ప్రశాంత్ కిశోర్‌ను చుట్టుముట్టిన డబుల్ ఓటు వివాదం

రాజకీయ వ్యూహకర్త, జన్ సురాజ్ పార్టీ వ్యవస్థాపకుడు ప్రశాంత్ కిశోర్  కొత్త వివాదంలో చిక్కుకున్నారు. ఆయన పేరు బీహార్‌తో పాటు పశ్చిమ బెంగాల్ ఓటర్ల జాబితాలో కూడా నమోదైనట్లు ఆరోపణలు రావడంతో కలకలం రేపింది. ఈ విషయంపై వివరణ ఇవ్వాలని కోరుతూ బీహార్ ఎన్నికల అధికారులు ఆయనకు నోటీసులు జారీ చేశారు. ప్రశాంత్ కిశోర్ పేరు రెండు రాష్ట్రాల్లో ఓటరుగా నమోదై ఉందని అక్టోబర్ 28న ఓ జాతీయ పత్రికలో కథనం ప్రచురితమైంది. దాని ప్రకారం, బీహార్‌లోని ససారాం పార్లమెంట్ నియోజకవర్గం పరిధిలోని కర్‌ఘర్ అసెంబ్లీ సెగ్మెంట్‌లో ఆయనకు ఓటు ఉంది. అదే సమయంలో పశ్చిమ బెంగాల్ ముఖ్యమంత్రి మమతా బెనర్జీ ప్రాతినిధ్యం వహిస్తున్న భవానీపూర్ నియోజకవర్గంలోనూ ఆయన పేరు ఓటరుగా నమోదై ఉంది. అక్కడ ఆయన చిరునామాగా తృణమూల్ కాంగ్రెస్ పార్టీ కార్యాలయం ఉన్న నెం. 121, కాళీఘాట్ రోడ్ అని పేర్కొన్నారు.ఈ కథనం ఆధారంగా కర్‌ఘర్ అసెంబ్లీ నియోజకవర్గ రిటర్నింగ్ అధికారి ప్రశాంత్ కిశోర్‌కు నోటీసులు జారీ చేశారు. ప్రజాప్రాతినిధ్య చట్టం, 1950లోని సెక్షన్ 17 ప్రకారం ఒక వ్యక్తి ఒకటి కంటే ఎక్కువ నియోజకవర్గాల్లో ఓటరుగా నమోదు కావడం చట్టవిరుద్ధమని నోటీసులో స్పష్టం చేశారు. ఈ నిబంధనను ఉల్లంఘిస్తే ఏడాది వరకు జైలు శిక్ష లేదా జరిమానా లేదా రెండూ విధించే అవకాశం ఉందని హెచ్చరించారు.కర్‌ఘర్ నియోజకవర్గంలో ప్రశాంత్ కిశోర్ ఓటర్ ఐడీ నంబర్ IUJ1323718 అని నోటీసులో పేర్కొన్నారు. "ఒకవేళ మీ పేరు ఒకటి కంటే ఎక్కువ నియోజకవర్గాల్లో నమోదై ఉంటే, ఆ విషయంపై మూడు రోజుల్లోగా స్పష్టత ఇవ్వాలి. లేనిపక్షంలో ఎన్నికల చట్టం ప్రకారం చర్యలు తీసుకుంటాం" అని రిటర్నింగ్ అధికారి ఆదేశించారు.బీహార్‌లో అసెంబ్లీ ఎన్నికలు సమీపిస్తున్న తరుణంలో, జన్ సురాజ్ యాత్ర ద్వారా ప్రజల్లోకి వెళుతున్న ప్రశాంత్ కిశోర్‌కు ఈ వివాదం ఇబ్బందికరంగా మారింది. ఆయన విశ్వసనీయతను ప్రశ్నించేందుకు ప్రతిపక్షాలకు ఇదొక అస్త్రంగా మారే అవకాశం ఉంది. ఈ ఆరోపణలపై ప్రశాంత్ కిశోర్ బృందం నుంచి ఇంకా అధికారికంగా ఎలాంటి స్పందన రాలేదు.