ఆమెజాన్ లేఆఫ్స్.... ఆ రెండు నగరాల్లో ఎక్కువగా

దిగ్గజ టెక్ కంపెనీల్లో ఒకటైన అమెజాన్ ఇటీవల షాకింగ్ ప్రకటన విడుదల చేసింది. పెద్ద మొత్తంలో లేఆఫ్స్ ప్రకటించింది. కార్పొరేట్ సెక్టార్‌లో 14,000 మందిని తొలగిస్తున్నట్లు తెలిపింది. అందులో భాగంగా ఇటీవల ఉద్యోగులకు టెక్ట్స్ మెసేజెస్ పంపించి తొలగింపులు చేపట్టింది. ఇప్పుడు అమెజాన్ హోమ్ స్టేట్ అయిన వాషింగ్టన్‌లో.. 2,303 కార్పొరేట్ ఉద్యోగాలు తొలగించేందుకు సిద్ధమైంది. ఈ మేరకు వాషింగ్టన్ ఎంప్లాయ్‌మెంట్ సెక్యూరిటీ డిపార్ట్‌మెంట్ చేసిన ఫైలింగ్‌లో పేర్కొంది. ప్రపంచవ్యాప్తంగా చేపట్టిన తొలగింపుల్లో భాగంగానే.. వాషింగ్టన్‌లో కూడా లేఆఫ్స్ చేపట్టినట్లు వెల్లడించింది.

సాఫ్ట్‌వేర్ ఉద్యోగాలు పోతున్నాయ్..

అమెజాన్.. వాషింగ్టన్ రాష్ట్రంలో చేపట్టిన తొలగింపుల ప్రభావం ఎక్కువగా సాఫ్ట్‌వేర్ ఇంజినీర్లపై పడింది. లొలగిస్తున్న 2,303 కార్పొరేట్ ఉద్యోగాల్లో.. 600పైగా సాఫ్ట్‌వేర్ ఇంజినీర్లు ఉన్నారు. అమెజాన్.. వాషింగ్టన్‌లో తొలగిస్తున్న మొత్తంలో.. పావు వంతు కంటే ఎక్కువ. ఇది కేవలం వాషింగ్టన్ రాష్ట్రంలో మాత్రమే.. అమెరికాలో, ప్రపంచవ్యాప్తంగా ఇంకెన్ని సాఫ్ట్‌వేర్ ఇంజినీర్ల ఉద్యోగాలకు అమెజాన్ కోత పెడుతుందో వేచి చూడాలి.

ఏఐ ఆధారిత కోడింగ్‌లో పురోగతి నేపథ్యంలో టెక్ కంపెనీలు సాఫ్ట్‌వేర్ ఉద్యోగాల్లో కోత పెడుతున్నాయని నిపుణులు అంటున్నారు. ఈ ఏడాది ప్రారంభంలో మైక్రోసాఫ్ట్ ఇంజనీరింగ్ డిపార్ట్‌మెంట్‌ ఉద్యోగాల్లో కోతలు పెట్టింది. ఇప్పుడు అమెజాన్ కూడా అదే ఫాలో అవుతున్నట్లు అనిపిస్తోంది. ఇక ఈ ఏడాది జూలైలో అమెజాన్ తన స్వంత AI టూల్.. కిరోను (Kiro) ప్రారంభించింది. దీన్ని తన సిబ్బంది ఏఐ కోడ్ అసిస్టెంట్‌గా ఉపయోగించడానికి సిద్ధమవుతోంది. ఇంతకుముందు కోర్ సాఫ్ట్‌వేర్ కోడ్ కోసం.. ఇంజినీర్లు అవసరం అయ్యేవారు. కానీ ఇప్పుడు ఆ పని కూడా ఏఐయే చేస్తుండటం గమనార్హం.

ఆ రెండు నగరాల్లో..

వాషింగ్టన్‌లోని సియాటిల్, బెల్లేవ్‌ నగరాల్లోని కార్యాలయాల్లో ఎక్కువగా కోతలు ఉండనున్నట్లు ఫైలింగ్‌లో అమెజాన్ పేర్కొంది. కేవలం సాఫ్ట్‌ఇంజినీర్లే కాకుండా.. రిక్రూటింగ్, హెచ్ఆర్, మార్కెటింగ్, అడ్వర్ట్జైజింగ్, లీగల్.. వంటి విభాగాల్లోనూ తొలగింపులు చేస్తోంది. 500 కంటే ఎక్కువ మేనేజర్లను కూడా తొలగిస్తోంది. సియాటెల్ ఆఫీసులో 361 మంది ఉద్యోగులను అమెజాన్ తొలగిస్తోంది. వాషింగ్టన్‌ రాష్ట్రంలోని ఆఫీసుల్లో రిమోట్‌గా పనిచేస్తున్న 100 మందికి పైగా ఉద్యోగులను కూడా అమెజాన్ తీసేయనుంది.

అందుకే తొలగిస్తున్నాం

మరోవైపు, 14 వేల మందిని ఉద్యోగాల్లోంచి తొలగిస్తుండటంపై అమెజాన్ చీఫ్ హెచ్ఆర్ బెత్ గాలెట్టి ఇటీవల స్పందించారు. సంస్థకు, కస్టమర్లకు.. ప్రస్తుత, భవిష్యత్తు అవసరాల దృష్ట్యా ఈ నిర్ణయం తీసుకున్నట్లు చెప్పారు. ఏఐ వినియోగాన్ని పెంచడంలో భాగంగానే.. ఇలా ఉద్యోగ కోతలు చేపట్టినట్లు తెలిపారు.