సీబీఐ పిటిషన్ కొట్టేసిన కోర్టు,,,,వైఎస్ జగన్‌కు రిలీఫ్

వైసీపీ అధినేత , మాజీ ముఖ్యమంత్రి వైఎస్ జగన్‌కు రిలీఫ్ లభించింది. నాంపల్లి సీబీఐ న్యాయస్థానం వైఎస్ జగన్‌కు ఊరట కలిగిస్తూ నిర్ణయం తీసుకుంది. వైఎస్ జగన్ ఇటీవల లండన్ పర్యటనకు వెళ్లిన సంగతి తెలిసిందే. లండన్‌లో ఉన్న పెద్ద కుమార్తెను చూసేందుకు వైఎస్ జగన్ అక్టోబర్ 11వ తేదీన లండన్ పర్యటనకు వెళ్లారు. అయితే వైఎస్ జగన్ లండన్ పర్యటన సందర్భంగా బెయిల్ కండీషన్లను ఉల్లంఘించారని సీబీఐ పిటిషన్ వేసింది. వైఎస్ జగన్ తన సొంత ఫోన్ నంబర్‌ను వెల్లడించలేదని కోర్టులో పిటిషన్ చేసింది. వైఎస్ జగన్ లండన్‌లో ఉన్న సమయంలో మూడు సార్లు నంబర్‌కు ఫోన్ చేసినా.. ఆ నంబర్ పని చేయలేదని సీబీఐ తన పిటిషన్‌లో పేర్కొంది. జగన్ ఉద్దేశపూర్వకంగానే ఇలా పనిచేయని ఫోన్ నంబర్ ఇచ్చారని కేంద్ర దర్యాప్తు సంస్థ పిటిషన్ వేసింది. బెయిల్ నిబంధనలు ఉల్లంఘించిన నేపథ్యంలో మరోసారి వైఎస్ జగన్ విదేశీ పర్యటనలకు అనుమతి ఇవ్వొద్దని కోర్టును సీబీఐ కోరింది.

సీబీఐ వేసిన పిటిషన్ మీద నాంపల్లి సీబీఐ కోర్టు విచారణ జరిపింది. ఈ సందర్భంగా వైఎస్ జగన్ తరుఫు న్యాయవాదులు వాదనలు వినిపించారు. వైఎస్ జగన్ అసలు ఫోన్ వాడరని తెలిపిన న్యాయవాదులు.. గతంలోనూ జగన్ తన సిబ్బంది ఫోన్ నంబర్లే ఇచ్చారని వాదనలు వినిపించారు. ఇరు పక్షాల వాదనలు విన్న నాంపల్లి సీబీఐ కోర్టు అక్టోబర్ 22వ తేదీన తీర్పును రిజర్వ్ చేసింది. తాజాగా సీబీఐ పిటిషన్‌ను డిస్మిస్ చేస్తూ నాంపల్లి సీబీఐ కోర్టు తీర్పును విచారించింది.

మరోవైపు లండన్‌లో ఉన్న తన కుమార్తెను చూసేందుకు విదేశీ పర్యటనకు వెళ్లేందుకు అనుమతి ఇవ్వాలని వైఎస్ జగన్ కోర్టును ఇటీవల కోరారు. అందుకు నాంపల్లి సీబీఐ కోర్టు షరతులతో కూడిన అనుమతిని ఇచ్చింది. అయితే వైఎస్ జగన్ తన పర్యటన వివరాలు, ఫోన్‌ నంబర్లతో పాటుగా, ఈమెయిల్ ఐడీ ఇవ్వాలని స్పష్టం చేసింది. అలాగే విదేశీ పర్యటన పూర్తి చేసుకుని వచ్చిన అనంతరం ప్రత్యక్షంగా కోర్టుకు హాజరుకావాలని స్పష్టం చేసింది. దీంతో అక్టోబర్ 11న వైఎస్ జగన్ లండన్ పర్యటనకు బయలుదేరి వెళ్లారు. అనంతరం దీపావళి పండుగకు ముందు వైఎస్ జగన్ తిరిగి స్వదేశం చేరుకున్నారు. బెంగళూరులోని నివాసానికి చేరుకున్న వైఎస్ జగన్.. అక్కడ సతీమణి భారతి రెడ్డితో కలిసి దీపావళి వేడుకల్లో పాల్గొన్నారు. టపాసులు పేల్చి సంబరాలు జరుపుకున్నారు.