఇది తీవ్రంగా ఖండించదగింది. చాలాకాలంగా విభజన రాజకీయాలను కాంగ్రెస్ పార్టీ ప్రధాన ఆయుధంగా వాడుకుంటోంది’’ అని బీజేపీ అధికార ప్రతినిధి సీఆర్ కేశవన్ అన్నారు. అంతేకాదు, గతంలో రోహిత్ శర్మపై కూడా షామా బాడీ షేమింగ్ వ్యాఖ్యలను గుర్తుచేశారు.

మరోవైపు, కాంగ్రెస్ అధికార ప్రతినిధి వ్యాఖ్యలను మాజీ క్రికెటర్ అతుల్ వాసన్ ఖండించారు. ‘సర్ఫరాజ్ ఖాన్‌కు దక్కాల్సిన గౌరవం, అవకాశాలు ఇవ్వడం లేదని నేను అంగీకరిస్తున్నాను. కానీ ఆమె (మొహమ్మద్) లేదా కాంగ్రెస్ ఆరోపిస్తున్నట్టు టీమిండియాలో ఇలా ఎప్పుడూ జరగలేదు. మనం పదే పదే ఈ మతం కార్డు వింటూనే ఉంటాం’ అని అన్నారు. ఇదిలా ఉండగా భారత ఏ జట్టులోకి సర్ఫరాజ్ ఖాన్‌ను తీసుకోకపోవడంపై ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ సైతం తీవ్రంగా స్పందించారు. ‘సర్ఫరాజ్‌కు ఎందుకు అవకాశం ఇవ్వలేదు’ అని ప్రశ్నించారు. ఇక, దక్షిణాఫ్రికాలో పర్యటించే భారత ఎ జట్టుకు రిషబ్ వంత్ నాయకత్వం వహించనున్నాడు. ఇదంతా బాగానే ఉంది కానీ మంచి ప్రదర్శన చేస్తున్న ఆటగాడిని కనీసం జట్టులోకైనా తీసుకోవాలి కదా? అని సర్ఫరాజ్ ఖాన్ విషయంలో ప్రశ్నిస్తున్నారు.