భర్త సోదరుడిని సుఖపెట్టాలంటూ..... అత్తామామతో పాటు తోడికోడలు కూడా

వేధింపులు.. మన దేశంలోని మహిళలు ఎదుర్కొంటున్న ప్రధాన సమస్యలలో ఇదో ముఖ్యమైన సమస్య. వీధిలోనే కాదు.. ఇంట్లోనూ ఈ సమస్యలు ఎదుర్కొంటున్నారు నేటి మహిళలు. రోడ్డుపై వీధి కుక్కలంటే పర్లేదు.. ఇంటి సభ్యులు కూడా అనుచితంగా ప్రవర్తిస్తూ ఉండటంతో ఎవరితో చెప్పుకోవాలో తెలియక.. ఎవరితోనూ చెప్పుకోలేక మానసిక క్షోభను అనుభవిస్తున్న వారెందరో. పరువు, ప్రతిష్ఠ, బంధుత్వం, బంధాలు.. ఇలా గొంతెత్తి చెప్పాలనుకుంటే ఎదురయ్యే అవాంతరాలెన్నో. రక్తసంబంధీకులు కూడా అసభ్యంగా ప్రవర్తిస్తూ ఉంటే.. కాపాడాల్సిన చేతులే కాటేస్తుంటే.. పంటి బిగువన బాధను భరిస్తూ లోలోన తల్లడిల్లుతున్న అబలలు ఎందరో.. ఇలాంటి ఘటనే ఏలూరు జిల్లాలో చోటుచేసుకుంది. జంగారెడ్డిగూడెంలో జరిగిన ఈ ఘటన సభ్యసమాజం తలదించుకునేలా చేస్తోంది..

జంగారెడ్డిగూడెంలో దారుణ ఘటన చోటుచేసుకుంది. బాధితురాలు చెప్తున్న వివరాల ప్రకారం.. బావను సుఖపెట్టాలంటూ ఓ వివాహితను.. తన అత్తింటివారు వేధింపులకు గురిచేసిన వైనం వెలుగు చూసింది. రంజిత్ అనే వ్యక్తికి రెండేళ్ల క్రితం ఓ మహిళతో పెళ్లి జరిగింది. వీరికి ఓ బాబు కూడా పుట్టాడు. అయితే గత కొన్ని రోజులుగా ఆ మహిళను.. అత్తింటివారు వేధింపులకు గురి చేస్తున్నారు. భర్త సోదరుడు (బావ)తో వివాహేతర సంబంధం పెట్టుకోవాలంటూ వేధింపులకు గురి చేస్తున్నారు. అది కూడా అత్తామామ, తోడికోడలు కావటం గమనార్హం. బావ ప్రవీణ్‌ను సుఖపెట్టాలంటూ గత కొన్నిరోజులుగా ఒత్తిడి చేస్తున్నారు. ప్రవీణ్‌కు పెళ్లి జరిగి 8 ఏళ్లు కావొస్తోంది. ఈ నేపథ్యంలో వారసుడి కోసం అతని భార్యతోపాటుగా అత్తమామలు చిన్న కోడలుపై ఒత్తిడి తెచ్చారు. అయితే ఇందుకు ఆమె అంగీకరించకపోవటంతో.. పది రోజుల నుంచి గదిలో నిర్బంధించారు.

మరోవైపు మహిళతో పాటుగా ఆమె కొడుకును కూడా ఓ గదిలో బంధించారు. ఆ గదికి కరెంట్, తిండి, నీరు, బాత్ రూమ్ లేకుండా అమానుషంగా ఆమెను వేధించారు. అయితే ఈ వ్యవహారం మానవహక్కుల కమిషన్ వద్దకు చేరింది. దీంతో బాధితురాలికి మద్దతుగా మహిళా సంఘాలు ఆమె ఇంటి ముందు ఆందోళన చేపట్టాయి. దీంతో ఈ వ్యవహారం పోలీసుల వద్దకు చేరగా.. పోలీసులు అక్కడకు చేరుకుని రంజిత్ కుటుంబసభ్యులను పోలీస్ స్టేషన్‌కు తరలించారు.

ఈ ఘటనపై కేసు నమోదు చేసి దర్యాప్తు మొదలుపెట్టారు. అయితే బాధితురాలి ఆరోపణలను ఆమె అత్తింటివారు ఖండిస్తున్నారు. తాము వేధింపులకు పాల్పడలేదని.. తమపై కట్టుకథలు అల్లుతున్నారని చెప్తున్నారు. ఈ ఘటనపై విచారణలో అసలు విషయాలు తెలుస్తాయని చెప్తున్నారు.