"నా భార్య నా మతంలోకి మారాలని ఆశిస్తున్నా": జేడీ వాన్స్

అగ్రరాజ్యం అమెరికా ఉఫాధ్యక్షుడు జేడీ వాన్స్.. తన భార్య ఊషా వాన్స్ మత విశ్వాసాలపై చేసిన వ్యాఖ్యలు ప్రస్తుతం అమెరికాలో తీవ్ర చర్చనీయాంశంగా మారాయి. తన భార్య క్రిస్టియానిటీ (క్రైస్తవ మతం)ని స్వీకరించాలని తాను ఆశిస్తున్నట్లు వాన్స్ బహిరంగంగా ప్రకటించారు. దీంతో మత స్వేచ్ఛ విషయంలో ఆయన వైఖరిపై తీవ్ర విమర్శలు వస్తున్నాయి. మిస్సిస్సిప్పిలో జరిగిన ఓ కార్యక్రమంలో మాట్లాడుతూ.. వాన్స్ ఈ వ్యాఖ్యలు చేశారు. "నేను నా పిల్లలను క్రిస్టియన్‌లుగా పెంచుతున్నాను. మా 8 ఏళ్ల కుమారుడికి ఏడాది క్రితం ఫస్ట్ కమ్యూనియన్ జరిగింది. మా ఇద్దరు పెద్ద పిల్లలు క్రిస్టియన్ పాఠశాలకు వెళ్తున్నారు. చాలా ఆదివారాలు ఊష కూడా నాతో పాటు చర్చికి వస్తుంది" అని ఆయన తెలిపారు.

ఆమె కూడా మతం మారాలని ఆశిస్తున్నా..

ఈ సందర్భంగానే తన భార్య గురించి జేడీ వాన్స్ మాట్లాడుతూ.. "నన్ను ఏ విషయం కదిలించి, మార్చిందో.. అదే విషయం మా ఆజ్ఞేయవాది (దేవుడిపై ఎలాంటి నమ్మకం లేని) అయిన నా భార్యను కూడా కదిలించి, ఆమె క్రిస్టియన్ విశ్వాసంలోకి రావాలని నేను ఆశిస్తున్నాను? నిజంగానే ఆశిస్తున్నాను" అని స్పష్టం చేశారు. తాను క్రిస్టియన్ సువార్తను నమ్ముతానని చెప్పారు. అలాగే తన భార్య కూడా దానిని అదే విధంగా చూడాలని ఆశిస్తున్నట్లు ఆయన తన కోరికను వెల్లడించారు.

జేడీ వాన్స్ తన భార్య ఊషను 'ఆజ్ఞేయవాది'గా పేర్కొనడంపై తీవ్ర స్థాయిలో విమర్శలు వెల్లువెత్తుతున్నాయి. వాస్తవానికి భారతీయ మూలాలున్న ఊష వాన్స్ హిందూ కుటుంబంలో పెరిగారు. వివాదానికి కేంద్రంగా మారిన సామాజిక మాధ్యమాల్లోని విమర్శకులు.. వాన్స్ తన రాజకీయ ప్రయోజనాల కోసం ఆమె హిందూ మూలాన్ని దాచడానికి ప్రయత్నిస్తున్నారని ఆరోపిస్తున్నారు.

మత స్వేచ్ఛ ఎక్కడికి పోయింది..?

వాన్స్ వ్యాఖ్యలను విమర్శిస్తున్నవారు మత స్వేచ్ఛ గురించి మాట్లాడే మాటలు ఎక్కడికి పోయాయి అని ప్రశ్నిస్తున్నారు. ముఖ్యంగా యుఎస్ కాంగ్రెస్ ద్వారా నియమించబడిన అంతర్జాతీయ మత స్వేచ్ఛపై యుఎస్ కమిషన్ లాంటి సంస్థలు ఉన్నప్పటికీ.. సొంత ఇంట్లోనే జేడీ వాన్స్ ఇలాంటి కోరికను వ్యక్తం చేయడం సరికాదని అభిప్రాయ పడుతున్నారు. సేవ అనేది ఇంట్లోనే ప్రారంభం కావాలంటూ వాన్స్‌కు చురకలు అంటిస్తున్నారు. మత విశ్వాసం అనేది వ్యక్తిగతం అని, ఊష మారకపోయినా తనకు సమస్య లేదని జేడీ వాన్స్ చెప్పినప్పటికీ.. బహిరంగంగా తన ఆకాంక్షను వెల్లడించడం ద్వారా అంతర్-మత వివాహాల సున్నితత్వాన్ని ఆయన విస్మరించారని అంటున్నారు. మరి ఆయన మాటలు వింటే మీకేమనిపిస్తుందో కామెంట్ల రూపంలో తెలియజేయండి.