టీచర్ స్కూటీలో దూరిన నాగుపాము.. 5 కి.మీ. వెళ్లాక మెల్లగా పైకి

విష సర్పం తన స్కూటీలో దూరిన విషయం తెలియక ఓ మహిళా లెక్చరర్ కాలేజీకి బయలుదేరి 5 కిలోమీటర్లు అలాగే నడుపుకుని వెళ్లారు కొద్దిసేపట్లో గమ్యానికి చేరుకుంటారనగా.. బ్రేక్ హ్యాండిల్ దగ్గర ఏదో కదలినట్టు అనిపించి చూడగా పాము తల మెల్లగా పైకి రావడం చూసి షాకరయ్యారు. కానీ, ఏమాత్రం తడబడినా దానికి కాటుకు గురవుతానని భావించిన ఆమె భయపడకుండా గుండె ధైర్యం తెచ్చుకుంది. అలాగే స్కూటీ నడుపుకుని కాలేజీకి చేరుకుని, మెకానిక్‌ను పిలిపించి తర్వాత దానిని బయటకు తీయించారు. త్రుటిలో మహిళా లెక్చరర్ పాము కాటు నుంచి తప్పించుకున్న ఈ ఘటన కేరళలో మూడు రోజుల కిందట చోటుచేసుకుంది.

వివరాల్లోకి వెళ్తే.. కాసర్‌గోడ్‌లోని తైక్కడపురానికి చెందిన షరాఫున్నిసా.. స్థానిక నెహ్రూ కాలేజీలో లెక్చరర్‌గా పనిచేస్తున్నారు. ఆమె రోజూమాదిరిగానే అక్టోబరు 30న గురువారం హెల్మెట్, షూ ధరించి కాలేజీకి స్కూటీపై వెళ్తున్నారు. ఈ క్రమంలో 4 కి.మీ. దూరం వెళ్లాక బ్రేకు హ్యాండిల్ వద్ద ఏదో కదులుతున్నట్లు ఆమె గుర్తించారు. ఏంటా అని అనుమానం వచ్చిన తదేకంగా చూడగాలో అందులో నుంచి పాము మెల్లగా కదులుతూ పైకి వస్తోంది. ఏమాత్రం కంగారుపడినా పాము కాటువేయడమే కాదు, రోడ్డుపై ప్రమాదానికి దారితీస్తుందని ఆమె గ్రహించారు.

భయపడకుండా ధైర్యాన్ని కూడదీసుకుని నెమ్మదిగా బైక్ నడుపుతూ లెక్చరర్ కాలేజీకి చేరుకున్నారు. ఆ తర్వాత మెకానిక్‌‌కు ఫోన్ చేసి రప్పించి స్కూటీ బంపర్ సహా ముందు భాగాలను నెమ్మదిగా విప్పించి, పామును జాగ్రత్తగా బయటకు తీయించారు. ఆ తర్వాతే ఈ విషయం గురించి కుటుంబసభ్యులకు ఆమె తెలియజేశారు. అదృష్టం కొద్దీ తాను పాము కాటు నుంచి త్రుటిలో తప్పించుకుని ప్రాణాలతో బయటపడ్డానని ఆమె అంటున్నారు. బయలుదేరే ముందు హెల్మెట్లు, షూలే కాకుండా బైక్‌లను కూడా ఒకసారి చూసుకోవాలని ఆమె సూచిస్తున్నారు. హెల్మెట్, షూ, పాదరక్షల్లోకి దూరిన పాములు కాటువేసి ప్రాణాలు కోల్పోయిన ఘటనలు చాలా ఉన్నాయి. ఇటీవలే బెంగళూరులో ఓ టెకీ తన చెప్పుల్లో పాము దూరిన విషయం గమనించకుండా వాటిని వేసుకుని బయటకు వెళ్లొచ్చాడు. అది కాటువేయడంతో చనిపోయాడు. తర్వాత అందులో పాము ఉన్నట్టు ఇంటిలో పనిచేసే వ్యక్తి గమనించాడు.