చాక్లెట్ ఆశ చూపి..4 ఏళ్ల చిన్నారిపై ఇద్దరు యువకుల దారుణం

రెండు తెలుగు రాష్ట్రాల్లో వరుసగా జరుగుతున్న అత్యాచార ఘటనలు సమాజపు అంతరాత్మను తీవ్రంగా గాయపరుస్తున్నాయి. దేశ వ్యాప్తంగా కఠిన చట్టాలు ఎన్ని అమలు అవుతున్నా.. న్యాయ వ్యవస్థ ఎంత కఠినంగా వ్యవహరించినా.. కామాంధులు ఏమాత్రం భయం లేకుండా పాశవిక చర్యలకు పాల్పడుతున్నారు. చిన్న, పెద్ద, ముసలి, ముతక అనే వయసుతో సంబంధం లేకుండా.. పసిబిడ్డల నుంచి వృద్ధుల వరకు అబలల జీవితాలు నాశనం అవుతున్నాయి. మహిళలను దేవతలుగా కొలిచే మన సంస్కృతిలో.. ఇలాంటి హేయమైన నేరాలు జరగడం తలదించుకోవాల్సిన పరిస్థితులు ఏర్పడుతున్నాయి. తాజాగా నాలుగేళ్ల చిన్నారిపై ఇద్దరు కామాంధులు అఘాయిత్యానికి పాల్పడ్డారు. పూర్తి వివరాల్లోకి వెళ్తే..

యాదాద్రి భువనగిరి జిల్లా లోని చౌటుప్పల్ మున్సిపాలిటీ పరిధిలో జరిగిన ఈ దారుణం యావత్ సమాజాన్ని తలదించుకునేలా చేసింది. నాలుగేళ్ల చిన్నారిపై రాక్షసత్వం రాజ్యమేలిన ఈ అమానవీయ సంఘటన ఇక్కడ చోటు చేసుకుంది. మధ్యప్రదేశ్‌కు చెందిన ఇద్దరు యువకులు, మానవత్వం మరచి.. కన్నతల్లి ప్రేమకు ప్రతిరూపమైన ఆ పసిపాపను అఘాయిత్యానికి గురిచేశారు. వీరు ఆ అమాయక చిన్నారికి చాక్లెట్ ఆశ చూపించి.. క్రూరంగా తమ వాంఛను తీర్చుకోవాలని ప్రయత్నించారు. ఆ చిట్టితల్లి నిస్సహాయంగా ఆ నరకయాతనను అనుభవించింది. నిందితులు మద్యం లేదా గంజాయి సేవించి ఉండవచ్చని.. ఆ మత్తులోనే ఈ పాశవిక చర్యకు ఒడిగట్టినట్లు సమాచారం. ఆ చిన్నారి పెద్దగా కేకలు వేయడంతో.. చుట్టుపక్కల స్థానికులు వెంటనే స్పందించారు.

స్థానికులు తలుపులు బద్దలు కొట్టి లోపలికి వెళ్లి.. ఆ పసిబిడ్డను కాపాడారు. వెంటనే ఆ బాలికను ఆసుపత్రికి తరలించారు. ప్రస్తుతం ఆ చిన్నారి పరిస్థితి ఆందోళనకరంగా ఉందని తెలుస్తోంది. ఈ పాశవిక దాడి ఆ చిన్నారి శారీరక ఆరోగ్యానికే కాకుండా, ఆమె మానసిక స్థితిపై కూడా చెరగని ముద్ర వేసింది.

స్థానికులు సాహసంతో నిందితులను పట్టుకుని పోలీసులకు అప్పగించారు. ఇలాంటి దారుణమైన చర్యలకు పాల్పడిన అమాయక బతుకులను నాశనం చేసిన రాక్షసులను ప్రభుత్వం కఠినంగా శిక్షించాలి. న్యాయ వ్యవస్థ తక్షణమే స్పందించి.. వేగవంతమైన విచారణ జరిపి, ఈ పాపులకు ఉరిశిక్షవేయాలని స్థానికులు డిమాండ్ చేస్తున్నారు.