అమెరికా చదువులపై తగ్గిన ఆసక్తి,,,,కెనడా, ఆస్ట్రేలియావైపే తెలుగువారి చూపు

అమెరికాలో ఉద్యోగం కోసం కలలు కనే వేలాది మంది భారతీయ విద్యార్థులకు ఇటీవల ట్రంప్ యంత్రాంగం నుంచి భారీ ఉపశమం కలిగించే న్యూస్ వచ్చింది. H-1B వీసా (H-1B Visa) కోసం పెంచిన లక్ష డాలర్ల (సుమారు రూ.83 లక్షలు) ఫీజు, అక్కడ చదువుకుని, F-1 వీసా నుంచి H-1Bకి మారేవారికి వర్తించదని యునైటెడ్ స్టేట్స్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) స్పష్టం చేసింది. నిజానికి, ఇది మన తెలుగు విద్యార్థులకు చాలా పెద్ద ఊరట. అయితే! ఈ క్లారిటీ వచ్చినా కూడా, తెలుగు రాష్ట్రాల విద్యార్థులు, వారి తల్లిదండ్రుల్లో మునుపటి ఉత్సాహం కనిపించడం లేదు! 'అమెరికా చదువులంటే చాలు... లక్షల ఫీజు కట్టినా వెళ్తాం' అనే దూకుడు ఇప్పుడు కనిపించడం లేదని హైదరాబాద్‌లోని ఓవర్సీస్‌ కన్సల్టెన్సీలు చెబుతున్నాయి. ఇది నిజంగా ట్రెండ్‌ రివర్స్ అవుతోంది అనడానికి ఇదో సంకేతం.

 కన్సల్టెన్సీల మాటల్లో చెప్పాలంటే, లక్ష డాలర్ల ఫీజు నుంచి మినహాయింపు లభించినా, డొనాల్డ్ ట్రంప్‌ అధ్యక్షుడిగా బాధ్యతలు స్వీకరించిన తర్వాత వచ్చిన వరుస వివాదాస్పద నిర్ణయాల కారణంగా నమ్మకం (Trust) పోయింది. F-1 వీసాపై తాత్కాలిక ఉద్యోగాలు చేసేవారిపై నిబంధనలను కఠినతరం చేయడం. ఉద్యోగ వీసాల విషయంలో నిరంతరం నిబంధనలు మారుస్తూ, పూటకో ప్రకటన చేయడం. తాజాగా లక్ష డాలర్ల ఫీజు మినహాయింపు వచ్చినా, రేపు మళ్లీ ఇంకో కొత్త నిబంధన రాదనే గ్యారెంటీ లేకపోవడం.

హైదరాబాద్‌కు చెందిన ఓవర్సీస్‌ కన్సల్టెన్సీ సర్వీసెస్‌ కంపెనీలు చెప్పినట్టుగా, ఈ వరుస పరిణామాలన్నీ విద్యార్థులు, తల్లిదండ్రుల్లో తీవ్రమైన ఆందోళన రేపాయి. అందుకే మినహాయింపు వచ్చినా, 'మునుపటి ఉత్సాహం కనిపించడం లేదు.' కాగా, ఇటీవలే అమెరికా సుప్రీంకోర్టు హెచ్-1బీ వీసా హోల్డర్ల జీవిత భాగస్వాములకు సంబంధించి వర్క్ పర్మిట్ హెచ్-4 వీసాపై పిటిషన్లను కొట్టివేసిన సంగతి తెలిసిందే.

ఎక్కడికి పోతున్నారు?

అమెరికాలో మారిన పరిణామాల దృష్ట్యా, తెలుగు విద్యార్థుల దృక్పథంలో పెద్ద మార్పు వచ్చింది. ఒకప్పుడు బీటెక్‌ తర్వాత మాస్టర్స్‌ కోసం 70% మంది అమెరికాను మాత్రమే ఎంచుకునేవారు. కానీ, ఇప్పుడు అత్యధిక శాతం విద్యార్థులు కెనడా, ఆస్ట్రేలియా, జర్మనీ, యూకే లాంటి దేశాలకు వెళ్లేందుకు ఆసక్తి చూపిస్తున్నారని హిమాయత్‌నగర్‌లోని ఇంపీరియల్‌ ఓవర్సీస్‌ కన్సల్టెన్సీ ప్రతినిధి నయీమ్‌ వెల్లడించారు. మొత్తానికి, 'అమెరికన్ డ్రీమ్' అనేది ఇప్పుడు 'హై రిస్క్ గేమ్‌'గా మారిపోయింది. అందుకే మన విద్యార్థులు స్థిరమైన, క్లియర్‌గా వీసా రూల్స్ ఉన్న 'కెనడియన్ డ్రీమ్' లేదా 'ఆస్ట్రేలియన్ డ్రీమ్' వైపు రూటు మార్చుకుంటున్నారన్నమాట!