చికెన్ ఫ్రై తక్కువగా పెట్టారంటూ పెళ్లిలో గొడవ.. ఆగిపోయిన వివాహ తంతు

ఉత్తర ప్రదేశ్‌లోని బిజ్నోర్ జిల్లాలో వివాహ వేడుక విషాదకరమైన మలుపు తిరిగింది. అత్యంత రుచికరమైన వంటకాల్లో ఒకటైన 'చికెన్ ఫ్రై' అతిథులకు తగినంతగా వడ్డించకపోవడంతో గొడవ మొదలైంది. ఈక్రమంలోనే మాటా మాటా పెరిగి చివరకు భారీ ఘర్షణకు దారితీసింది. ఆనందంగా జరగాల్సిన నిఖా వేడుక ఒక్కసారిగా రణరంగంగా మారిపోయింది. ఈ అల్లరిలో దాదాపు 15 మంది గాయపడినట్లు స్థానిక వర్గాలు వెల్లడించాయి.

బిజ్నోర్ ప్రాంతంలో జరుగుతున్న ఈ వివాహానికి వధువు తరఫు కుటుంబం భారీ ఏర్పాట్లు చేసింది. వేడుక సందర్భంగా అతిథులకు నోరూరించే వంటకాలను వడ్డిస్తున్న క్రమంలో.. వరుడి తరఫు బంధువులు కొందరు అకస్మాత్తుగా ఫిర్యాదు చేయడం ప్రారంభించారు. తమకు చికెన్ ఫ్రై చాలా తక్కువ పరిమాణంలో వడ్డిస్తున్నారని.. ఇది మర్యాదపూర్వకంగా లేదని ఆరోపించారు. వరుడి తరఫు బంధువుల అభ్యంతరాన్ని పరిగణలోకి తీసుకున్న వధువు కుటుంబ సభ్యులు.. వారికి ఎక్కువ మొత్తంలో చికెన్ ఫ్రై ముక్కలను తెచ్చి వడ్డించారు. అయినప్పటికీ వివాదం సద్దుమణగకపోగా.. మరింత తీవ్రమైంది.

వడ్డించే పద్దతి బాలేదంటూ మళ్లీ ఫిర్యాదు..

మీరు వడ్డించే పద్ధతి సరిగ్గా లేదు, మాకు మర్యాద ఇవ్వడం లేదంటూ వరుడి బంధువులు మరోసారి ఫిర్యాదు చేయడంతో పరిస్థితి గందరగోళంగా మారింది. వంటకాల విషయంలో మొదలైన చిన్న వాగ్వాదం.. కాసేపటికే వధువు, వరుడి కుటుంబ సభ్యుల మధ్య తీవ్ర ఘర్షణగా మారింది. ఒకరిపై ఒకరు పిడి గుద్దులు గుద్దుకున్నారు. అలాగే తోపులాటలతో దాడులు చేసుకున్నారు. వివాహ వేదిక మొత్తం కుర్చీలు, పాత్రలు చెల్లాచెదురై భయానక వాతావరణం నెలకొంది. అతిథులు భయంతో పరుగులు తీశారు. ఈ గొడవలో ఇరు పక్షాల నుంచి సుమారు 15 మంది వ్యక్తులు గాయపడ్డారు.

పోలీసుల జోక్యంతో సద్దుమణిగిన పరిస్థితి

పెళ్లి వేదిక వద్ద ఘర్షణ తీవ్రం కావడంతో.. స్థానికులు వెంటనే పోలీసులకు సమాచారం అందించారు. బిజ్నోర్ పోలీసులు హుటాహుటిన ఘటనాస్థలికి చేరుకున్నారు. ఇరు పక్షాలను శాంతింపజేసేందుకు ప్రయత్నించారు. బలవంతంగా ఇరు కుటుంబాలను విడదీసి.. పరిస్థితిని అదుపులోకి తెచ్చారు. ముఖ్యంగా ఆగిపోయిన వివాహ తంతును భారీ బందోబస్తు మధ్య పూర్తి చేయించారు. మరోవైపు ఈ ఘర్షణలో గాయపడిన వారిని వెంటనే చికిత్స నిమిత్తం సమీపంలోని ఆసుపత్రికి తరలించారు. అయితే ఆహారం విషయంలో జరిగిన ఈ చిన్నపాటి గొడవ చివరకు పెళ్లి ఆగిపోయేంతటి ప్రమాదకర స్థితికి దారితీయడంతో.. ఆహ్వానితులంతా ఆశ్చర్యం, ఆందోళన వ్యక్తం చేశారు. మరి దీన్ని చూస్తే మీకేమనిపిస్తుందో కామెంట్ల రూపంలో తెలియజేయండి.